এটা কথা স্পষ্ট যে, ব্ৰিটিছ নাগৰিকসকলে আশ্চৰ্য জনক ভাৱে কোনো এটা স্বকীয় বিষয়ক অগ্ৰাহ্য কৰিব পাৰে ! ব্ৰিটিছ লেখক,সমালোচক এড্ৰিয়ান গিলে কৈছিল- " ব্ৰিটিছ সকলে ৰাজনীতিবিদক ঘৃণা কৰে ৷ সকলোধৰণৰ ৰাজনীতিবিদক ৷ ৰাজনীতিবিদৰ সৈতে ঘৃণাৰ উপমাটো ঠিক ভেৰাৰ মাংসৰ সৈতে পুদিনাৰ চাটনীৰ দৰে....ব্ৰিটিছ নাগৰিকে ৰাজনীতিবিদ সকলক সামান্য পৰিমাণেহে আৰ্থিক সাহাৰ্য আগবঢ়ায় ৷ " সাম্প্ৰতিক ৰাজনীতিত নিমজ্জিত ৰাজনীতিবিদসকলে বিগত দহ বছৰত চাৰিবাৰকৈ সাধাৰণ নিৰ্বাচন অনুষ্ঠিত কৰিছে ৷ যিয়ে দেশখনৰ জনসাধাৰণৰ মনত এটা বিৰূপ ভাৱমূৰ্তি সৃষ্টি কৰা পৰিলক্ষিত হৈছে !
দেশখনৰ প্ৰাক্তন প্ৰধানমন্ত্ৰী টেৰেছা মে'য়ে 650 খন আসনৰ ভিতৰত 330 খন আসন দখল কৰিবলৈ সক্ষম হৈছিল ৷ ইউৰোপীয় সংঘৰ সৈতে সম্পৰ্কৰ অৱসান ঘটোৱা ব্ৰিটেইনৰ তদানীন্তন প্ৰধানমন্ত্ৰী ডেভিদ কেমেৰ'ণ এ 2016 চনৰ 23 জুনত পদত্যাগ কৰাৰ পাচতেই টেৰেছা মে'ৰ হাতলৈ শাসনভাৰ আহে ৷ কেমেৰ'ণে নিজৰ শেহতীয়া এখন কিতাপত উল্লেখ কৰিছিল যে, যিসকলে ইউৰোপীয় সংঘত থকাৰ বাবে যু্ক্তি দৰ্শাইছিল তেওঁলোকে নিৰ্বাচনত পৰাজয় বৰণ কৰিলে যিটোৱে অৱশেষত দেশখনকে বিভক্ত কৰিলে ৷ নিজৰ ভুল স্বীকাৰ কৰি কেমৰ'ণে লিখিছে যে, উক্ত ঘটনাই চৰকাৰক নিশকটীয়া কৰাৰ উপৰিও ব্ৰিটেনিয়ান সকলক ইউৰোপীয় সংঘৰ পৰা কোনো চুক্তি অবিহনে স্পৰ্শকাতৰ স্থিতিত অনিশ্চয়তাত এৰি আহিবলৈ বাধ্য কৰাইছিল ৷
দেশখনৰ তেনে এক সংঘাতময় পৰিস্থিতিত টেৰেছা মে' বৃহৎ ৰাজনৈতিক সফলতা লাভ কৰিব বুলি আশা কৰি নিৰ্বাচনৰ মুখামুখি হৈ 13 খন আসন হেৰুৱাবলগীয়া হৈছিল ৷ ইউৰোপীয় সংঘৰ সৈতে সম্পৰ্ক ছেদ কৰাৰ বিষয়টো সমগ্ৰ ব্ৰিটেইনতে এক গভীৰ ৰাজনৈতিক চৰ্চাৰ বিষয় হৈ পৰে ৷
ইউৰোপীয় সংঘই ব্ৰিটেইনৰ সাৰ্বভৌমত্বত আগ্ৰাসন চলোৱা বুলি নাগৰিক সকলৰ মনত গভীৰ ধাৰণাৰ সৃষ্টি হ'ল আৰু ইয়াৰ পৰা পৰিত্ৰাণ পাব বিছাৰিলে ৷ অৱশ্যে স্কটলেণ্ড আৰু আয়াৰলেণ্ডে 'ব্ৰেক্সিট' ৰ সমৰ্থন কৰা নাছিল ৷ প্ৰধানমন্ত্ৰী টেৰেছা মে'য়ে ইউৰোপীয় সংঘৰ পৰা সম্পৰ্ক ছেদ কৰিব বিচৰা প্ৰস্তাৱটো দেশখনৰ সংসদে তিনিবাৰকৈ প্ৰত্যাখান কৰাত তেওঁ চলিত বৰ্ষৰ জুন মাহত পদত্যাগ কৰাৰ বাদে বিকল্প নাছিল ৷ এই ঘটনাৰ ফলত বৰিছ জনছনে জুলাই মাহত শাসনভাৰ দখল কৰে ৷ পূৰ্বে ব্ৰুছেলচ ৰ সাংবাদিক হিচাপে বৰিছে ইউৰোপীয় সংঘৰ পৰা ব্ৰিটেইন ফালৰি কাটি অহাৰ সমৰ্থনত সৰৱ প্ৰচাৰ চলাইছিল ৷ তেওঁ কৈছিল- " এয়া আমাৰ দেশখনৰ বাবে এখন গুৰুত্বপূৰ্ণ চুক্তি হ'ব ৷ মোৰ বিশ্বাস ইউৰোপীয় সংঘৰ মিত্ৰদেশ সকলৰ বাবেও ই এটা ভাল বুজাপৰা হ'ব " ৷ মন কৰিবলগীয়া যে, দেশখনৰ ডেমক্ৰেটিক ইউনিয়ন পাৰ্টীকে ধৰি তেওঁৰ চৰকাৰক সমৰ্থন জনোৱা সকলো বিৰোধী দলে চুক্তিখনৰ বিৰোধিতাৰে বিষয়টো ব্ৰিটেইনৰ নাগৰিকৰ মাজলৈ লৈ যায় ৷ অহা ডিচেম্বৰ মাহত দেশখনত নিৰ্বাচন অনুষ্ঠিত হ'ব ৷ অৱশ্যে দেশখনত গ্ৰীষ্মকালতহে নিৰ্বাচন অনুষ্ঠিত হোৱাৰ প্ৰচলিত নিয়ম ৷
ভাৰতে ব্ৰেক্সিটৰ বিষয়টো কেনেদৰে পৰ্যালোচনা কৰিব ? ব্ৰিটেইনৰ ৰাজনীতিত ইয়াৰ প্ৰভাৱ কেনেকৈ পৰিব ?
