লখিমপুৰ, ৭ ফেব্ৰুৱাৰী: লখিমপুৰৰ নতুন সুৰ প্ৰকাশন পৰিষদৰ ২০২৪ বৰ্ষৰ বঁটা ঘোষণা কৰা হৈছে । কবি-ঔপন্যাসিক তথা জ্যেষ্ঠ আৰক্ষী বিষয়া নন্দ সিং বৰকলালৈ 'সাহিত্যজ্যোতি' আৰু জ্য়েষ্ঠ সাংবাদিক নিতুমণি শইকীয়ালৈ 'কথা-বৈভৱ' বঁটা আগবঢ়োৱা হৈছে । নতুন সুৰ প্ৰকাশন পৰিষদৰ সঞ্চালক জিতেন বৰুৱাই আজি এই বঁটা ঘোষণা কৰে ।
সাহিত্য চৰ্চাৰ জৰিয়তে সুস্থ পৰিৱেশ সৃষ্টি, সমাজ-জীৱনলৈ সৃজনশীলতাৰ জাগৰণ অনা আৰু সুস্থ জীৱনবোধ প্ৰতিষ্ঠাৰ বাবে দীৰ্ঘ সময়জুৰি কাম কৰি অহা উত্তৰ লখিমপুৰৰ গ্ৰন্থ-আলোচনী প্ৰকাশৰ অগ্ৰণী অনুষ্ঠান নতুন সুৰ প্ৰকাশন পৰিষদে বিগত ২০০৬ চনৰ পৰা অসমীয়া সাহিত্য-সংস্কৃতি-সংবাদক্ষেত্ৰলৈ ইতিবাচক অৱদান আগবঢ়োৱা ব্যক্তি বিশেষক 'সাহিত্যজ্যোতি' আৰু 'কথা-বৈভৱ' বঁটা প্ৰদানেৰে সন্মানিত কৰি আহিছে ৷
২০২৪ বৰ্ষৰ 'সাহিত্যজ্যোতি' বঁটাৰ বাবে নতুন সুৰ প্ৰকাশন পৰিষদে নিৰ্বাচন কৰিছে কবিতাত কাল-চেতনাৰ মাজেৰে মননশীল আৰু পৰিশীলিত মানুহৰ সন্ধান কৰা, সমষ্টিগত ব্যক্তিত্বৰ প্ৰজ্ঞাৰে উদ্বুদ্ধ বিশিষ্ট সাহিত্যিক নন্দ সিং বৰকলাক ৷ উল্লেখ্য যে নন্দ সিং বৰকলাৰ ১৬ খন কাব্যগ্ৰন্থ, ৩ খন গল্প সংকলনকে ধৰি বহু কেইখন গ্ৰন্থ প্ৰকাশ পাইছে ৷ শেহতীয়াভাৱে তেওঁৰ উপন্যাস হাদিৰাচকীয়ে পাঠকসমাজৰ পৰা সমাদৰ লাভ কৰিবলৈ সক্ষম হৈছে ৷
আনহাতে, জ্য়েষ্ঠ সাংবাদিক নিতুমণি শইকীয়াই সাংবাদিকতাৰ লগতে জাতীয় জীৱনৰ স'তে সম্পৃক্ত সকলোবোৰ বিষয় আৰু সমস্যাক প্ৰাঞ্জলভাৱে উপস্থাপন কৰি জনসজাগতা বৃদ্ধিত এক নতুন গতি প্ৰদান কৰি আহিছে ৷ যাৰ বাবে নতুন সুৰ প্ৰকাশন পৰিষদে ২০২৪ বৰ্ষৰ 'কথা-বৈভৱ বঁটা' প্ৰদানৰ কৰাৰ সিদ্ধান্ত গ্ৰহণ কৰিছে ৷ এই দুয়োগৰাকী বিশিষ্ট ব্যক্তিক অহা এপ্ৰিলত উত্তৰ লখিমপুৰত হ'ব লগা এক বিশেষ অনুষ্ঠানত বঁটা প্ৰদান কৰিব বুলি নতুন সুৰ প্ৰকাশন পৰিষদৰ সঞ্চালক জিতেন বৰুৱাই সদৰী কৰিছে ।
লগতে পঢ়ক: ৰাজ্যজুৰি অব্যাহত গুণোৎসৱ 2024 ৰ তৃতীয় পৰ্যায়ৰ আভ্যন্তৰীণ মূল্যায়ন
