ভাৰতৰ ৰাজধানী দিল্লীত ভালেকেইদিনমানৰ অন্ধকাৰে ছানি ধৰা ধোঁৱাময় আকাশৰ পাচত ৰ'দৰ ফৰকাল বতৰ নামিছে ৷ ভয়াৱহ বায়ু প্ৰদূষণৰ বাবে বাধ্যতামূলক বিৰতি লোৱা দিল্লীৰ বিদ্যালয়সমূহো মুকলি কৰা হৈছে ৷ কিন্তু দিল্লীৰ বৈদেশিক কুটনীতিবিদসকলে বছৰে বছৰে প্ৰদূষণৰ মাত্ৰা বৃদ্ধি হোৱাটোক লৈ সচেতনতা প্ৰকাশ কৰিছে ৷ যোৱা কেইবাসপ্তাহ ধৰি দিল্লীৰ প্ৰদূষণৰ মাত্ৰা ভয়ংকৰভাৱে অসহনীয় হৈ পৰিছিল ৷ কুটনৈতিক কৰ্পছৰ ডীনজন সম্প্ৰতি ভ্ৰমণত আছে ৷ তেওঁ এই সপ্তাহতে দিল্লীলৈ উভতি আহি বৈদেশিক মন্ত্ৰালয়ৰে সৈতে পৰিবেশৰ সমস্যা সমাধানৰ বাবে কিছু ধাৰণা ব্যক্ত কৰিব বুলি আশা কৰা হৈছে ৷ " মই কওঁ যে দিল্লীৰ আন বাসিন্দাসকলৰ দৰেই কুটনীতিবিদসকলেও একেই উশাহ লয়,গতিকে আন সকলোৰ দৰেই আমি এই বিষয়ে সচেতন ৷ আমি বৈদেশিক মন্ত্ৰালয়ৰ সৈতে এই পৰিবেশৰ উন্নয়ন কৰাৰ সন্দৰ্ভত আলোচনা কৰিম ৷ কাৰণ ই দিল্লীৰ বাসিন্দাসকলকেই প্ৰভাৱান্বিত কৰা নাই, দিল্লীলৈ ব্যৱসায় তথা ভ্ৰমণৰ বাবে অহা আমাৰ দেশৰ আন লোকসকলৰো ক্ষতি কৰিছে " - ডীন ফ্ৰেংক এইচডি কাষ্টলানোচে ইটিভি ভাৰতৰ আগত এইদৰে মন্তব্য কৰিছে ৷
কুটনৈতিকভাৱে বিব্ৰত অৱস্থাত 2017 চনত ৰাষ্ট্ৰদূত কাষ্টলানোচে দিল্লীৰ বায়ু নাটনিৰ প্ৰতিবাদ কৰি বৈদেশিক মন্ত্ৰালয়ৰ আগত এক আনুষ্ঠানিক প্ৰতিবেদন দাঙি ধৰে ৷
এই পৰিবেশে কুটনৈতিক কৰ্পছৰ দৈনন্দিন কাম-কাজকো প্ৰভাৱান্বিত কৰিছিল ৷ ভালেমান দূতাৱাস আৰু উচ্চায়ুক্তই কৰ্মচাৰী আৰু পৰিয়ালৰ লোকসকলৰ বৰ্দ্ধিত শ্বাসজনিত সমস্যা আৰু শাৰীৰিক সমস্যাৰ কথা জনাইছিল ৷ ASEANৰ সদস্য ৰাষ্ট্ৰৰ দুজন কুটনীতিবিদে দিল্লীত নিজৰ নিযুক্তি বাতিল কৰিবলগীয়া হৈছিল,আন কিছুমানে বৰ্ষ শেষৰ ছুটী আগতীয়াকৈ ল'বলগীয়া হৈছিল ৷ থাইলেণ্ডৰ দূতাবাসে 2017 চনত দিল্লীক কষ্টকৰ নিযুক্তি বুলি ঘোষণা কৰাৰ সম্ভাৱনীয়তা বিচাৰি বৈদেশিক মন্ত্ৰালয়ক আবেদন জনাইছিল ৷ কোষ্টাৰিকাৰ দূত মাৰিয়েলা ক্ৰুজ আলভাৰেজে শ্বাসজনিত সমস্যাৰ বাবে চিকিৎসাধীন হ'বলগীয়া হৈছিল ৷ তেতিয়াৰ পৰাই দিল্লীৰ বৈদেশিক মিছনে কুটনীতিবিদ আৰু কৰ্মচাৰীসকলৰ বাবে আভ্যন্তৰীণ প্ৰতিৰোধ অৱলম্বন কৰিছে ৷
