কাছাৰ,19 আগষ্ট: ভাৰতীয় প্ৰতিৰক্ষাত সেৱা আগবঢ়োৱাটো সমগ্ৰ দেশৰ বহুসংখ্যক লোকৰ সপোন ৷ ভাৰতীয় বায়ু সেনা বা আইএএফ হৈছে দেশৰ আটাইতকৈ ডাঙৰ আৰু গৌৰৱান্বিত প্ৰতিষ্ঠানবোৰৰ ভিতৰত এটা ৷ য'ত প্ৰবেশ কৰা লাখ লাখ মানুহে কেৱল সপোন দেখিব পাৰে ৷ এইবাৰ বায়ুসেনাত ফ্লায়িং অফিচাৰ হিচাপে নিৰ্বাচিত হৈ সমগ্ৰ দেশতে অসম তথা বৰাক উপত্যকাৰ নাম উজ্জ্বল কৰিলে কাছাৰ কন্যা মাৰিয়া বেগমে ৷
ভাৰতীয় বায়ু সেনাৰ (IAF) ৰ এগৰাকী উৰণ বিষয়া হিচাপে স্থান লাভ কৰি মাৰিয়াই কেৱল বৰাক উপত্যকাৰ এগৰাকী মহিলা হিচাপেই নহয়, সমগ্ৰ দেশৰ বাবেও এক বিৰল সাফল্য অৰ্জন কৰিছে ৷ মাৰিয়া বেগমৰ জন্ম কাছাৰ জিলাৰ লক্ষীপুৰ বিধানসভা সমষ্টিৰ শিবপুৰ অঞ্চলত ৷ চাৰিজন ভাই-ভনীৰ ভিতৰত তেঁও জ্যেষ্ঠ ৷ মাৰিয়াৰ দেউতাক এজন প্ৰাক্তন সেনাকৰ্মী আছিল, যিয়ে প্ৰাৰম্ভিক পৰ্যায়ৰ পৰাই মাৰিয়াক অনুশাসন আৰু অধ্যাৱসায়ৰ মাজেৰে ডাঙৰ-দীঘল কৰিছিল ৷
উল্লেখ্য যে,মাৰিয়াই শিলচৰৰ গুৰু চৰণ মহাবিদ্যালয়ৰ পৰা পদাৰ্থ বিজ্ঞানত স্নাতক আৰু 2019 চনত শিলচৰৰ অসম বিশ্ববিদ্যালয়ৰ পৰা স্নাতকোত্তৰ ডিগ্ৰী লাভ কৰিছিল ৷ IAF-ত ফ্লায়িং অফিচাৰ হিচাপে যোগ্যতা অৰ্জন কৰিবলৈ তেওঁ প্ৰথমে এ.এফ.চি.এ.টি. পৰীক্ষাত উত্তীৰ্ণ হ'ব লগা হৈছিল ৷ তাৰ পিছত তেঁওক এছ.এছ.বিৰ সাক্ষাৎকাৰৰ বাবে মতা হৈছিল ৷
এছ.এছ.বি পৰীক্ষাৰ অংশটো হৈছে ব্যক্তিত্ব আৰু দক্ষতাৰ 5 দিনীয়া পৰীক্ষা ৷ যাৰ বাবে তেওঁক বাৰাণসীলৈ মাতি অনা হৈছিল ৷ বাৰাণসীৰ বিষয়াসকলক তেওঁৰ প্ৰদৰ্শনেৰে প্ৰভাৱিত কৰাৰ পিছত তেওঁলোকে মাৰিয়াক আইএএফৰ এগৰাকী ফ্লায়িং অফিচাৰ হিচাপে নিৰ্বাচিত কৰিবলৈ পৰামৰ্শ দিছিল ৷ কিন্তু এছ.এছ.বি. সাক্ষাৎকাৰত উত্তীৰ্ণ হোৱাৰ পিছত মাৰিয়াৰ ভাৰতীয় বায়ু সেনাত প্ৰৱেশ কৰাৰ প্ৰচেষ্টাত অন্তিম বাধা আছিল চিকিৎসা পৰীক্ষা ৷
চিকিৎসা পৰীক্ষাৰ অন্তত অৱশেষত বুধবাৰে মেধা তালিকাখন প্ৰকাশ পালে ৷ য'ত স্থান লাভ কৰিলে কাছাৰ কন্যা মাৰিয়া বেগমে ৷ মাৰিয়াৰ এই কৃতিত্বই সমগ্ৰ পৰিয়ালটোক গৌৰৱান্বিত কৰিছে ৷ ইয়াৰ লগে লগে মাৰিয়াই কাছাৰৰ কন্যা হিচাপে ভাৰতৰ অন্যতম প্ৰধান প্ৰতিষ্ঠানত সমগ্ৰ বৰাক উপত্যকাক আকৌ এবাৰ প্ৰাসংগিক কৰি তুলিবলৈ সক্ষম হৈছে ।
