গুৱাহাটী, ৫ এপ্ৰিল: নিৰ্বাচনী আচৰণ বিধি উলংঘাৰ অভিযোগত শুকুৰবাৰে ৰাজ্যৰ মুখ্য নিৰ্বাচনী বিষয়াৰ কাৰ্যালয়ে বিজেপিৰ ৰাজ্যিক সভাপতিলৈ কাৰণ দৰ্শোৱাৰ জাননী জাৰি কৰে । ঘৰে ঘৰে প্ৰধানমন্ত্ৰী আৰু মুখ্যমন্ত্ৰীৰ ফটো সম্বলিত প্ৰ-পত্ৰ বিতৰণৰ বিৰোধীয়ে অনা অভিযোগৰ ভিত্তিত মুখ্য নিৰ্বাচনী বিষয়াৰ কাৰ্যালয়ে বিজেপিৰ ৰাজ্যিক সভাপতি ভৱেশ কলিতালৈ এই জাননী জাৰি কৰে ।
উল্লেখ্য যে, চি পি আই এম দলে যোৱা ৪ এপ্ৰিলত অসমৰ মুখ্য নির্বাচনী বিষয়াৰ কাৰ্যালয়ত লিখিতভাৱে বিজেপি দলে নির্বাচনী বিধি ভংগ কৰাৰ অভিযোগ দাখিল কৰিছিল । বিজেপি দলে ৰাজ্যত উপযুক্ত অৰুণোদয় হিতাধিকাৰী বৃদ্ধি কৰাৰ উদ্দেশ্যে সামাজিক-অর্থনৈতিক সমীক্ষা চলাই থকাৰ অভিযোগ চি পি আই এম দলে উত্থাপন কৰিছিল ।
দলটোৱে অভিযোগ কৰা মতে, অৰুণোদয় হিতাধিকাৰী অন্তৰ্ভুক্তিকৰণৰ বাবে বিজেপি নেতাৰ ফটো আৰু প্ৰতীক সম্বলিত সমীক্ষা পত্ৰ বিতৰণ কৰিছে । যিয়ে নির্বাচনী বিধি-নির্দেশনাৱলী উলংঘা কৰিছে । চি পি আই এম দলে তথ্যসহ দাখিল কৰা লিখিত অভিযোগৰ ভিত্তিত আজি অসমৰ মুখ্য নির্বাচনী বিষয়াৰ কাৰ্যালয়ে বিজেপিৰ ৰাজ্যিক সভাপতিলৈ কাৰণ দৰ্শোৱাৰ জাননী জাৰি কৰে । জাননী যোগে মুখ্য নিৰ্বাচনী বিষয়াৰ কাৰ্যালয়ে বিজেপিৰ ৰাজ্যিক সভাপতিক উত্থাপিত অভিযোগ সন্দৰ্ভত উত্তৰ দিয়াৰ বাবে ৭২ ঘণ্টাৰ সময়সীমা বান্ধি দিছে ।
৮ এপ্ৰিলৰ পুৱা ১০ বজাৰ পূৰ্বে উত্তৰ নিদিলে বিষয়টোত বিজেপিৰ ৰাজ্যিক সভাপতিগৰাকীৰ একো ক’বলগীয় নাই বুলি ধৰি লৈ কাৰ্যালয়ে যাৱতীয় ব্যৱস্থা গ্ৰহণ কৰিব বুলি জাননীখনত কোৱা হৈছে । নিৰ্বাচনী বিধি উলংঘা কৰাৰ বিষয়টো সন্দৰ্ভত কিয় ব্যৱস্থা লোৱা নহ’ব তাৰ উত্তৰ বিজেপিৰ ৰাজ্যিক সভাপতিয়ে ৮ এপ্ৰিলৰ পুৱা ১০ বজাৰ পূৰ্বে দিব লাগিব । অন্যথা নিৰ্বাচনী বিধি উলংঘা সন্দৰ্ভত মুখ্য নিৰ্বাচনী বিষয়াৰ কাৰ্যালয়ৰ কঠোৰ পদক্ষেপৰ সন্মূখীন হ'ব লাগিব ৰাজ্যিক বিজেপি । জাননীখনত চি পি আই এম দলে অনা অভিযোগৰ বিষয়ে উল্লেখ কৰা হয় ।
চি পি আই এম দলে অভিযোগ কৰে যে, বিজেপি দলে নিৰ্বাচনী আদৰ্শ আচৰণ বিধি উলংঘা কৰি ৰাইজৰ মাজত প্ৰধানমন্ত্রী আৰু মুখ্যমন্ত্রীৰ ফটো সম্বলিত বিভিন্ন আবেদন পত্ৰ বিতৰণ কৰি আহিছে । তথাকথিত আৰ্থ-সামাজিক জৰীপ চলোৱাৰ নামত আঁচনি সম্প্ৰসাৰণ কৰি নতুন আবেদনকাৰীৰ নাম অন্তৰ্ভুক্ত কৰাৰ প্ৰতিশ্ৰুতি দিছে বিজেপি দলে । ভোটাৰক প্ৰলোভিত কৰা বুলি চি পি আই এম দলে অভিযোগ উত্থাপন কৰিছে । যিটো নিৰ্বাচনী আচৰণ বিধিৰ পৰিপন্থী ।
ইফালে আজি প্ৰদেশ কংগ্ৰেছ তৰফৰ পৰাও বিজেপিৰ বিৰুদ্ধে নিৰ্বাচনী আচৰণ বিধি উলংঘাৰ অভিযোগ তুলি দুখনকৈ লিখিত অভিযোগ মুখ্য নিৰ্বাচনী বিষয়ালৈ প্ৰেৰণ কৰা হয় ।
লগতে পঢ়ক: ডিফু লোকসভা সমষ্টি : কোনগৰাকী প্ৰাৰ্থীৰ সম্পত্তি কিমান জানো আহক - List of candidate assets
