নেশ্যনেল ডেস্ক, 19 জুলাই: সাম্প্ৰদায়িক সংঘৰ্ষত জৰ্জৰিত মণিপুৰত ভূলুণ্ঠিত হৈছে মানৱতা ৷ কুকি আৰু মেইটেইসকলৰ মাজত অব্যাহত থকা সংঘৰ্ষৰ মাজতে মণিপুৰত সংঘটিত হোৱা এক অতি নিকৃষ্ট ঘটনা পোহৰলৈ আহিছে ৷ যি ঘটনাই স্বাভাৱিকতেই লজ্জানত কৰিব এখন সভ্য সমাজক ৷
শেহতীয়াকৈ ভাইৰেল হোৱা এটা ভিডিঅ’ত দেখিবলৈ পোৱা গৈছে এক শিহৰণকাৰী দৃশ্য ৷ য’ত মানৱৰূপী এদল পশুতকৈও নিকৃষ্ট লোকে এগৰাকী মহিলাক উলংগ কৰি সমদল উলিওৱা দেখিবলৈ পোৱা গৈছে ৷ জানিব পৰা মতে ভিডিঅ’টোত দেখা পোৱা মহিলাগৰাকী এগৰাকী 21 বছৰীয়া কুকি যুৱতী ৷ যুৱতীগৰাকীক ধৰ্ষণ কৰাৰ পাচত বস্ত্ৰ পৰিধান কৰিলে হত্যা কৰাৰ ভাবুকি প্ৰদান কৰি এদল পাষাণ লোকে ৰেলী কৰি লৈ আহে ৷
ইতিমধ্যেই বিভিন্ন সংবাদমাধ্যমত সম্প্ৰচাৰ হৈছে এই বাতৰি ৷ প্ৰাপ্ত তথ্য অনুসৰি 4 মে’ তাৰিখে অৰ্থাৎ মণিপুৰত কুকি আৰু মেইটেইসকলৰ মাজত হিংসা আৰম্ভ হোৱাৰ এদিন পাচত সংঘটিত হৈছিল এই ঘটনা ৷ অৱশ্যে এতিয়াহে পোহৰলৈ আহিছে এই তথ্য ৷ যি এতিয়াই দেশজুৰি সৃষ্টি কৰিছে তীব্ৰ চাঞ্চল্য ৷
এটা ৰাষ্ট্ৰীয় সংবাদ মাধ্যমত প্ৰকাশ পোৱা বাতৰি অনুসৰি কাংপোকপি জিলাৰ চাইকুল আৰক্ষী থানাত এগৰাকী মহিলাক দলবদ্ধ ধৰ্ষণ কৰাৰ অভিযোগত এক গোচৰ ৰুজু হৈছিল ৷ অৱশ্যে এই ঘটনা সন্দৰ্ভত এতিয়াও বিতং তথ্য পোহৰলৈ অহা নাই ৷
উল্লেখ্য যে বিগত 3 মে’ৰ পৰা উত্তৰ-পূবৰ পাহাৰীয়া ৰাজ্যখনত সংঘটিত হৈছে সাম্প্ৰদায়িক সংঘৰ্ষ ৷ কুকি আৰু মেইটেইসকলৰ মাজত হোৱা সংঘৰ্ষত বৰ্তমানলৈকে দেৰ শতাধিক লোক নিহত হৈছে ৷ দুমাহতকৈ অধিক দিন পাৰ হোৱাৰ পাচতো ৰাজ্যখনলৈ ঘূৰি অহা নাই শান্তি ৷
