জোনাই,11এপ্ৰিল : পুনৰ ৰাজ্যত বৃদ্ধি পাইছে ক'ৰণাক্ৰান্ত ৰোগীৰ সংখ্য়া ৷ মহামাৰী এই ভাইৰাছ বিধৰ বিৰুদ্ধে পুনৰ যুঁজ দিয়াৰ বাবে সাজু হৈছে ৰাজ্যৰ স্বাস্থ্য বিভাগ ৷ লোক সকলক সজাগ কৰি তোলাৰ বাবে ৰাজ্যৰ ৰে'ল ষ্টেচন, বিমান বন্দৰ সমূহত বাধ্যতা মূলক কৰা হৈছে ক'ৰণা পৰীক্ষা ৷ অন্য প্ৰান্তৰ লগতে জোনাই মহকুমা প্ৰশাসনেও বহিঃ ৰাজ্যৰ পৰা যাত্ৰী সকলৰ বাবে বাধ্যতামূলক কৰিছে ক'ৰণা পৰীক্ষা ৷ মূৰ্কংচেলেক ৰে'ল ষ্টেচনত যাত্ৰী সকলৰ স্বাস্থ্য পৰীক্ষাৰ বাবে গ্ৰহণ কৰিছে পদক্ষেপ কিন্তু একাংশ যাত্ৰীয়ে স্বাস্থ্য পৰীক্ষা কৰাৰ বিপৰীতে পলোৱাৰহে চেষ্টা কৰিছে বুলি স্বাস্থ্য বিভাগে সদৰি কৰিছে ৷
ইফালে, শনিবাৰে গুৱাহাটীৰ পৰা উজনিমুৱা লাচিত এক্সপ্ৰেছখন মূৰ্কংচেলেক ৰে'ল ষ্টেচনত উপস্থিত হোৱাৰ পাচতে স্বাস্থ্য বিভাগে পৰীক্ষাৰ ব্যৱস্থা কৰে যদিও একাংশ যাত্ৰীয়ে ষ্টেচনৰ পাছফালেৰে পলায়ন কৰে ৷ যাৰ ফলত শংকিত হৈ পৰিছে স্বাস্থ্য বিভাগৰ লগতে জিলা প্ৰশাসন ৷ যি সময়ত ৰাজ্য তথা জিলা প্ৰশাসনে ৰাজ্যবাসীৰ বাবে সজাগ আৰু সচেতনতাৰ আহ্বান জনাইছে তেনে সময়তে যাত্ৰী সকলৰ এনে কাণ্ডই সকলোকে চিন্তিত কৰি তুলিছে ৷
লগতে পঢ়ক: হ'ৰ্চ ট্ৰেডিঙৰ আশংকাত কম্পমান মহাজোঁটঃ অগপৰ আজিজে আজমলক লগ কৰিলে কিয় ?
