গুৱাহাটী,৩০ ছেপ্টেম্বৰ: ৰাজ্যত এতিয়া ক্ৰিকেটৰ জ্বৰ । কাৰণ গুৱাহাটী মহানগৰীত এতিয়া তাৰকা খেলুৱৈৰ সমাৱেশ । গুৱাহাটীৰ বৰ্ষাপাৰা ষ্টেডিয়ামত ২ অক্টোবৰত অনুষ্ঠিত হ'ব ভাৰত আৰু দক্ষিণ আফ্ৰিকাৰ মাজত আন্তঃৰাষ্ট্ৰীয় টী-২০ ক্ৰিকেট খেল (India And South Africa's T20 Squad) । খেলখনৰ বাবে দুয়োটা দল বৃহস্পতিবাৰে বিয়লি গুৱাহাটীত আহি উপস্থিত হয় ।
কটকটীয়া নিৰাপত্তাৰ মাজত ক্রিকেটাৰসকলক ৰখা হৈছে হোটেল ৰেডিশ্যন ব্লুত(Radisson Blu Hotel Guwahati) । শুকুৰবাৰে দুয়োটা দলে অসম ক্ৰিকেট সন্থাৰ বৰ্ষাপাৰা ষ্টেডিয়ামত অনুশীলন চলায় । নেট অনুশীলনৰ মাজতে খেলুৱৈসকলে অনুৰাগীৰ ওচৰলৈ আহি চেলফি তোলা পৰিলক্ষিত হয় । শনিবাৰেও দুয়োটা দলে নেট অনুশীলন চলাব ।
ইফালে আজি অনুশীলনৰ বাবে অহা খেলুৱৈসকলক প্ৰত্যক্ষ কৰাৰ বাবে ষ্টেডিয়ামৰ সমীপত সমৱেত হয় হাজাৰ হাজাৰ ক্ৰিকেটপ্ৰেমীৰ । এক কথাত ক্ৰিকেট জ্বৰত আক্ৰান্ত হৈছে ক্ৰিকেটপ্ৰেমী । অপেক্ষা মাথো ২ অক্টোবৰলৈ । ২ অক্টোবৰৰ গুৱাহাটীৰ টী-২০ ক্ৰিকেট ভাৰত আৰু দক্ষিণ আফ্ৰিকাৰ মাজৰ খেলৰ বাবে মেচ ৰেফাৰীৰ দায়িত্বত আছে টীম ইণ্ডিয়াৰ প্ৰাক্তন পেচ বলাৰ জভাগল শ্ৰীনাথ ।
খেলখনৰ সফল আয়োজনৰ বাবে সাজু অসম ক্ৰিকেট সন্থা । ২ অক্টোবৰত শৃংখলাৰ দ্বিতীয়খন টী-২০ খেল ভাৰত আৰু আলহী দল দক্ষিণ আফ্ৰিকাৰ মাজত অনুষ্ঠিত হ'ব (India And South Africa’s T20 match) । আঢ়ৈ বছৰৰ মূৰত গুৱাহাটীত অনুষ্ঠিত হ'বলগীয়া আন্তঃৰাষ্ট্ৰীয় টী-২০ খেলখন প্ৰায় ৪১ হাজাৰ দৰ্শকে প্ৰত্যক্ষ কৰিব ।
লগতে পঢ়ক: মহানগৰীত ক্ৰিকেটৰ জ্বৰ: গুৱাহাটী পালেহি ভাৰত আৰু দক্ষিণ আফ্ৰিকাৰ ক্ৰিকেট দল
