জনীয়া, 25 জুন : বৰপেটাত বান পৰিস্থিতি কিছু পৰিমাণে উন্নত হৈছে । কিন্তু এতিয়াও পানীত আবদ্ধ হৈ আছে হেজাৰ হেজাৰ পৰিয়াল । বৰপেটা জিলাৰ বাঘবৰ সমষ্টিৰ সত্ৰকনৰা ১৫ নং ছিটৰ মিলিজুলি পাৰঘাট বজাৰত গৰাখহনীয়াত গৃহহীন হৈছে প্ৰায় ৩৭ টা পৰিয়াল । ভেলেঙী নৈৰ কোৱাল সোঁত আৰু বানত বিগত তিনিদিনত নৈখনৰ গৰাখহনীয়াৰ ফলত ৩৭ টা পৰিয়ালৰ মাটি-ভেঁটি নৈৰ বুকুত জাহ গৈছে(Bhelengi river erosion at Jania) ।
বান আৰু গৰাখহনীয়াত সকলো হেৰুৱাই এতিয়া ভোকে-অনাহাৰে পথৰ ওপৰত আশ্ৰয় লৈছে এইসকল লোকে । অন্ন আৰু বাসস্থানৰ বাবে হাহাকাৰ কৰিব লগা হৈছে ভুক্তভোগী ৰাইজে । এই ক্ষেত্ৰত ভুক্তভোগী দুৰ্ভগীয়া ৰাইজে স্থানীয় প্ৰশাসন আৰু বিধায়ক শ্বেৰমান আলীক অৱগত কৰাৰ পিছতো তেওঁলোকে খবৰ ল’বলৈ অহা নাই বুলি অভিযোগ কৰিছে ৰাইজে ।
আহিম আহিম বুলিকৈ মিলিজুলি পাৰঘাটৰ খহনীয়াগ্ৰস্ত লোকৰ দুখ দুৰ্দশাৰ খবৰ ল’বলৈ সময় নোপোৱা বাঘবৰৰ বিধায়ক শ্বেৰমান আলী আহমেদৰ বিৰুদ্ধে শুকুৰবাৰে সোঁচ্চাৰ হৈ পৰে বানাক্ৰান্ত ৰাইজ ৷ বিধায়কগৰাকীৰ ভূমিকাক তীব্ৰ ভাষাৰে সমালোচনা কৰে ভুক্তভোগী ৰাইজে । অতি সোনকালে বান আৰু খহনীয়াত আক্ৰান্তসকলক খাদ্য সামগ্ৰী, বিশুদ্ধ খোৱাপানী আৰু শৌচালয়ৰ ব্যৱস্থা কৰিবলৈ দাবীও উত্থাপন কৰে তেওঁলোকে ।
লগতে পঢ়ক : Assam Floods: মুখ্যমন্ত্ৰীৰ সাহায্য পুঁজিলৈ মুকেশ আম্বানীৰ 25 কোটি টকা