ব্ৰিটেইনৰ তদানীন্তন প্ৰধানমন্ত্ৰী টেৰেছা মে'য়ে ভাৰত ভ্ৰমণ কালত উল্লেখ কৰিছিল যে, " মই ভৱিষ্যতে ভাৰত আৰু ব্ৰিটেইনৰ মাজত কৌশলগত বন্ধুত্বৰ সম্পূৰ্ক স্থাপন হোৱাটো কামনা কৰো ৷ ব্ৰিটেইনে যিহেতু ইউৰোপীয় সংঘৰ পৰা বাহিৰ হ'ব ওলাইছে আৰু ভাৰত এক নতুন পথত গতি কৰিছে সেয়ে আমি এই সুযোগ গ্ৰহণ কৰা উচিত " ৷ ভাৰতীয় প্ৰৱাসী সকলৰ ক্ষেত্ৰত থকা কঠোৰ ভিছা নীতি সৰলীকৰণৰ বিষয়টো অন্যতম হিচাপে পৰিগণিত হৈ আছে ৷ কিয়নো 2010 - 2011 চনৰ পৰা 2016-17 চনলৈ ভাৰতীয় শিক্ষাৰ্থীৰ পৰিমাণ সেই দেশখনত 50 শতাংশ হ্ৰাস পাইছিল ৷
ইপিনে, ইয়াৰ বিপৰীতে ব্ৰিটেইনৰ কনজাৰভেটিভ দলৰ স্থিতি ভাৰতৰ সৈতে যথেষ্ট সৌহাৰ্দপূৰ্ণ ৷ প্ৰাক্তন প্ৰধানমন্ত্ৰী ডেভিদ কেমেৰ'ণে তেওঁৰ প্ৰথমটো কাৰ্যকালত তিনিবাৰকৈ ভাৰত ভ্ৰমণ কৰিছিল ৷ 2015 চনত তেওঁ প্ৰধানমন্ত্ৰী মোদীৰ সৈতে লণ্ডনৰ ৱেম্বলে ষ্টেডিয়ামত আয়োজিত প্ৰৱাসী ভাৰতীয় সকলৰ বিশাল জনসভাত বক্তব্য ৰাখি কৈছিল ' প্ৰধানমন্ত্ৰী মোদীক পৰিচয় কৰি দিয়াৰ পূৰ্বে মই 60 হাজাৰৰো অধিক দৰ্শকক ক'ব খুজো যে, আগন্তুক সময়ছোৱাত ব্ৰিটেইনৰ প্ৰধানমন্ত্ৰী আৱাসত ভাৰতীয় মূলৰ ব্ৰিটিছ নাগৰিক এজন অধিষ্ঠিত হ'ব বুলি কল্পনা কৰিব পাৰি ৷ মোদী আৰু মই মঞ্চত কৰমৰ্দন কৰি আশা প্ৰকাশ কৰিছিলো যে, প্ৰতিটো ক্ষুদ্ৰ ক্ষুদ্ৰ আও-ভাওৱে বিশ্বৰ প্ৰতি থকা ব্ৰিটেইনৰ দৃষ্টিভংগীৰ এক ইংগিত বহন কৰে ৷
অন্যহাতে দেশৰ লেবাৰ পাৰ্টীৰ নেতা তথা পাক-অধিকৃত কাশ্মীৰ মূলৰ লৰ্ড নাজিৰ আহেমেদ আদি সকলে ভোটবেংকৰ ৰাজনীতিত অধিক মনোনিৱেশ কৰি আহিছে ৷ দেশখনত পাকিস্তানী মূলৰ প্ৰায় 11 লাখ ব্ৰিটিছ নাগৰিক আছে ৷ অৰ্ধশিক্ষিত শ্ৰেণীৰ অধিকাংশ লোকে দেশখনত সাধাৰণ কামত নিয়োজিত হৈ আছে৷ সেইলোক সকলেও বহু সংসদীয় সমষ্টিত নিজৰ প্ৰভাৱ ৰাখে ৷ শেহতীয়া সময়ছোৱাত কাশ্মীৰ বিষয়লৈ লেবাৰ পাৰ্টীৰ নেতা জেৰেমি কৰবিণে সৃষ্টি কৰা বিতৰ্কত ব্ৰিটেইনস্থিত শতাধিক ভাৰতীয় সংগঠনে প্ৰত্যাহবান জনাইছিল আৰু ফলশ্ৰুতিত দেশখনৰ বৈদেশিক মন্ত্ৰণালয়ে বিবৃত্তি দিবলৈ বাধ্য হৈছিল ৷
