মৰাণ, 12 মে’ : অপেক্ষাৰ অন্ত পেলাই 9 মে’ৰ দিনা ঘোষণা কৰা হয় উচ্চতৰ মাধ্যমিক চূড়ান্ত বৰ্ষৰ ফলাফল । এইবাৰ উচ্চতৰ মাধ্যমিক চূড়ান্ত বৰ্ষৰ ফলাফল শীৰ্ষ স্থান অবিহনেই ঘোষণা কৰিলে শিক্ষা বিভাগে । শিক্ষা বিভাগৰ এই সিদ্ধান্তৰ পাছতে ৰাজ্যত মিশ্ৰিত প্ৰতিক্ৰিয়া সৃষ্টি হৈছিল যদিও নতুন নিয়মেৰে ঘোষণা হোৱা উচ্চতৰ মাধ্যমিকৰ চূড়ান্ত বৰ্ষৰ ফলাফলক আদৰণি জনাইছে শিক্ষাৰ্থীসকলে ।
ফলাফল ঘোষণাৰ পাচতে শনিবাৰে সদ্য ঘোষিত উচ্চতৰ মাধ্যমিকৰ চূড়ান্ত পৰীক্ষাত মাহমৰা সমষ্টিৰ অন্তৰ্গত এলেকাৰ সুখ্যাতিৰে উত্তীৰ্ণ ছাত্ৰ-ছাত্ৰীক মৰাণস্থিত মৰাণ উচ্চতৰ মাধ্যমিক বিদ্যালয়ৰ প্ৰেক্ষাগৃহত মাহমৰা উন্নয়ন মঞ্চৰ উদ্যোগত আৰু কেবিনেট মন্ত্ৰী যোগেন মহনৰ ব্যৱস্থাপনাত বিশেষ অভিনন্দন অনুষ্ঠান অনুষ্ঠিত কৰা হয় ।
এই অভিনন্দন অনুষ্ঠানত মৰাণ মহাবিদ্যালয়ৰ প্ৰাক্তন অধ্যক্ষ ড৹ অনিল শইকীয়া, মৰাণ মহাবিদ্যালয়ৰ অধ্যক্ষ ড৹ মিতালী কোঁৱৰ, অসম চৰকাৰৰ কেবিনেট মন্ত্ৰী যোগেন মহন, ডিব্ৰুগড় বিশ্ববিদ্যালয়ৰ শিক্ষাতত্ব বিভাগৰ অধ্যাপক প্ৰাঞ্জল বুঢ়াগোহাঁই, মৰাণ মহিলা মহাবিদ্যলয়ৰ অধ্যক্ষ জয়শ্ৰী ফুকনৰ লগতে কেইবাগৰাকীও জ্যেষ্ঠ ব্যক্তি আৰু শিক্ষাবিদ উপস্থিত থাকে ।
এই অভিনন্দন অনুষ্ঠানত সুখ্যাতিৰে উত্তীৰ্ণ হোৱা মাহমৰা অঞ্চলৰ শতাধিক ছাত্ৰ-ছাত্ৰীক অভিনন্দন জনোৱা হয় । এই অনুষ্ঠানত অংশগ্ৰহণ কৰি মন্ত্ৰী যোগেন মহনে কয়, "মাহমৰা উন্নয়ন মঞ্চৰ উদ্যোগত ছাত্ৰ-ছাত্ৰীক শৈক্ষিক ক্ষেত্ৰত আগুৱাই নিয়াৰ বাবে বিভিন্ন কাৰ্যসূচী গ্ৰহণ কৰা হ'ব । লগতে এইবাৰৰ পৰা প্ৰতিবছৰে 5 জন দৰিদ্ৰ আৰু মেধাৱী ছাত্ৰ-ছাত্ৰীক উচ্চ শিক্ষাৰ বাবে সকলো দায়িত্ব লোৱা হ'ব ।"
শিক্ষাৰ্থীসকলক যোগাত্মক চিন্তাৰে আগবাঢ়ি যাবলৈ পৰামৰ্শ আগবঢ়ায় মন্ত্ৰী যোগেন মহনে ৷
লগতে পঢ়ক: পিতৃয়েই প্ৰশিক্ষক; কন্যাই আকাশ স্পৰ্শ কৰাৰ সপোন নেদেখিবই বা কিয় - ASSAM HS RESULT 2024
