ধুবুৰী,25 মাৰ্চঃ ভোটৰ অংকত কিমান তললৈ নামিব পাৰে প্ৰাৰ্থী ? কেৱল মাত্ৰ নিৰ্বাচনী বৈতৰণী পাৰ হ'বলৈ আৰু সংখ্যালঘু ভোট বেংকৰ স্বাৰ্থত গো-মাংসক লৈ কিছুদিন পূৰ্বে আপত্তিজনক আৰু বিতৰ্কিত মন্তব্য কৰিছিল গৌৰীপুৰৰ বিজেপি প্ৰাৰ্থী বনেন্দ্ৰ কুমাৰ মুছাহাৰীয়ে ৷ এই সন্দৰ্ভত সামাজিক মাধ্যমৰ উপৰিও সংবাদ মাধ্যমত বাতৰি সম্প্ৰচাৰ হৈছিল । আনকি গৌৰীপুৰ সমষ্টিৰ লগতে সমগ্ৰ জিলাখনৰ হিন্দু সমাজৰ উপৰিও আন সম্প্ৰদায়ৰ সমাজত বিৰূপ প্ৰতিক্ৰিয়াৰো সৃষ্টি হৈছিল ৷
যাৰ পৰিপ্ৰেক্ষিতত সমগ্ৰ বিষয় গুৰুত্ব সহকাৰে লৈ নিৰ্বাচনী আচৰণ বিধি ভংগৰ অভিযোগত ধুবুৰী জিলা নিৰ্বাচন আয়োগে গৌৰীপুৰ থানাত বিতৰ্কিত বিজেপি প্ৰাৰ্থীগৰাকীৰ বিৰুদ্ধে ৪৪৪/২১ নম্বৰত এটা গোচৰ ৰুজু কৰিছে ৷ বিজেপি প্ৰাৰ্থী বনেন্দ্ৰ কুমাৰ মুছাহাৰীৰ মন্তব্য সন্দৰ্ভত তদন্ত আৰম্ভ কৰা হৈছে যদিও পৰৱৰ্তী সময়ত মুছাহাৰীৰ বিৰুদ্ধে কি ব্যৱস্থা গ্ৰহণ কৰা হয় সেয়া লক্ষণীয় বিষয় ৷
লগতে পঢ়কঃ শালমৰা চাহ বাগিচাত বিজেপি প্ৰাৰ্থী মৃনাল শইকীয়াৰ পদযাত্ৰা
