গুৱাহাটী : উজনি অসমৰ দিশৰ পৰা গুৱাহাটী মহানগৰীৰ প্ৰৱেশ পথত হোৱা তীব্ৰ যান-জঁট নিয়ন্ত্ৰণৰ বাবে গুৱাহাটী মহানগৰ যান-বাহন আৰক্ষীয়ে জাৰি কৰিছে পথ নিৰ্দেশনা । তেনেক্ষেত্ৰত উজনি অসমৰ পৰা গুৱাহাটী অভিমুখে যাত্ৰা কৰাৰ পূৰ্বে জানি লওক এই পথ নিৰ্দেশনা ।
পথ নিৰ্দেশনা সন্দৰ্ভত বুধবাৰে সংবাদমেল সম্বোধন কৰি মহানগৰ যান-বাহন আৰক্ষীৰ ADCP মৃণ্ময় গোস্বামীয়ে কয়, "২৭ নং ৰাষ্ট্ৰীয় ঘাইপথৰ যোৰাবাটৰ পৰা খানাপাৰালৈ অহা পথছোৱাত ৰাষ্ট্ৰীয় ঘাইপথ প্ৰাধিকৰণৰ নির্মাণকাৰ্য চলি থকা বাবে যাতায়াতত কিছু অসুবিধা হৈছে । বৰ্তমান মাৰোয়েট পেট্ৰ'ল পাম্পৰ সমীপৰ ৮০ মিটাৰ এলেকাৰ পুনৰ নিৰ্মাণকাৰ্য চলি আছে । দ্বিতীয় পৰ্যায়ত হনুমান মন্দিৰৰ সমীপত পথটোৰ পুনৰ নিৰ্মাণৰ কাম কৰা হ'ব । আনহাতে, তৃতীয় পৰ্যায়ত চি আৰ পি এফ কেম্পৰ সন্মুখৰ পথছোৱাৰ পুনৰ নিৰ্মাণৰ কাম কৰা হ'ব । সেয়ে এই পথ নিৰ্দেশনা দিয়া হৈছে ।"
তেওঁ লগতে কয়, "আগন্তুক দুমাহ ধৰি ৰাষ্ট্ৰীয় ঘাইপথ প্ৰাধিকৰণে তিনিটা পৰ্যায়ত ২৭ নং ৰাষ্ট্ৰীয় ঘাইপথত মেৰামতিৰ কাম কৰিব । যাতে মানুহৰ মূল্যাৱান সময় নষ্ট নহয় তাৰ বাবে এই পথ নিৰ্দেশনা জাৰি কৰা হৈছে । অৱশ্যে খানাপাৰাৰ দিশৰ পৰা সোণাপুৰৰ দিশে যোৱা বাহনবোৰৰ ক্ষেত্ৰত কোনো বাধা নাথাকিব ।"
নতুন পথ নিৰ্দেশনা
- উজনি অসমৰ ফালৰ পৰা গুৱাহাটী অভিমুখে অহা সকলো সামগ্ৰী কঢ়িওৱা বাহন কালিয়াবৰ তিনিআলি হৈ শোণিতপুৰ, দৰঙৰ মাজেৰে বাইহাটা চাৰিআলি হৈ আহিব পাৰিব ।
- নগাঁও, মৰিগাঁও, মেঘালয়ৰ পৰা গুৱাহাটী অভিমুখে অহা সকলো সামগ্ৰী কঢ়িওৱা বাহনক নিশা ১০ বজাৰ পৰা পুৱা ৬ বজাৰ ভিতৰত গুৱাহাটী মহানগৰৰ ২৭ নং ৰাষ্ট্ৰীয় ঘাইপথত প্ৰৱেশৰ অনুমতি দিয়া হ'ব ।
- উজনি অসমৰ ফালৰ পৰা অহা সকলো লঘু বাহন ডিগাৰুৰ তিনিআলিৰ ডিগাৰু পইণ্ট হৈ আমচিং-যোৰাবাট হৈ আৰ্মী কেম্প হৈ পাথৰকুঁৱেৰীলৈ আহিব পাৰিব ।
- ২৭ নং ৰাষ্ট্ৰীয় ঘাইপথৰ পৰা ডিগাৰু তিনিআলিৰ পৰা ডিগাৰু পইণ্ট হৈ চন্দ্ৰপুৰ হৈ পানীখাইতী হৈ নাৰেংগীলৈ আহিব পাৰিব ।
- চামতা হৈ মায়ং হৈ চন্দ্ৰপুৰ হৈ পানিখাইতী হৈ নাৰেংগীলৈ আহিব পাৰিব ।
- জাগীৰোড হৈ মায়ং হৈ চন্দ্ৰপুৰ হৈ পানিখাইতী হৈ নাৰেংগীলৈ আহিব পাৰিব ।