ই টিভি ভাৰতৰ সৈতে হোৱা সাক্ষাৎত দিল্লীত ফ্ৰান্সৰ দূতাবাসৰ মুখপাত্ৰ ৰেমী টিৰোট্টওভাৰায়েনে কয় যে - " ফ্ৰান্সৰ দূতাবাসে 2016 চনৰ পৰা নিজৰ চৌহদ বায়ু পৰিশোধকৰ সৈতে সজ্জিত হোৱাটো নিশ্চিত কৰি আহিছে ৷ ইয়াৰ দ্বাৰা এইক্ষেত্ৰত ভাৰত আৰু ফ্ৰান্সৰ সম্পৰ্কটো সঠিক বুলি উমান পাব পাৰি ৷ আমাৰ দেশৰ পৰিবেশ মন্ত্ৰীয়ে আন্তৰ্জাতিক সৌৰ জোঁটৰ সাধাৰণ সভাৰ বাবে দিল্লীলৈ আহিছিল ৷ তেওঁ মন্ত্ৰী জাভেদকাৰৰ সৈতে সাক্ষাৎ কৰি পৰিৱেশ আৰু জলবায়ু পৰিবৰ্তন প্ৰশমনৰ বাবে সহযোগিতা বৃদ্ধি কৰাৰ কথা আলোচনা কৰে ৷"
যোৱাকেইটামান বছৰৰ দৰেই চীনৰ দূতাবাসে বায়ু প্ৰদূষণৰ বাবে নিজৰ কৰ্মচাৰীসকলৰ বাবে মুখাৰ ব্যৱস্থা কৰে ৷ দূতাবাসৰ প্ৰাংগনৰ সকলো এপাৰ্টমেন্টতে দুটাকৈ বায়ু পৰিশোধনকাৰী যন্ত্ৰও স্থাপন কৰে ৷ সংবাদ মাধ্যমৰ সৈতে ভাৱ বিনিময় কৰি জাৰ্মান ৰাষ্ট্ৰদূত ৱাল্টাৰ লিণ্ডাৰে কয় যে জীৱন নিৰ্বাহৰ বাবে ৰাজপথত থকা ৰিস্কাৱালা আদি সকলোৱে বায়ু পৰিশোধনকাৰী যন্ত্ৰৰ যোগাৰ কৰিব নোৱাৰে ৷ দিল্লী চৰকাৰৰ "যুগ্ম-অযুগ্ম" আঁচনিক সমৰ্থন কৰি আন দেশৰ দূত হোৱা স্বত্বেও নিজে ইয়াক পালন কৰিব বুলিও তেওঁ জনায় ৷ প্ৰচেষ্টা আৰু ভুল পদ্ধতি অৱলম্বনেৰে বায়ুৰ গুণাগুণৰ উন্নতি কৰাৰ কথা তেওঁ জনায় ৷ আন বহুতো কুটনীতিবিদ আৰু ৰাষ্ট্ৰদূতৰ দৰে লিণ্ডাৰে দিল্লীৰ বতৰৰ বাবেই ভালেমান সভা আৰু সাক্ষাৎ বাতিল বা সালসলনি কৰিবলৈ বাধ্য হৈছিল ৷
টিউনিছিয়াৰ ৰাষ্ট্ৰদূত নাজমেদ্দিন লেখাকে সাংবাদিকৰ আগত কয় যে - " দিল্লীৰ পৰিবেশে প্ৰথমতেই সবাতোকৈ মূল্যৱান আমাৰ স্বাস্থ্যৰ ক্ষতিসাধন কৰে৷ মই গোটেই শনিবাৰে ঘৰৰ ভিতৰত আবদ্ধ হৈ আছিলোঁ ৷ দেওবাৰে দুঘন্টাৰ বাবেহে সহকৰ্মীসকলক সাক্ষাৎ কৰোঁ ৷ ই আমাৰ কামকো প্ৰভাৱিত কৰি আছে " ৷ ৰাষ্ট্ৰদূতগৰাকীয়ে এইদৰেও কয় যে - " দিল্লীত গাড়ীত গৈ থকা সময়ত বা অফিচত থকা সময়ত প্ৰদূষণৰ বাবে খিৰিকী খুলিব নোৱাৰা অৱস্থাৰ সৃষ্টি কৰে ৷ শিশু আৰু বয়সস্থ ব্যক্তিসকলৰ বাবে মোৰ সঁচাকৈয়ে বহুত দুখ লাগে " ৷
স্মিতা শৰ্মা
নাগৰিকেও বায়ু প্ৰদূষণৰ জৰুৰী অৱস্থাৰ প্ৰতিবাদ কৰে৷
