বঙাইগাঁও,25 অক্টোবৰ: বঙাইগাঁৱৰ ঐতিহাসিক শক্তিপীঠ বাঘেশ্বৰী মন্দিৰত অনুষ্ঠিত হৈছে মৃণ্ময় মূৰ্তিবিহিন দুৰ্গা পূজা । প্ৰতিকুল বতৰক নেওচি মহা নৱমীৰ পূজা আগবঢ়াবলৈ শক্তিপীঠখনলৈ বৈছে ভক্তৰ সোঁত । লোকে লোকাৰণ্য হৈ পৰিছে বাঘেশ্বৰী মন্দিৰৰ চৌহদ ৷
প্ৰায় 500 বছৰীয়া পুৰণি বঙাইগাঁৱৰ ঐতিহাসিক শক্তিপীঠখনত প্ৰাচীন পৰম্পৰা অনুসৰি মা দুৰ্গাক আৰাধনা কৰা হয় ৷ পৰম্পৰা অনুসৰি, সপ্তমী, অষ্টমী আৰু নৱমী পূজাৰ পিছত দশমীৰ দিনা মন্দিৰত থকা প্ৰাচীন তৰোৱালখন মন্দিৰৰ সমীপৰ পুখুৰীত ধোৱা হয় । পাঁচদিনীয়া এই পূজাৰ প্ৰতিদিনেই হাঁহ, পাৰ, ছাগলী আদি বলি দিয়াৰ লগতে নৱমীৰ দিনা ম’হ বলি দিয়াৰ পিছত এই কাৰ্যসূচীৰ অন্ত পৰে । অইনবাৰৰ দৰে এইবাৰো দুটাকৈ ম’হ বলি দিয়া হয় বাঘেশ্বৰী মন্দিৰত । নামনি অসমৰ অন্যতম শক্তিপীঠ মা বাঘেশ্বৰী মন্দিৰত প্ৰাচীন পৰম্পৰা অনুকৰণ কৰি দুৰ্গাদেৱীৰ মূৰ্তিৰ সলনি ৰজাদিনীয়া তৰোৱালক পূজা আগবঢ়োৱা হয় ।
কৰ’ণা মহামাৰীৰ আতংকৰ কাৰণে প্ৰশাসনে জাৰি কৰা নিয়ম সূচাৰু ৰূপে পালন কৰি মা দুৰ্গাক আৰাধনা কৰে ভক্তসকলে ৷ বিগত বছৰসমূহৰ তুলনাত এইবেলি ভক্তপ্ৰাণ ৰাইজৰ উপস্থিতি সেৰেঙা দেখা গৈছে শক্তিপীঠখনত ৷
লগতে চাওকঃ ঐক্যৰ বাৰ্তাবাহক বঢ়মপুৰৰ এখন বিশেষ পূজা...
