নিউজ ডেস্ক, 6 ছেপ্টেম্বৰ : কৰ’ণা মহামাৰীৰ আৰম্ভণিৰ পৰাই বহু উৰাবাতৰি দ্ৰুতগতিত বিয়পিবলৈ যিধৰণে আৰম্ভ কৰিছিল, বৰ্তমানেও সেই ধাৰা অব্যাহাত আছে । প্ৰায় প্ৰতি দিনেই কৰ’ণা ভাইৰাছৰ বিষয়ে ভুল তথ্য অথবা ইয়াৰ ভেকছিনৰ বিৰুদ্ধে উৰাবাতৰি ছ'চিয়েল মিডিয়াত শ্বেয়াৰ কৰা হৈছে । ফেচবুক, টুইটাৰ আৰু গুগলৰ দৰে প্ৰসিদ্ধ কোম্পেনী সমূহেও এই ভুৱা তথ্যৰ বিৰুদ্ধে যুঁজিবলৈ নিৰন্তৰ প্ৰচেষ্টা চলাই আছে ৷
কিন্তু এতিয়াও সেইয়া সম্পূৰ্ণৰূপে বন্ধ হোৱা নাই ৷ সম্প্ৰতি ফেচবুকে বহু এনে ফেচবুক পেজ বন্ধ কৰিছে, যিয়ে কৰ’ণা ভেকছিনৰ বিষয়ে মিছা তথ্য শ্বেয়াৰ কৰে । মাত্ৰ কেইদিনমান আগতে, আমেৰিকা যুক্তৰাষ্ট্ৰৰ ৰাষ্ট্ৰপতি জো বিডেনে ইউটিউব, টুইটাৰ, ফেচবুক আৰু গুগলৰ দৰে কোম্পানীবোৰক কৰ’ণাৰ ভুল তথ্য বিয়পাটো বন্ধ কৰিবলৈ আহ্বান জনাইছিল ৷
শেহতীয়াকৈ, চেণ্টাৰ ফৰ কাউণ্টাৰিং ডিজিটেল হেট ( Center for Countering Digital Hate)য়ে 12 টা এনে ফেচবুক পেজ চিনাক্ত কৰিছিল, যিবোৰে ভেকছিনৰ বিষয়ে নিৰন্তৰভাৱে ভুল আৰু মিছা তথ্য শ্বেয়াৰ কৰি আহিছিল । CCDHৰ প্ৰতিবেদনটোৰ পিছতে ফেচবুকে জনাইছিল যে, ভেকছিনৰ বিষয়ে বিভ্ৰান্তিকৰ তথ্য শ্বেয়াৰ কৰা তিনি ডজন পেজ ইতিমধ্যে ফেচবুকৰ তৰফৰ পৰা বন্ধ কৰা হৈছে ।
উল্লেখযোগ্য যে, ইয়াৰে কিছুমান একাউণ্ট ইনষ্টাগ্ৰামৰ পৰাও আছিল । ফেচবুকৰ মতে, এই তিনি ডজন পেজ 12 জন লোকে পৰিচালনা কৰিছিল, যাৰ বিৰুদ্ধে সম্প্ৰতি ব্যৱস্থা গ্ৰহণ কৰা হৈছে । শেহতীয়াকৈ, ভেকছিনৰ বিষয়ে ছ'চিয়েল মিডিয়াত বহু ভুৱা তথ্য সম্বলিত পোষ্ট শ্বেয়াৰ কৰা হৈছিল ৷ এনেকুৱা এটা পোষ্টত দাবী কৰা হৈছিল যে, ক’ভিডৰ ভেকছিনে মহিলাৰ প্ৰজনন ক্ষমতাক ক্ষতিগ্ৰস্ত কৰে ।
লগতে পঢ়ক : অৱশেষত ভাৰতলৈ উভতি আহিব ছলমান ৰুশ্বদী
