নিউজ ডেস্ক, ২১ অক্টোবৰ : উত্তৰ-পূৰ্বাঞ্চলত সন্ত্ৰাসবাদ, বাঁওপন্থী উগ্ৰবাদ আৰু বিদ্ৰোহৰ ঘটনা ৬৫ শতাংশ হ্ৰাস পাইছে । কেন্দ্ৰীয় গৃহমন্ত্ৰী অমিত শ্বাহে শনিবাৰে এই কথা কয় । তেওঁ লগতে দৃঢ়তাৰে কয় যে দেশখনৰ তিনিটা হটস্পট- বাঁওপন্থী উগ্ৰবাদপীড়িত ৰাজ্য, উত্তৰ-পূৰ্বাঞ্চল আৰু জম্মু-কাশ্মীৰ শান্তিপূৰ্ণ হৈ উঠিছে ।
নৰেন্দ্ৰ মোদী চৰকাৰে সন্ত্ৰাসবাদৰ বিৰুদ্ধে শূন্য সহনশীলতা নীতিৰে কঠোৰ আইন প্ৰণয়ন কৰিছে । গৃহমন্ত্ৰীয়ে দিল্লীত ৰাষ্ট্ৰীয় আৰক্ষী স্মাৰক দিৱসত শ্বহীদসকলক শ্ৰদ্ধাঞ্জলি জনোৱাৰ পিছত এক সমাবেশত কয় । আনহাতে, চৰকাৰে আৰক্ষী বাহিনীৰ আধুনিকীকৰণৰ বাবে 'আৰক্ষী প্ৰযুক্তি মিছন' স্থাপন কৰি বিশ্বৰ সৰ্বশ্ৰেষ্ঠ সন্ত্ৰাসবাদবিৰোধী শক্তি গঢ়ি তোলাৰ দিশত কাম কৰিছে বুলিও তেওঁ কয় ।
অমিত শ্বাহে লগতে কয় যে মোদী চৰকাৰে অপৰাধী ন্যায় ব্যৱস্থাৰ ব্যাপক পৰিৱৰ্তনৰ বাবে সংসদত তিনিখন বিধেয়ক উত্থাপন কৰিছে । এই তিনিখন আইনে ১৫০ বছৰ পুৰণি আইনৰ স্থান ল'ব আৰু প্ৰতিজন নাগৰিকৰ বাবে সকলো উপযুক্ত সাংবিধানিক অধিকাৰৰ নিশ্চয়তা প্ৰদান কৰিব । ইয়াৰ উপৰি তেওঁ কয় যে প্ৰস্তাৱিত আইনসমূহে ভাৰতীয়ত্বকো প্ৰতিফলিত কৰিব ।
শ্বাহে কয়, "আৰক্ষী কৰ্মীসকলৰ প্ৰচেষ্টা আৰু সাফল্যৰ বাবে উত্তৰ-পূৰ্বাঞ্চলত সন্ত্ৰাসবাদ, বাঁওপন্থী উগ্ৰবাদ আৰু বিদ্ৰোহৰ ঘটনা ৬৫ শতাংশ হ্ৰাস পাইছে ।" তেওঁ কয় যে সন্ত্ৰাসবাদীৰ বিৰুদ্ধে যুঁজ দিয়া, অপৰাধ প্ৰতিৰোধ কৰা, বিশাল জনসমাগমৰ সন্মুখত আইন-শৃংখলা বজাই ৰখা বা দুৰ্যোগৰ সময়ত ঢাল হিচাপে কাম কৰি মানুহক সুৰক্ষা দিয়াই হওক, আৰক্ষী কৰ্মীসকলে সকলো পৰিস্থিতিতে নিজক প্ৰমাণ কৰিছে ।
এক দুৰ্যোগত আৰক্ষী কৰ্মীয়ে পালন কৰা ভূমিকাৰ কথা উল্লেখ কৰি তেওঁ কয় যে অতীজত এনডিআৰএফৰ (ৰাষ্ট্ৰীয় দুৰ্যোগ সঁহাৰি বাহিনী) জৰিয়তে বিভিন্ন আৰক্ষী বাহিনীৰ কৰ্মীয়ে দুৰ্যোগ ব্যৱস্থাপনাৰ ক্ষেত্ৰত সমগ্ৰ বিশ্বতে সুনাম অৰ্জন কৰিছে । তেওঁ কয়, "দুৰ্যোগ যিমানেই ডাঙৰ নহওক কিয়, যেতিয়া এনডিআৰএফৰ কৰ্মচাৰীসকল তাত উপস্থিত হয়, মানুহে এই সাহস পায় যে এনডিআৰএফ আহি পোৱাৰ বাবে আৰু কোনো সমস্যা নাই ।"
