চিৰাং,25 জুলাই : চিৰাং (Chirang) জিলাৰ ভাৰত-ভূটান সীমান্তৰ লাইমুতি গাঁৱত বাঁহৰ খুটাৰে ধৰা হৈছে বিদ্যুতৰ যোগান ৷ গাঁওখনত প্ৰহশনত পৰিণত হৈছে প্ৰধানমন্ত্ৰীৰ দীনদয়াল উপাধ্যায় গ্ৰাম্য কৌশল যোজনা আঁচনি (Deen Dayal Upadhyaya Grameen Kaushalya Yojana) ৷ গাঁওখনৰ প্ৰায়ভাগ বৈদ্যুতিক খুঁটা (Electric Post)ই বাঁহেৰে নিৰ্মিত ৷ অৰ্থাৎ গাঁওখনত বাঁহৰ খুঁটাৰে বিদ্যুৎ যোগান ধৰিছে বিদ্যুৎ বিভাগ (Power Department)য়ে ৷
এইদৰে বাঁহৰ খুঁটাৰে বিদ্যুৎ সংযোগ কৰাৰ ফলত যিকোনো মূহুৰ্ততে সংঘটিত হ'ব পাৰে ভয়ংকৰ দুৰ্ঘটনা । বিদ্যুৎ বিভাগৰ কোনো লোকেই অঞ্চলটোলৈ নাযায় বুলি গাঁওবাসীয়ে জানিবলৈ দিয়ে । অঞ্চলটোৰ বৈদ্যুতিক কাম-কাজসমূহ বিভাগীয় ঠিকাদাৰেহে চোৱা-চিতা কৰি আহিছে । বাৰিষা বতৰত যিকোনো মূহুৰ্ততে বিদ্যুৎ প্ৰবাহিত হৈ দুৰ্ঘটনা হোৱাৰ সম্ভাৱনা প্ৰকট হৈ পৰিছে ।
ইফালে দৰিদ্ৰ সীমাৰেখাৰ তলৰ শ্ৰেণীৰ লোক বসবাস কৰা এই গাঁওখনৰ সকলো গ্ৰাহকে নিয়মিতভাৱে পৰিশোধ কৰে বিদ্যুতৰ বিল ৷ তাৰপাচতো বিদ্যুৎ বিভাগে এনেধৰণৰ হেমাহি কৰা বুলি অভিযোগ তুলিছে স্থানীয় লোকসকলে । শীঘ্ৰেই বাঁহৰ খুঁটাৰ পৰিৱৰ্তে পকী খুঁটা প্ৰদান কৰাৰ বাবে দাবী উত্থাপন কৰিছে শংকিত ৰাইজে ৷
উল্লেখ্য় যে, অনাদায় বিদ্যুৎ মাছুল পৰিশোধ কৰিবলৈ গ্ৰাহকক বিভিন্ন প্ৰকাৰে বাধ্য কৰিছে বিমল বৰাৰ শক্তি বিভাগে ৷ চৰকাৰ গঠন হোৱাৰ পাচৰ দুমাহত বিদ্যুৎ মাছুল অনাদায় হৈ থকাৰ বাবে বিদ্যুৎ সংযোগ কৰ্তন কৰা হৈছে বহু গ্ৰাহকৰ ঘৰত ৷ মন্ত্ৰীগৰাকীয়ে কাঠ-বাঁহৰ খুঁটা সম্পূৰ্ণৰূপে আঁতৰোৱাৰ বাবে নিৰ্দেশ প্ৰদান কৰিছিল যদিও কাৰ্যতঃ সেই নিৰ্দেশক আওকাণ কৰা পৰিলক্ষিত হৈছে তেওঁৰেই বিভাগীয় কৰ্মচাৰীয়ে ৷
লগতে পঢ়ক : ভাস্কৰ্য শিল্পী জয়চন্দ্ৰ দাস আৰু নাই
