জনীয়া, 16 আগষ্ট : কলগাছিয়াত অব্যাহত আছে বেকী নৈৰ গৰাখহনীয়া ৷ কলগাছিয়া ৰাজহ চক্ৰৰ অন্তৰ্গত চিকনী আৰু জাউৰীমাৰী গাঁৱত এইবাৰ আৰম্ভ হৈছে বেকী নৈৰ বিধ্বংসী গৰাখহনীয়া । চপৰা চপৰে খহিছে নৈ পৰীয়া ৰাইজৰ ভেটি মাটি । তিনি ঘন্টাৰ ভিতৰত নৈৰ বুকুত জাহ গ’ল প্ৰায় তিনিটাকৈ পৰিয়ালৰ বাসগৃহ ।
চিকনী আৰু জাউৰীমাৰী গাঁৱৰ খহনীয়াগ্ৰস্তই ঘৰ দুৱাৰ হেৰুৱাই এতিয়া কান্দোনত ভাগি পৰিছে ৷ পথৰ ভিক্ষাৰীত পৰিণত হৈছে বহু পৰিয়াল । আনহাতে আন একাংশ লোকে নিজৰ ঘৰ দুৱাৰ ভাঙি লৈ নিৰাপদ স্থানলৈ ঢাপলি মেলিছে ৷ ইয়াৰ পাছতো ভুক্তভোগীৰ খবৰ ল’বলৈ আহৰি পোৱা নাই জন প্ৰতিনিধিয়ে ৷
গৰাখহনীয়া প্ৰতিৰোধ কৰিবলৈ চৰকাৰক কাতৰ আহ্বান জনাইছে খহনীয়াগ্ৰস্ত ৰাইজে । প্ৰশাসনে শীঘ্ৰে খহনীয়া প্ৰতিৰোধৰ ব্যৱস্থা নকৰিলে, অঞ্চলটোৰ শতাধিক পৰিয়ালৰ বাসগৃহৰ লগতে শিক্ষানুষ্ঠান, জাউৰীমাৰী বজাৰ, গড়কাপ্তানি পথ আদি নৈৰ বুকুত জাহ যোৱাৰ আশংকা কৰিছে ৰাইজে ।
লগতে পঢ়ক : প্ৰাক্তন সাংসদ সুস্মিতা দেৱৰ দল ত্যাগ, শীঘ্ৰেই তৃণমূললৈ
