নলবাৰী,১৬ মাৰ্চ: আকোৰগোঁজ স্থিতিত অসম জাতীয় পৰিষদৰ উপ সভাপতি দুলু আহমেদ । দলে টিকট নিদিলেও জাহাজৰ প্ৰতীকতে নিজাববীয়াকৈ বৰপেটা লোকসভা সমষ্টিত খেলিব নিৰ্বাচন । শনিবাৰে নলবাৰীৰ মুকালমুৱাত নিৰ্বাচনী কুচকাৱাজ আৰম্ভ কৰি সাংবাদিকৰে মত বিনিময় কৰি দুলু আহমেদে দলীয় নেতৃত্বই তেওঁলৈ কাৰণ দৰ্শোৱা জাননী জাৰি কৰা সন্দৰ্ভত প্ৰতিক্ৰিয়া প্ৰকাশ কৰে ।
তেওঁ কয় যে, তেওঁ সেইবোৰত গুৰুত্বই দিয়া নাই । জাহাজৰ প্ৰতীকতে তেওঁ নিৰ্বাচনত অৱতীৰ্ণ হ'ব । জাহাজৰ প্ৰতীকটো অজাপৰ স্থায়ী প্ৰতীক নহয় । শ্ব'কজ কৰিলেও কৰক বা নিলম্বন কৰিলেও কৰক বুলি প্ৰত্যাহ্বান জনাই দুলু আহমেদে । লগতে নিজেই নিজক অজাপৰ প্ৰাৰ্থী হিচাপে ঘোষণা কৰে । তেওঁ লগতে কয় তেওঁক ৰাইজে দুলু আহমেদ হিচাপে ভোট দিয়ে ।
তেওঁ যদি দলবিৰোধী কাম কৰিছে তেওঁৰ বিৰুদ্ধে অভিযোগ কৰক । ইফালে দুলু আহমেদে কংগ্ৰেছ দল বিজেপিতকৈ বেছি সাম্প্ৰদায়িক বুলি অভিহিত কৰি বৰপেটাত অগপৰ প্ৰাৰ্থী ফণীভূষণ চৌধুৰী আৰু দুলু আহমেদৰ মাজত প্ৰতিদ্বন্দ্বিতা হ'ব বুলি দৃঢ়তাৰে দাবী কৰে । দুলু আহমেদে ফণীভূষণ চৌধুৰীক কটাক্ষ কৰি কয় যে তেওঁ দুবাৰমান কান্দিলে তেওঁৰ ভোট আৰু বৃদ্ধি হ'ব ।
ইফালে ধুবুৰী লোকসভা সমষ্টিৰ কংগ্ৰেছ প্ৰাৰ্থী ৰকিবুল হুছেইনকো তীব্ৰ সমালোচনা কৰি কয় যে কংগ্ৰেছে ধুবুৰীত বহু যোগ্য প্ৰাৰ্থী থকাৰ পিচতো ডকাইত এটা আনি প্ৰাৰ্থিত্ব দিছে । তিনিৰ পৰা চাৰিলাখ ভোটৰ ব্যৱধানত ৰকিবুল হুছেইন পৰাজিত হ'ব বুলিয়ো মন্তব্য কৰে দুলু আহমেদে ।
লগতে পঢ়ক: নোপোৱাৰ বাবে পদত্যাগ: পোৱাৰ বাবে সিদ্ধান্ত সলাব পাৰে আব্দুল খালেকে
