নেশ্যনেল ডেস্ক, ৭ ছেপ্তেম্বৰ : ত্ৰিপুৰা প্ৰদেশ যুৱ কংগ্ৰেছৰ সভাপতিক দুৰ্বৃত্তই আক্ৰমণ কৰাৰ ঘটনাৰ উচিত তদন্তৰ দাবীত প্ৰতিবাদত নামিছে যুৱ কংগ্ৰেছৰ কৰ্মকৰ্তাই । দেওবাৰে যুৱ কংগ্ৰেছৰ কৰ্মকৰ্তাই আৰক্ষীৰ মুখ্য কাৰ্যালয় ঘেৰাও কৰে । ২৪ ঘণ্টাৰ ভিতৰত অভিযুক্তক গ্ৰেপ্তাৰ কৰাৰ দাবী জনায় যুৱ কংগ্ৰেছৰ কৰ্মকৰ্তাসকলে ।
উল্লেখ্য যে, কেইদিনমান পূৰ্বে দলীয় সভাত অংশগ্ৰহণৰ বাবে ত্ৰিপুৰাৰ চেপাহিজালা জিলাৰ সোণামুৰালৈ যোৱাৰ সময়ত ত্ৰিপুৰা যুৱ কংগ্ৰেছৰ সভাপতি পূজন বিশ্বাস অস্ত্ৰধাৰী দুৰ্বৃত্তৰ আক্ৰমণৰ বলি হৈছিল । কিন্তু সৌভাগ্যক্ৰমে তেওঁৰ জীৱন ৰক্ষা পৰিছিল আৰু আগৰতলাত আহি উপস্থিত হৈছিল ।
এই ঘটনাক লৈ তীব্ৰ প্ৰতিক্ৰিয়াৰ সৃষ্টি হৈছে । যুৱ কংগ্ৰেছৰ সভাপতিগৰাকীৰ আক্ৰমণৰ ঘটনাৰে জড়িত লোকসকলক ২৪ ঘণ্টাৰ ভিতৰত গ্ৰেপ্তাৰ কৰাৰ দাবী জনাই দেওবাৰে যুৱ কংগ্ৰেছৰ কৰ্মকৰ্তাই আৰক্ষীৰ মুখ্য কাৰ্যালয় ঘেৰাও কৰে । এই ঘটনাৰ আঁৰত কোন লোক জড়িত হৈ আছে, সেয়া পোহৰলৈ অহাটো বিচাৰিছে যুৱ কংগ্ৰেছে ।
তেওঁলোকে জনোৱা মতে, তেওঁলোকে টেলিফোন ৰেকৰ্ডিং সংগ্ৰহ কৰিছে । এই ৰেকৰ্ডিঙৰ পৰা প্ৰমাণিত হয় যে, এই ঘটনাৰ সৈতে ত্ৰিপুৰাৰ উনাকোটি জিলাৰ কৈলাশহৰৰ বাসিন্দা বাছিম মিয়া জড়িত হৈ আছে । লগতে হত্যাৰ উদ্দেশ্যেৰে পূজন বিশ্বাসক আক্ৰমণ কৰা হৈছিল বুলি অভিযোগ তুলিছে যুৱ কংগ্ৰেছৰ কৰ্মকৰ্তাসকলে ।
যুৱ কংগ্ৰেছৰ লগত থকা সকলো প্ৰমাণ আৰক্ষীক দাখিল কৰা হৈছে বুলি কৰ্মকৰ্তাসকলে জানিবলৈ দিছে । লগতে এইক্ষেত্ৰত তাৎক্ষণিক পদক্ষেপ ল'বলৈ যুৱ কংগ্ৰেছে আৰক্ষীক আহ্বান জনাইছে । আনহাতে, এই বিষয়ত যুৱ কংগ্ৰেছৰ সভাপতি পূজন বিশ্বাসে কয় যে, ৰাজ্যখনত আইন-শৃংখলা পৰিস্থিতিৰ অৱনতি ঘটিছে আৰু চৰকাৰে এই ক্ষেত্ৰত ব্যৱস্থা লোৱা উচিত ৷
ইফালে ত্ৰিপুৰা প্ৰদেশ যুৱ কংগ্ৰেছৰ উপ-সভাপতি প্ৰসেনজিৎ দাসে কয় যে, ৰাজ্যখনত কংগ্ৰেছ দলৰ নেতাসকল সুৰক্ষিত নহয় । তেওঁ লগতে কয় যে, যুৱ কংগ্ৰেছৰ নেতাসকলে এই বিষয়ত আৰক্ষীৰ সৈতে আলোচনা কৰিবলৈ আহিছিল যদিও আৰক্ষীয়ে কথা পাতিবলৈ কোনো আগ্ৰহ প্ৰকাশ কৰা নাছিল । এই সন্দৰ্ভত তেওঁলোকৰ ফালৰ পৰা আৰক্ষীক এখন স্মাৰক পত্ৰ প্ৰদান কৰা হৈছে বুলি প্ৰসেনজিৎ দাসে জানিবলৈ দিয়ে ।
লগতে পঢ়ক: ড্ৰাগছ ব্যৱসায়ীয়ে যোগদান কৰিছে তৃণমূল কংগ্ৰেছতঃ বিপ্লৱ কুমাৰ দেৱ
