বৰপেটা ২১ আগষ্ট: সুদীৰ্ঘ ২০ বছৰৰ পিছত আফগানিস্তানত পুনৰ আধিপত্য বিস্তাৰ কৰিছে তালিবানে । অনাগত দিনৰ ভয়াৱহতাৰ কথা ভাৱি শংকিত হৈ পৰিছে দেশখনৰ সাধাৰণ নাগৰিক । লগতে তালিবানৰ উত্থানে চিন্তিত কৰিছে দেশবাসীক । কিন্তু ইয়াৰ মাজতো একাংশ লোকে তালিবান সমৰ্থন জনোৱা দেখা গৈছে ।
তালিবানে আফগানিস্তান দখল কৰাক লৈ আনন্দ প্ৰকাশ কৰি একাংশ লোকে ছ'চিয়েল মিডিয়াযোগে শ্বেয়াৰ কৰিছে বিতৰ্কিত পোষ্ট । অসমতো ফেচবুক, হোৱাটছএপ আদি বিভিন্ন ছ'চিয়েল মিডিয়াযোগে তালিবানৰ সমৰ্থনত বিভিন্নজনে মন্তব্য কৰিছে ৷ বৰপেটাত তালিবানৰ সমৰ্থনত ছ'চিয়েল মিডিয়াযোগে পোষ্ট শ্বেয়াৰ কৰি আটক হ'ল দুজন যুৱক । বৰপেটা আৰক্ষীষে আটক কৰা এই তালিবানী সমৰ্থক দুজন হৈছে মাজিদুল ইছলাম আৰু ফাৰুক হুছেইন খান ৷
২৫ বছৰীয়া মাজিদুল ইছলামৰ ঘৰ কলগাছিয়াৰ বালিকুৰি গাঁৱত ৷ আনহাতে, ফাৰুক হুছেইন খানৰ ঘৰ বৰপেটাৰ চেঙাৰ হাঁহচৰা গাঁৱত ৷ ৩২ বছৰীয়া ফাৰুক হুছেইনেও তালিবানক সমৰ্থন কৰি ফেচবুকত পোষ্ট দিছিল ৷
ইয়াৰ পিছতে বৰপেটা জিলাৰ আৰক্ষী অধীক্ষক অমিতাভ সিনহাৰ নিৰ্দেশমৰ্মে দুয়োগৰাকী তালিবানী সমৰ্থকক গ্ৰেপ্তাৰ কৰে আৰক্ষীয়ে ৷ সম্প্ৰতি দুই তালিবানী সমৰ্থকৰ বিৰুদ্ধে তদন্ত অব্যাহত আছে ৷ বৰ্তমানেও এনে তালিবানী সমৰ্থকৰ বিৰুদ্ধে বৰপেটা আৰক্ষীৰ অভিযান অব্যাহত আছে । উল্লেখ্য যে, শোণিতপুৰ, দৰং আদি জিলাতো তালিবানক সমৰ্থন কৰা লোক আৰক্ষীৰ জালত পৰিছে ।
