জনীয়া, 11 ছেপ্তেম্বৰ: ৰাজ্যৰ বিভিন্ন প্ৰান্তত আদৰ্শ চিকিৎসালয় স্থাপনৰ জৰিয়তে চৰকাৰে চিকিৎসা সেৱাক উন্নীতকৰণৰ ক্ষেত্ৰত বিশেষ গুৰুত্ব প্ৰদান কৰি অহাৰ কথা দাবী সদায়ে কৰি আহিছে । কিন্তু চিকিৎসা সেৱাক উন্নীতকৰণৰ ধাক-ঢোল বজোৱা স্বাস্থ্যখণ্ডৰ আন এখন ছবিহে উদঙাই দিছে জনীয়াৰ ৰাজ্যিক চিকিৎসালয়ৰ চিকিৎসা সেৱাৰ ব্যৱস্থাই (Devastated form of Jania State dispensary) ।
পিছে নামতহে ৰাজ্যিক চিকিৎসালয়, কামত নহয় ৷ চিকিৎসালয়খনত নামত চিকিৎসক আছে ঠিকেই, পাছে এজনো চিকিৎসক উপস্থিতহে নাথাকে চিকিৎসালয়খনত । যাৰ পৰিপেক্ষিতত বৃহত্তৰ অঞ্চলটোৰ ৰাইজে চিকিৎসালয়খনলৈ চিকিৎসা সেৱা গ্ৰহণৰ বাবে আহি উভতি যাব লগাৰ দৰে পৰিস্থিতিও হয় ।
আনকি প্ৰসূতি অথবা জৰুৰীকালিন চিকিৎসাৰ বাবে চিকিৎসালয়খনত নাথাকে কোনো চিকিৎসক (Allegation against doctors of Jania State dispensary) । ফলত চিকিৎসকৰ গাফিলতিৰ বাবে ঘৰুৱা পদ্ধতিৰেই নিজ ঘৰতে সন্তান প্ৰৱস কৰিলে অঞ্চলটোৰ এগৰাকী মহিলাই ।
উল্লেখ্য যে, চিকিৎসালয়ৰ ওচৰতেই চিকিৎসক, নাৰ্ছৰ বাসগৃহ থকা সত্বেও কোনো এজন চিকিৎসক নাৰ্চ স্বাস্থ্যকেন্দ্ৰটোত উপস্থিত নথকাত চিকিৎসালয়খনৰ ফোপোলা স্বৰূপ উদঙাইছে । একমাত্ৰ চিকিৎসক আৰু নাৰ্ছ গৰাকীৰ গাফিলতিৰ বাবেই এনে নাভূত নাশ্ৰুত কাণ্ড সংঘটিত হৈছে বুলি পৰিয়ালৰ লগতে ৰাইজে অভিযোগ উত্থাপন কৰিছে ।
