বৰমা,১৯ জুন: বাক্সা জিলাৰ উচ্চ শিক্ষাৰ আগশাৰীৰ শিক্ষানুষ্ঠান বৰমা মহাবিদ্যালয়ত মঙলবাৰে শাৰিৰীক ভাৱে সক্ষম লোকক বিনামূলীয়াকৈ সামগ্ৰী বিতৰণ কৰা হয় । বৰমা মহাবিদ্যালয়ৰ I QAC উদ্যোগত আৰু ALIMCO, MVSS( জয়পুৰ ফুট),NCSC তথা বিজনী মহাবিদ্যালয়ৰ সহযোগত সামগ্ৰী বিতৰণী সভাখন অনুষ্ঠিত কৰা হয় ।
বৰমা মহাবিদ্যালয়ৰ IQACৰ সমন্বয়ক আবুল ফাইজে আগবঢ়োৱা অনুষ্ঠানখনত বৰমা ৰাজহ চক্ৰৰ অতিৰিক্ত ৰাজহ বিষয়া মৃনাল হালৈ,NCSCৰ বিষয়া দুলাল ৰিৱাৰী, ALIMCOৰ বিষয়া পি.চাহুকে আদি কৰি কেইবাগৰাকীও বিশিষ্ট ব্যক্তি উপস্থিত থাকে । বৰমা মহাবিদ্যালয়ৰ অধ্যক্ষ ড0 টিকেন চন্দ্ৰ দাসে এই সভাখন উদ্ধোধন কৰে । সভাখনত বি.টি.চিৰ উপ-মুখ্য কাৰ্যবাহী তথা শিক্ষা বিভাগৰ কাৰ্যবাহী সদস্য খাম্ফা বৰগঞাৰীয়ে মুখ্য অতিথিৰূপে উপস্থিত থাকি বিশেষভাৱে সক্ষম লোকসকলক উদ্দেশ্যি ভাষণ আগবঢ়ায়। কেন্দ্ৰ আৰু ৰাজ্য চৰকাৰে কৰ্কট ৰোগ,বৃক্ক,হৃদ আদি ৰোগত আক্ৰান্ত ব্যক্তিসকলৰ বাবে কি কি আঁচনি গ্ৰহণ কৰিছে তাৰ বিষয়েও তেওঁ ভাষণত ব্যক্ত কৰে । ইপিনে সভাখনত বি.টি.চি. চৰকাৰৰ আন এগৰাকী কাৰ্যবাহী সদস্য অনচুমৈ খুংগুৰ বড়োৱে বিশিষ্ট অতিথি ৰূপে উপস্থিত থাকি বিনামূলীয়াকৈ সামগ্ৰী যোগান ধৰা সংস্থা এলিমকো আৰু জয়পুৰ ফুটক ধন্যবাদ জনাই পৰৱৰ্তী সময়ত এনেকুৱা ধৰণৰ কাৰ্যসূচী ল'লে বিশেষভাৱে সক্ষম লোকসকল যথেষ্ট উপকৃত হ'ব বুলি কয় । এই সামগ্ৰী বিতৰণী সভাখনত শতাধিক শাৰিৰীক ভাৱে সক্ষম লোকক হুইল চেয়াৰ,ট্ৰাইচাইকল,ৱাকিং ষ্টিক,স্মাৰ্ট ফোন,চেল ফোন,হিয়াৰিং এইড আদি বিনামূলীয়াকৈ যোগান ধৰা হয়।
