ভাৰতৰ নতুন মানচিত্ৰক লৈ নেপালত উত্তেজনা !

ভাৰতৰ নতুন মানচিত্ৰকলৈ অসন্তুষ্টি নেপালত ৷ নেপালৰ বৈদেশিক মন্ত্ৰণালয়ে স্পষ্ট কৰে যে কালাপানী নেপালৰ এটি অংশ ৷ আনহাতে ভাৰতৰ গৃহবিভাগৰ দাবী নতুন মানচিত্ৰত নেপালৰ সৈতে কোনো ধৰণৰ সীমা মীমাংসা হোৱা নাই ৷

স্মিতা শৰ্মা

নিউজ ডেস্ক, 7 নৱেম্বৰঃ বিগত 5 আগষ্টত জম্মু-কাশ্মীৰৰ পৰা অনুচ্ছেদ 370 প্ৰত্যাহাৰৰ পাচতেই 3 নৱেম্বৰত কেন্দ্ৰীয় গৃহ মন্ত্ৰাণালয়ে প্ৰকাশ কৰে এখন নতুন মানচিত্ৰ ৷ গৃহ মন্ত্ৰাণালয়ে প্ৰকাশ কৰা নতুন মানচিত্ৰখনত নেপালৰ কালাপানী আৰু লিপু অঞ্চলত ভাৰতৰ সীমান্তত সন্নিবিষ্ট কৰা হয় ৷ ইয়াৰ পাচতেই বিষয়টোৱে চ'চিয়েল মিডিয়াৰ যোগেদি তীব্ৰ প্ৰতিক্ৰিয়াৰ সৃষ্টি কৰে ৷ নেপালৰ বৈদেশিক মন্ত্ৰাণালয়ে স্পষ্ট কৰে যে ,কালাপানী নেপালৰ এটি অংশ ৷ দুয়োখন দেশৰ বৈদেশিক সচিবে বিষয়টোক তৎপৰতাৰে গ্ৰহণ কৰিছে ৷ অতি সোনকালে সমস্যাটোৰ সমাধান কৰা হ'ব ৷ নেপাল নিজৰ আন্তঃৰাষ্ট্ৰীয় সীমান্ত সুৰক্ষাৰ ক্ষেত্ৰত প্ৰতিজ্ঞাবদ্ধ ৷ সীমান্তকলৈ সৃষ্টি হোৱা এই সমস্যা দুয়োখন দেশৰ কুটনৈতিক পৰ্যায়ৰ বৈঠকৰ মাজৰে সমাধান কৰা হ'ব বুলিও সদৰী কৰে নেপালৰ বৈদেশিক মন্ত্ৰাণালয়ে ৷

ভাৰতৰ নতুন মানচিত্ৰ

অৱশ্যে বৃহস্পতিবাৰে নতুন দিল্লীয়ে নেপালৰ অভিযোগ নস্যাৎ কৰাৰ লগতে নতুন মানচিত্ৰখনক সম্পূৰ্ণ শুদ্ধ বুলি কয় ৷ লগতে কেন্দ্ৰীয় গৃহমন্ত্ৰণালয়ে কয় যে, নতুনকৈ প্ৰকাশ কৰা মানচিত্ৰখনত ভাৰতৰ সাৰ্বভৌমত্ব আৰু অখণ্ডতা ৰক্ষা কৰা হৈছে ৷ নতুন মানচিত্ৰত নেপালৰ সৈতে কোনো ধৰণৰ সীমা মীমাংসা হোৱা নাই বুলিও সদৰী কৰে গৃহমন্ত্ৰণালয়ে ৷

গৃহবিভাগৰ মুখপাত্ৰ ৰবিশ কুমাৰে কয় যে, আমি আমাৰ চুবুৰীয়া ৰাষ্ট্ৰৰ সৈতে বন্ধুত্বপূৰ্ণ সম্পৰ্ক ৰক্ষা কৰাৰ ক্ষেত্ৰত সদায়ে প্ৰতিজ্ঞাবদ্ধ ৷ নেপালৰ সমীক্ষা বিভাগে প্ৰকাশ কৰা মানচিত্ৰ অনুসৰি কালাপানী, লিপু, লিম্ফুয়াধাৰা নেপালৰ অংশ ৷ দেশখনৰ বাবে কালাপানী, লিপু সীমান্ত অংশ এক সংবেদশীল ৰাজনৈতিক বিষয় ৷

প্ৰেছ বিজ্ঞপ্তি

গৃহবিভাগৰ মুখপাত্ৰগৰাকীয়ে কোনো দেশৰ নাম উল্লেখ নকৰাকৈ মন্তব্য কৰে যে, একাংশই ব্যক্তিগত স্বাৰ্থ আৰু বিভাজনমুখী ভাবধাৰাৰে সমস্যাটো জটিলতাৰ দিশলৈ ঠেলি দিছে ৷ আমাৰ দুয়োখন দেশৰ মাজত মতানৈক্যৰ সৃষ্টি কৰিব বিচাৰিছে ৷ আমি দুয়োখন দেশে ইয়াৰ বিৰুদ্ধে যুঁজ দিব লাগিব ৷

ইপিনে, সীমান্তৰ বিষয়টোৱে ক্ৰমাৎ নেপাল চৰকাৰৰ বাবে মূৰৰ কামোৰণি হৈ পৰিছে ৷ চ'চিয়েল মিডিয়াযোগে দেশখনৰ ৰাজনৈতিক নেতাৰ পৰা আৰম্ভ কৰি বুদ্ধিজীৱিলৈ সকলোৱে চৰকাৰৰ ভূমিকাক লৈ প্ৰশ্ন উত্থাপন কৰিছে ৷ নেপালী কংগ্ৰেছ নেতা গগণ থাপাই বৈদেশিক মন্ত্ৰী গয়াৱলীক কয় যে,"আশা কৰো প্ৰধানমন্ত্ৰী অলিয়ে বিষয়টোক গুৰুত্বসহকাৰে ল'ব আৰু প্ৰত্যেকটো ৰাজনৈতিক দলক একগোট কৰি ক্ষীপ্ৰতাৰে ভাৰতৰ একপক্ষীয় নীতিৰ সমাধান কৰিব ৷

নেপালৰ সংবাদ মাধ্যমত প্ৰকাশ কৰা তথ্য অনুসৰি, দেশখনৰ কেইবাটাও স্থানত বিষয়টোকলৈ ইতিমধ্যে আৰম্ভ হৈছে প্ৰতিবাদী কাৰ্যসূচী ৷ নেপালী নাগৰিকে ৰাজপথত গ' বেক ইণ্ডিয়া ধ্বনিৰে সাব্যস্ত কৰিছে প্ৰতিবাদী কাৰ্যসূচী৷

নেপালৰ অৰ্থনীতিবিদ সুজীৱ সাকায়াৰ মতে, যদিহে ভাৰতে সীমান্তৰ সমস্যা সমাধানৰ ক্ষেত্ৰত গুৰুত্ব নিদিয়ে তেন্তে বিষয়টোৱে আৰু অধিক ভয়াৱহৰূপ ধাৰণ কৰিব পাৰে ৷