স্পৰ্টছ ডেস্ক, ৭ ছেপ্টেম্বৰ: ৰাষ্ট্ৰীয় কিক বক্সিং প্ৰতিযোগিতাত স্বৰ্ণ পদক জয়েৰে সমগ্ৰ অসমলৈ গৌৰৱ কঢ়িয়াই আনিছে ধেমাজিৰ পূজা গগৈ আৰু লক্ষীমাই গগৈয়ে । বহু বাধা নেওচি ৰাষ্ট্ৰীয় প্ৰেক্ষাপটত উজ্বলি উঠিছে কিশোৰী দুগৰাকী । গোৱাত অনুষ্ঠিত হোৱা ৰাষ্ট্ৰীয় কিক বক্সিং প্ৰতিযোগিতাত অসমক প্ৰতিনিধিত্ব কৰিছিল পূজা গগৈ আৰু লক্ষীমাই গগৈয়ে । প্ৰতিযোগিতাত সোণৰ পদক অৰ্জন কৰিবলৈ সক্ষম হৈছে দুয়োগৰাকী প্ৰতিভাৱান খেলুৱৈয়ে ।
ধেমাজিৰ ভিতৰুৱা অঞ্চল উত্তৰ হাতীপৰা আৰু বৰফুকন গাঁৱৰ পৰা গৈ ৰাষ্ট্ৰীয় পৰ্যায়ৰ প্ৰতিযোগিতাত অংশ লৈ পূজা আৰু লক্ষীমায়ে অসমলৈ সুনাম কঢ়িয়াই আনিছে ৷ বক্সাৰ দুগৰাকীয়ে পদক জয় কৰি আহি গৃহভূমিত পদাৰ্পণ কৰাৰ লগে লগে অঞ্চলটোৰ বিভিন্ন দল-সংগঠন আৰু ক্ৰীড়াপ্ৰেমী ৰাইজে উষ্ম আদৰণি জনায় ৷ লগতে দুয়োৰে সাফল্যক লৈ উৎফুল্লিত হৈ পৰে স্থানীয় ৰাইজ ৷ আনহাতে, সন্তানৰ সাফল্যত গৌৰৱান্বিত হৈছে তেওঁলোকৰ পিতৃ-মাতৃয়ে ৷
সোমবাৰে দুয়োকে ফুলাম গামোচা আৰু ফুলৰ থোপাৰে স্থানীয় সংগঠনৰ নেতৃত্বই শুভেচ্ছা জ্ঞাপন কৰে । লগতে অনাগত দিনত খেলুৱৈ দুগৰাকী এই দিশত আগবাঢ়ি যোৱাৰ কামনা কৰে । আনহাতে, খেলুৱৈ দুগৰাকীয়েও সফলতাৰ দিশত এনেদৰেই আগুৱাই যোৱাৰ বাবে প্ৰয়াস অব্যাহত ৰাখিব বুলি জানিবলৈ দিয়ে ।
