তেজপুৰ, 22 ছেপ্তেম্বৰ : মঙলবাৰে টাৱাংবাসীৰ দ্বাৰা আয়োজিত এক অনুষ্ঠানত উপস্থিত থাকে অৰুণাচলৰ মুখ্যমন্ত্ৰী পেমা খাণ্ডু ৷ পুৱাৰ ভাগত সীমান্ত পৰিদৰ্শন কৰি বিজয় শিখাক এছিয়াৰ প্ৰসিদ্ধ বুদ্ধ প্ৰতিমূৰ্তি টাৱাং মঠ আৰু মঞ্জুশ্ৰী বিদ্যাপীঠৰ অন্তৰ্ভুক্ত কৰিবলৈ চহৰখনৰ এটা শিখৰলৈ লৈ যোৱা হৈছিল ৷ প্ৰসিদ্ধ টাৱাং মঠত বিজয় শিখাক ৰিনপোচে আৰু বুদ্ধ সন্ন্যাসীসকলে আশীৰ্বাদ কৰা দৃশ্য পৰিলক্ষিত হয় ৷
চহৰখনৰ মাজেৰে পৰিভ্ৰমণ কৰাৰ পিছত স্বৰ্ণিম বিজয় শিখাক মঞ্জুশ্ৰী বিদ্যাপীঠলৈ লৈ যোৱা হয় ৷ মঞ্জুশ্ৰী বিদ্যাপীঠত শিক্ষাৰ্থীসকলে চিত্ৰৰ জৰিয়তে তেওঁলোকৰ সৃষ্টিশীলতা প্ৰদৰ্শন কৰে ৷ এই প্ৰদৰ্শনী সকলোৰে বাবে মুকলি আছিল ৷
আনহাতে, টাৱাং ষ্টেডিয়ামত দিনযোৰা কাৰ্যসূচীৰে কেইবাটাও স্মাৰক অনুষ্ঠানৰ আয়োজন কৰা হয় ৷ য'ত টাৱাং চহৰ আৰু কাষৰীয়া অঞ্চলৰ বহুসংখ্যক লোকে অতি উৎসাহেৰে অংশগ্ৰহণ কৰে ৷
উক্ত অনুষ্ঠানত শতাধিক ছাত্ৰ-ছাত্ৰী, স্থানীয় সাংস্কৃতিক দল আৰু সেনাৰ তৰফৰ পৰা কেইবাটাও সাংস্কৃতিক অনুষ্ঠান প্ৰদৰ্শন কৰা হয় ৷ দেশৰ সুৰক্ষা আৰু নিৰাপত্তাৰ ক্ষেত্ৰত তেওঁলোকে আগবঢ়োৱা অৱদানৰ বাবে প্ৰাক্তন সৈনিক, বীৰাংগনাসকলক সম্বৰ্ধনা জনোৱা হয় ৷
অনুষ্ঠানত ভাষণ প্ৰদান কৰি ভাৰতীয় সেনাৰ পঞ্চম মাউণ্টেইন ডিভিজনৰ জেনেৰেল অফিচাৰ কমাণ্ডিং আৰু মুখ্যমন্ত্ৰীয়ে সশস্ত্ৰ বাহিনীৰ শ্বহীদসকলক শ্ৰদ্ধাঞ্জলি জ্ঞাপন কৰে ৷ লগতে ১৯৭১ চনৰ ভাৰত-পাক যুদ্ধৰ 'স্বৰ্ণিম বিজয় বৰ্ষ'ৰ তাৎপৰ্য বিশ্লেষণ কৰে ৷
লগতে পঢ়ক : Operation মাটিৰ দালাল : একে নিশাই গ্ৰেপ্তাৰ ৪৫৩ জন মাটিৰ দালাল
