চিৰাং, 4 আগষ্ট: ক'ভিড সৃষ্ট পৰিৱেশৰ বাবে এইবাৰ হাইস্কুল শিক্ষান্ত পৰীক্ষা আৰু উচ্চতৰ মাধ্যমিকৰ চূড়ান্ত পৰীক্ষা অনুষ্ঠিত নকৰিলে শিক্ষা বিভাগে ৷ পৰীক্ষা অনুষ্ঠিত নহ’লেও মূল্যায়নৰ ওপৰত ভিত্তি কৰি ইতিমধ্যেই বিভাগে ঘোষণা কৰিছে হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাৰ ফলাফল ৷ কিন্তু এই ফলাফলক লৈ ৰাজ্যজুৰি সৃষ্টি হৈছে আন এক নতুন বিতৰ্কৰ ৷
লগতে পঢ়কঃ উপ-নিৰ্বাচনত বিৰোধী দলসমূহক উমৈহতীয়া প্ৰাৰ্থী দিয়াৰ আহ্বান ৰাইজৰ দলৰ
এইবাৰ ছাত্ৰ-ছাত্ৰীসকলক উত্তীৰ্ণ কৰাৰ নামত একাংশ শিক্ষকৰ বিৰুদ্ধে উৎকোচ গ্ৰহণ কৰাৰ লগতে বিসংগতি কৰাৰ অভিযোগ উত্থাপন হৈছে ৷ ৰাজ্যৰ আন বহু কেইখন জিলাৰ সমান্তৰালকৈ চিৰাঙ জিলাৰ বিজনীতো হাইস্কুল শিক্ষান্ত পৰীক্ষাৰ ফলাফলক লৈ অব্যাহত আছে তীব্ৰ অসন্তুষ্টি ৷ ইয়াৰ মাজতে মঙলবাৰে বিজনীৰ শিশুকল্যাণ উচ্চ মাধ্যমিক বিদ্যালয়ৰ সন্মুখত এক প্ৰতিবাদী কাৰ্যসূচী ৰূপায়ণ কৰে এচএফআইয়ে ৷
ভাৰতৰ ছাত্ৰ ফেডাৰেচনৰ বিজনী আঞ্চলিক কমিটীৰ উদ্যোগত সদ্য ঘোষিত হাইস্কুল শিক্ষান্ত পৰীক্ষাৰ ফলাফল অনুত্তীৰ্ণ হোৱা একাংশ ছাত্ৰ ছাত্ৰীয়ে ৰূপায়ন কৰে এই প্ৰতিবাদী কাৰ্যসূচী ৷ উল্লেখ্য যে, এইবেলি হাইস্কুল শিক্ষান্ত পৰীক্ষাৰ ফলাফলত বিজনী বিদ্যাপীঠ উচ্চতৰ মাধ্যমিক বিদ্যালয়ৰ মুঠ 52 জন ছাত্ৰ ছাত্ৰীৰ ভিতৰত 15 জন ছাত্ৰ ছাত্ৰী অনুত্তীৰ্ণ হৈছে ৷ কিন্তু আচৰিত ধৰণে সকলো ছাত্ৰ ছাত্ৰী কেৱল 1 নম্বৰৰ বাবে অনুত্তীৰ্ণ হৈছে ৷
ইফালে বিজনীৰ শিশু কল্যাণ উচ্চ মাধ্যমিক বিদ্যালয়ৰ 82 জন ছাত্ৰ ছাত্ৰীৰ ভিতৰত 26 জন ছাত্ৰ ছাত্ৰীয়ে 2/3 নম্বৰৰ বাবে অনুত্তীৰ্ণ হৈছে ৷ ছাত্ৰ ছাত্ৰীৰ এই সমস্যাসমূহ ছেবা (SEBA) কৰ্তৃপক্ষই অনুধাৱন কৰি অতিশীঘ্ৰে সমাধানৰ ব্যৱস্থা কৰিবলৈ ভাৰতৰ ছাত্ৰ ফেডাৰেচনৰ বিজনী আঞ্চলিক কমিটীয়ে দাবী জনাইছে ৷ ছাত্ৰ-ছাত্ৰীসকলৰ ভৱিষ্যত সুৰক্ষিত কৰাৰ স্বাৰ্থত যাতে অচিৰেই এক উচিত পদক্ষেপ গ্ৰহণ কৰে তাৰ বাবে স্বাস্থ্য বিভাগক দাবী জনাইছে প্ৰতিবাদকাৰী সকলে ৷
এই প্ৰতিবাদৰ অন্তত বিজনী মহকুমাধিপতিৰ জৰিয়তে ৰাজ্যৰ পৰীক্ষা নিয়ন্ত্ৰক সেৱালৈ এখন স্মাৰক পত্ৰ প্ৰেৰণ কৰে প্ৰতিবাদকাৰী সকলে ৷
লগতে পঢ়কঃ খাদ্যৰ মাজত শিখৰৰ পেকেট...ক’ত কেনেকৈ !
