ৰাজ্যজুৰি পালন ঈদ-উল-আজহা : বিশ্ব শান্তিৰ বাবে আল্লাহৰ ওচৰত দোৱা
ইছলাম ধৰ্মাৱলম্বী লোকসকলে আজি পালন কৰিছে ত্যাগৰ উৎসৱ ।
Published : June 7, 2025 at 7:00 PM IST
গুৱাহাটী/যোৰহাট: আজি পবিত্র ঈদ-উল-আজহা বা বকৰীদ । বিশ্বৰ বিভিন্ন প্ৰান্তৰ লগতে অসমতো ইছলাম ধৰ্মাৱলম্বী লোকসকলে পালন কৰিছে ত্যাগৰ উৎসৱ ঈদ-উল-আজহা । বিশ্বজুৰি ত্যাগ, শান্তি আৰু ভাতৃত্ববোধৰ উৎসৱ ঈদ-উল-আজহা উপলক্ষে পুৱাই সমূহীয়া ঈদগাহ-মছজিদত নামাজত অংশগ্ৰহণ কৰে হাজাৰ হাজাৰ ইছলাম ধৰ্মাৱলম্বী লোকে ।
ইছলাম ধৰ্মাৱলম্বীসকলৰ ত্যাগৰ বাণী নিহিত এই উৎসৱৰ আজিৰ দিনটোত ঈদৰ সমূহীয়া নামাজত অংশগ্ৰহণ কৰাৰ পিচত ইজনে-সিজনক আলিংগন কৰি যাচে ঈদ মোবাৰক । অসমৰ ঈদগাহ ময়দান আৰু মছজিদসমূহত আজি পুৱাৰ ভাগত সমূহীয়া নামাজ সম্পন্ন হয় ।
ইয়াৰ ব্যতিক্ৰম নহয় গুৱাহাটী মহানগৰীও । গুৱাহাটীৰ মাছখোৱা ঈদগাহ ময়দান, জালুকবাৰী ঈদগাহ ময়দান, আমবাৰী জামে মাছজিদ আদিকে ধৰি মহানগৰীৰ বিভিন্ন প্ৰান্তৰ ঈদগাহ ময়দান,মছজিদত সমূহীয়া নামাজ সম্পন্ন হয় ।
যোৰহাটৰ ঈদগাহ ময়দানতো সমূহীয়া নামাজ :
যোৰহাটৰ মাজমজিয়াত থকা ঈদগাহ ময়দানতো হাজাৰ হাজাৰ লোক আল্লাৰ ওচৰত শান্তি কামনাৰে দোৱা কৰে । ঈদৰ এই সমূহীয়া নামাজ আদায়ৰ বাবে বিভিন্ন অঞ্চলৰ পৰা হিলদ'ল ভাঙি ওলাই আহে শিশুৰ পৰা আৰম্ভ কৰি বৃদ্ধলৈকে অগনন ইছলাম ধৰ্মাৱলম্বী লোক ।
এই সন্দৰ্ভত যোৰহাট কেন্দ্ৰীয় ঈদগাহ সমিতিৰ বিষয়ববীয়া পাৰভেজ হুছেইনে কয়, "১৭ টা মছজিদেৰে গঠিত যোৰহাট কেন্দ্ৰীয় ঈদগাহৰ পৰা সকলোকে ঈদৰ শুভেচ্ছা জ্ঞাপন কৰিছো । এই ঈদে আমাৰ মাজত ভাতৃত্ববোধ কঢ়িয়াই আনক । এই ত্য়াগৰ ঈদে আমাৰ সাতামপুৰুষীয়া যি এনাজৰী হিন্দু-মুছলমানৰ মাজত থকা এনাজৰীডাল আৰু যাতে কটকটীয়া কৰে তাৰ বাবে আমি আল্লাহৰ ওচৰত দোৱা কৰিছো । মানৱ জাতিৰ শান্তিৰ বাবে ইমামে দোৱা কৰিছে ।"
