শিলচৰ, 27 ডিচেম্বৰ : অসমৰ পৰা পৃথক হ’ব নেকি বৰাক উপত্যকা ! কোন কোন ৰাজনৈতিক দলৰ নেতাই বৰাক উপত্যকাক অসমৰ পৰা পৃথক কৰাত সাৰ পানী যোগাইছে ! মেঘালয়, মিজোৰাম আৰু ত্ৰিপুৰাৰ একাংশ অঞ্চলক লৈ বৰাক উপত্যকা নামেৰে নতুন ৰাজ্য গঠন হ’ব নেকি ! তাৰে যেন ধূসৰ এখন ছবি প্ৰতিফলিত হৈছে ৷
কাৰণ বৰাকত ক্ৰমান্বয়ে পৃথক বৰাকৰ দাবী তীব্ৰতৰ কৰি তুলিছে বৰাক ডেমক্ৰেটিক ফ্ৰন্ট চমুকৈ বি ডি এফৰ নেতাই প্ৰদীপ দত্ত ৰায়ে ৷ তাৰে অংশ স্বৰূপে ‘‘বৰাক কেতিয়াও অসমৰ অংগ নাছিল, ইংৰাজে কৰিছিল একত্ৰীকৰণ ৷ বঞ্চনাৰ ইতিহাস, অৱহেলা, শোষণ আৰু মুক্তিৰ একমাত্ৰ পথ বৰাক পৃথকীকৰণ ” এই শ্লোগান লিখা বৃহৎ বৃহৎ হৰ্ডিং দেখিবলৈ পোৱা গৈছে বৰাকত ৷ আনহাতে উক্ত হৰ্ডিঙসমূহ আঁৰিছে বৰাক ডেমক্ৰেটিক ফ্ৰন্ট চমুকৈ বি ডি এফে ৷
বিজেপি আৰু কংগ্ৰেছসহ প্ৰায়সংখ্যক ৰাজনৈতিক দল নেতাই পৃথক বৰাক আন্দোলনত সমৰ্থন আছে বুলি দাবী কৰি ৰায়ে কয়, ‘‘বিজেপি আৰু কংগ্ৰেছসহ প্ৰায়সমূহ দলৰ নেতাই পৃথক বৰাক হোৱাটো বিচাৰে ৷ তেওঁলোকে যদিও মুকলিকৈ সমৰ্থন কৰা নাই তথাপিও গোপনে আমাক সহায় কৰি আহিছে ৷’’
পৃথক বৰাকৰ দাবীত গাঁৱে গাঁৱে প্ৰচাৰ চলাব বুলি উল্লেখ কৰি বৰাক ডেমক্ৰিটিক ফ্ৰন্ট তথা বি ডি এফ নেতা ৰায়ে কয়, ‘‘পৃথক বৰাকৰ দাবীত কেন্দ্ৰীয় চৰকাৰক স্মাৰক পত্ৰ দাখিল কৰা হৈছে ৷ তথাপিও কোনো পদক্ষেপ গ্ৰহণ নকৰিলে ৷ সেয়ে বৰাকৰ তিনিখন জিলাত পৃথক বৰাকৰ দাবীত হৰ্ডিং আঁৰি দিয়া হৈছে ৷ যাতে ৰাইজে সজাগ সচেতন হয় ৷ লগতে বৰাক কিয় অসমৰ পৰা পৃথক হ’ব লাগে সেই সন্দৰ্ভত ৰাইজক সজাগ কৰিবলৈ 5 লাখ কিতাপ প্ৰকাশ কৰা হ’ব ৷ সেই কিতাপ লৈ গাঁৱে গাঁৱে প্ৰচাৰ চলোৱা হ’ব ৷’’
লগতে পঢ়ক : শিলচৰৰ ব্যক্তিগত চিকিৎসালয়ত আজৱ কাণ্ড, জন্মৰ কিছু সময়ৰ পিচতে পৰিয়ালক গতালে নৱজাতকৰ মৃতদেহ
