গুৱাহাটী, 23 এপ্ৰিল : শিশু অপহৰণৰ লগত জড়িত হোৱাৰ অভিযোগ থকা এগৰাকী মহিলাৰ ফটো ৰাজহুৱা কৰিছে মহানগৰ আৰক্ষীয়ে (Guwahati police reveled photo of child kidnapper women) । শনিবাৰে গুৱাহাটীত এক সংবাদমেল সম্বোধন কৰি অপৰাধ শাখাৰ অতিৰিক্ত উপ আৰক্ষী আয়ুক্ত নোমল মাহাত্তাই মহিলাগৰাকীৰ ফটোখন ৰাজহুৱা কৰে । তেওঁ কয় যে, ১৩ এপ্ৰিলৰ কাহিলি পুৱাতে জিএমচিএইচৰ পৰা অন্তৰ্ধান হোৱা এটা শিশুৰ উদ্ধাৰৰ বাবে অভিযান চলাই থকা হৈছে (Rescue mission for child missing from GMC) ।
যিগৰাকী মহিলাই এই ঘটনা সংঘটিত কৰিছে তেওঁ নলবাৰী বা বৰপেটাৰ ওচৰ পাজৰৰে হ’ব বুলিও সদৰি কৰিছে শীৰ্ষ আৰক্ষী বিষয়া গৰাকীয়ে । তেওঁ জানিবলৈ দিয়ে যে, মহিলাগৰাকীৰ এখন ফটোগ্ৰাফ আৰক্ষীৰ হাতত আছে (Photograph of child kidnapper) ৷ এই ফটোখন প্ৰচাৰ কৰি মহিলাগৰাকীৰ সন্ধান উলিয়াবলৈ চেষ্টা কৰা হৈছে । মহিলাগৰাকী GMC ৰ ওলাই কোন দিশে ক’লৈকে গৈছে ক্ৰাইম ব্ৰাঞ্চৰ হাতত কিছু তথ্য আছে বুলিও জানিবলৈ দিয়ে বিষয়া গৰাকীয়ে ।
তেওঁ জানিবলৈ দিয়ে যে, শিশুটিক উদ্ধাৰৰ বাবে ঘটনাটোৰ ওপৰত মুকলিকৈ অনুসন্ধান চলোৱা হৈছে । ইপিনে, এই ক্ষেত্ৰত তদন্তৰ কিছু অগ্ৰগতিও লাভ কৰিছে আৰক্ষীয়ে ৷ ইয়াৰোপৰি, বিশেষ ফটোখন বহুলভাৱে প্ৰচাৰ কৰিলে হয়টো মহিলাগৰাকীৰ সন্ধান অতি শীঘ্ৰে পাবলৈ সক্ষম হ’ব বুলি মন্তব্য কৰে অপৰাধ শাখাৰ অতিৰিক্ত উপ আৰক্ষী আয়ুক্ত গৰাকীয়ে ৷
উল্লেখ্য যে, বৃক্ক ৰোগত আক্ৰান্ত শিশুটিক যোৱা ২৪মাৰ্চত ভৰ্তি কৰোৱা হৈছিল গুৱাহাটী চিকিৎসা মহাবিদ্যালয় হাস্পতালত । চিকিৎসালয়খনৰ শিশু ৱাৰ্ডত চিকিৎসাধীন হৈ আছিল কামৰূপ গ্ৰাম্য জিলাৰ হাজো কলিতাকুছিৰ নৱ কলিতা আৰু বিজুমণি দাসৰ ৭ মহীয়া সন্তান প্ৰিয়ম কলিতা । পিতৃৰ কোলাৰ পৰা শিশুটিক নিচুকোৱাৰ চলেৰে লৈ গৈ এতিয়া অন্তৰ্ধান হৈ আছে মহিলাগৰাকী ।
লগতে পঢ়ক : হনি ট্ৰেপিঙত জড়িতৰ অভিযোগত গ্ৰেপ্তাৰ অসম জাতীয় পৰিষদৰ নেতা
