গুৱাহাটী,13 আগষ্টঃ গুৱাহাটী চাহ নিলাম কেন্দ্ৰ চমুকৈ GTAC য়ে মঙলবাৰে আন্তঃৰাষ্ট্ৰীয় পৰ্যায়ত ৰচিলে অভিলেখ ৷ আন্তৰ্জাতিক বজাৰত অসমত উৎপাদিত 'Golden Butterfly' নামৰ চাহপাত প্ৰতি কেজিত 75 হাজাৰ টকা দামত বিক্ৰী কৰি অভিলেখ ৰচিলে GTACয়ে ৷
ডিব্ৰুগড়ৰ সমীপৰ ডিকম চাহ বাগানত উৎপাদিত 'গ'ল্ডেন বাটাৰফ্লাই' হৈছে এবিধ বিশেষ চাহপাত ৷ গুৱাহাটী চাহ নিলাম কেন্দ্ৰৰ সম্পাদক দীনেশ বিহানীয়ে প্ৰকাশ কৰা অনুসৰি,"গুৱাহাটীৰে এম/এচ আসাম টি ট্ৰেডাৰছ নামৰ এখন দোকানে গ্ৰাহকসকলৰ বাবে ক্ৰয় কৰিছে এই চাহপাত ৷ তেওঁলোকে বিগত সময়বোৰতো নিলামৰ বাবে এনেধৰণৰ বিশেষ চাহপাতসমূহ বেচি মূল্যত ক্ৰয় কৰি আহিছে ৷ চাহৰ ক্ষেত্ৰখনত এই নিলাম কেন্দ্ৰটোৱে এনে পৰিচয় বহন কৰি আহিছে য'ত নেকি প্ৰত্যেকবাৰেই পূৰ্বৰ অভিলেখসমূহ ভংগ কৰি আহিছে আৰু নতুন ইতিহাস খোদিত কৰি আহিছে ৷"
তেওঁ লগতে কয় যে,"গুৱাহাটী চাহ নিলাম কেন্দ্ৰই সদায় বিক্ৰেতাসকলক এটা লাভজনক অংকত চাহ বিক্ৰি কৰিবলৈ সুবিধা দি আহিছে ৷ উৎকৃষ্ট চাহপাতসমূহৰ চাহিদা সদায়ে বেচি আৰু গ্ৰাহকসকলেও তাৰ বাবে মোটা অংকৰ ধন দিবলৈও সদাপ্ৰস্তুত ৷ সম্প্ৰতি, সকলোতকৈ উৎকৃষ্ট আৰু বিশেষ চাহৰ বাবে এতিয়া সমগ্ৰ বিশ্বত পৰিচিত হৈ পৰিছে গুৱাহাটী চাহ নিলাম কেন্দ্ৰ ৷" এই বিশেষ চাহপাতবিধৰ প্ৰস্তুত প্ৰক্ৰিয়াও আনতকৈ পৃথক ৷ হাতেৰে মেৰিয়াই আৰু ৰ'দৰ পোহৰত শুকুৱাই প্ৰস্তুত কৰা হয় এই বিশেষ চাহবিধ ৷ উল্লেখ্য যে,যোৱা 31 জুলাই তাৰিখে প্ৰতি কেজিত 70,501 টকা দামত বিক্ৰী হোৱাৰ বিপৰীতে মঙলবাৰে 75 হাজাৰ টকা দামত বিক্ৰী কৰি পূৰ্বৰ অভিলেখ ভংগ কৰে গুৱাহাটী চাহ নিলাম কেন্দ্ৰই ৷
