মৰাণ,১০ জুন: হাতী-মানুহৰ সংঘাতৰ ভয়াৱহ পৰিণতি । ডিব্ৰুগড়ত বন্যহস্তীৰ আক্ৰমণ(Elephant Attack)ত প্ৰাণ গ'ল এগৰাকী বৃদ্ধৰ । দিহিং পাটকাই ৰাষ্ট্ৰীয় উদ্যান(National Park)ৰ সমীপৰ ডিব্ৰুগড়ৰ ২ নং কঠালগুৰি গাঁৱত সংঘটিত হয় এই শোকাৱহ ঘটনা । প্ৰাপ্ত তথ্য অনুসৰি, বুধবাৰে নিশা ভোলানাথ হাজৰিকা নামৰ লোকজন ঘৰৰ পৰা বাহিৰলৈ ওলাই যোৱাৰ সময়তে হাতীয়ে আক্ৰমণ কৰে ।
হাতীৰ জাকটো দিহিং পাটকাই(Dehing Patkai)ৰ পৰা ওলাই অহা বুলি জানিব পৰা গৈছে । ঘটনাস্থলীত বন বিভাগৰ লোক আৰু স্থানীয় আৰক্ষী উপস্থিত হৈ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে ডিব্ৰুগড় অসম চিকিৎসা মহাবিদ্যালয়লৈ প্ৰেৰণ কৰে । এই ঘটনাৰ পিছতে নিহত বৃদ্ধগৰাকীৰ পৰিয়ালবৰ্গলৈ আৰ্থিক সাহায্য প্ৰদান কৰাৰ বাবে বন বিভাগক দাবী জনাইছে স্থানীয় ৰাইজে । উল্লেখ্য যে, দীৰ্ঘদিনৰ পৰা বৃহত্তৰ অঞ্চলটোত বনৰীয়া হাতীয়ে ত্ৰাসৰ সৃষ্টি কৰি আহিছে । লগতে বহুলোকৰ ঘৰ, ভঁৰাল আদি ভাঙি লণ্ড-ভণ্ড কৰি আহিছে ।
কিন্তু আজি পৰ্যন্ত বন বিভাগ(Forest Department)ৰ লোকে কোনো ধৰণৰ ব্যৱস্থা গ্ৰহণ কৰা নাই বুলি স্থানীয় ৰাইজে অভিযোগ তুলিছে । জনাঞ্চলত বন্যহস্তীৰ আক্ৰমণত লোকজনৰ মৃত্যু হোৱাৰ পাছতে প্ৰাণৰ সংশয়ত ভূগিছে স্থানীয় ৰাইজে ।
লগতে পঢ়ক: ৰাষ্ট্ৰীয় উদ্যানৰ স্বীকৃতি দিহিং পাটকাইলৈ: উৎফুল্লিত ৰাজ্যৰ প্ৰকৃতিপ্ৰেমী