অমিত শ্বাহে কয় যে মোদী চৰকাৰে সময়ে সময়ে আৰক্ষী কৰ্মীসকলৰ কল্যাণৰ বাবে চলি থকা কেইবাটাও আঁচনি উন্নত কৰাৰ দিশত কাম কৰি আছে । মোদী চৰকাৰ সকলো কৰ্মচাৰীৰ কল্যাণৰ বাবে সমৰ্পিত আৰু তেওঁলোকৰ সুৰক্ষাৰ বাবে চিন্তিত বুলিও তেওঁ উল্লেখ কৰে । আনহাতে, স্বাধীনতাৰ পিছৰে পৰা দেশৰ সেৱাত প্ৰাণ আহুতি দিয়া ৩৬,২৫০ জন আৰক্ষী কৰ্মীক শ্ৰদ্ধাঞ্জলি জ্ঞাপন কৰি তেওঁ কয় যে এই আৰক্ষী স্মাৰক কেৱল এক প্ৰতীক নহয়, ৰাষ্ট্ৰ নিৰ্মাণৰ প্ৰতি আৰক্ষী কৰ্মীসকলৰ ত্যাগ আৰু সমৰ্পণৰ স্বীকৃতি ।
উল্লেখ্য যে ১৯৫৯ চনৰ ২১ অক্টোবৰত লাডাখৰ হট স্প্ৰিংছত অত্যধিক অস্ত্ৰ-শস্ত্ৰৰে সুসজ্জিত চীনা সৈন্যই চলোৱা আক্ৰমণৰ সময়ত ১০ জন আৰক্ষী কৰ্তব্যৰত অৱস্থাতে মৃত্যুবৰণ কৰে । তেতিয়াৰে পৰা প্ৰতিবছৰে ২১ অক্টোবৰত এই শ্বহীদসকল আৰু কৰ্তব্যৰত অৱস্থাত মৃত্যু হোৱা আন সকলো আৰক্ষী কৰ্মীক সন্মান জনোৱা হয় । আৰক্ষী কৰ্মীসকলে কৰা ত্যাগ আৰু ৰাষ্ট্ৰীয় নিৰাপত্তা আৰু অখণ্ডতা সুৰক্ষিত কৰাত তেওঁলোকৰ সৰ্বাধিক ভূমিকাৰ স্বীকৃতি স্বৰূপে প্ৰধানমন্ত্ৰী নৰেন্দ্ৰ মোদীয়ে ২০১৮ চনত আৰক্ষী স্মৰণ দিৱসত চাণক্যপুৰীত ৰাষ্ট্ৰীয় আৰক্ষী স্মাৰক (এনপিএম) দেশবাসীক উৎসৰ্গা কৰো ।
স্মাৰকটোত এটা কেন্দ্ৰীয় ভাস্কৰ্য 'বীৰত্বৰ দেৱাল' আৰু এটা সংগ্ৰহালয় আছে । কেন্দ্ৰীয় ভাস্কৰ্যটো হৈছে ৩০ ফুট ওখ গ্ৰেনাইট মনোলিথ চেনোটাফ । ইয়াৰ অৰ্থ হৈছে আৰক্ষী কৰ্মীসকলৰ শক্তি, স্থিতিস্থাপকতা আৰু নিস্বাৰ্থ সেৱা ।
শ্বহীদসকলৰ নাম খোদিত কৰা 'বীৰত্বৰ দেৱাল' স্বাধীনতাৰ পিছৰে পৰা কৰ্তব্যৰ অৱস্থাত প্ৰাণ আহুতি দিয়া আৰক্ষী কৰ্মীসকলৰ সাহসিকতা আৰু ত্যাগৰ এক দৃঢ় স্বীকৃতি হিচাপে থিয় হৈ আছে । সংগ্ৰহালয়টো ভাৰতীয় আৰক্ষীৰ এক ঐতিহাসিক আৰু বিকশিত প্ৰদৰ্শনী হিচাপে স্থাপন কৰা হৈছে ।
লগতে পঢ়ক :Gaganyaan mission : গগনযানৰ টিভিডি১ ৰকেটৰ সফল পৰীক্ষণ; অভিযানৰ সফলতা ঘোষণা ইছৰোৰ
