কেবাটাও গুৰুত্বপূৰ্ণ সিদ্ধান্তৰে ৰাজ্য চৰকাৰৰ কেবিনেট বৈঠক

author img

By ETV Bharat Assamese Desk

Published : Jan 31, 2024, 10:50 PM IST

Assam Cabinet Meeting

Assam Cabinet Meeting: আছাম পৰ্যটন ডেভেলপমেন্ট এণ্ড ৰেজিষ্টাৰ বিধেয়ক-২০২৪ত অনুমোদন জনাইছে অসম মন্ত্ৰীসভাৰ কেবিনেটে । গুৱাহাটীত আৰু এখন নতুন উৰণসেতু নিৰ্মাণ কৰা হ'ব ।

সাপ্তাহিক কেবিনেট বৈঠকৰ সিদ্ধান্তসমূহ

গুৱাহাটী, ৩১ জানুৱাৰীঃ মুখ্যমন্ত্ৰী হিমন্ত বিশ্ব শৰ্মাৰ পৌৰোহিত্যত বুধবাৰে দিছপুৰৰ লোকসেৱা ভৱনত ৰাজ্য চৰকাৰৰ সাপ্তাহিক কেবিনেট বৈঠক অনুষ্ঠিত হয় । কেবিনেট বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয় । বৈঠকৰ অন্তত কেবিনেটৰ সিদ্ধান্তসমূহ সংবাদমেলযোগে সদৰী কৰে মন্ত্ৰী জয়ন্ত মল্লবৰুৱাই ।

আজিৰ কেবিনেটে আছাম পৰ্যটন ডেভেলপমেন্ট এণ্ড ৰেজিষ্টাৰ বিধেয়ক-২০২৪ত অনুমোদন জনায় । বিধানসভাৰ আগন্তুক অধিৱেশনত এই বিধেয়ক উত্থাপন কৰা হ'ব । অসমৰ পৰ্যটন ক্ষেত্ৰৰ বাবে ই এটা ভাল খবৰ ।

আনহাতে আজিৰ কেবিনেটৰ সিদ্ধান্ত অনুসৰি জলজীৱন মিচনৰ আঁচনিসমূহ নগৰাঞ্চলৰ ক্ষেত্ৰত নগৰ জল উন্নয়ন কৰ্তৃপক্ষৰ ওপৰত সম্পূৰ্ণৰূপে অৰ্পণ কৰা হয় । যাতে গ্ৰাম্য আৰু নগৰৰ ক্ষেত্ৰত জলজীৱনৰ আঁচনি ৰূপায়ণ আৰু কাৰ্যকৰী কৰাৰ ক্ষেত্ৰত অসুবিধাৰ সৃষ্টি নহয় ।

গুৱাহাটী মহানগৰীত আৰু এখন নতুন উৰণসেতু নিৰ্মাণ কৰা হ'ব । এই সেতুখন গুৱাহাটীৰ লালগনেশৰ পৰা গড়বান্ধা ৰোডলৈ হ'ব । এই সেতুখন ৩৭৬.১১ কোটি টকা ব্যয় সাপেক্ষে নিৰ্মাণ কৰা হ'ব । আজিৰ কেবিনেটে এই প্ৰকল্পৰ প্ৰশাসনীয় অনুমোদন জনায় । কাইলৈ মুখ্যমন্ত্ৰী হিমন্ত বিশ্ব শৰ্মাই এই সেতুৰ আধাৰশিলা স্থাপন কৰিব ।

আজিৰ কেবিনেটত মিচিং স্বায়ত্তশাসিত পৰিষদৰ এখন সংশোধনী অনা হৈছে । সেই অনুসৰি ইয়াৰ সদস্য সংখ্যা ৪৫ গৰাকীলৈ বৃদ্ধি কৰা হৈছে । ইয়াৰে ৪০ গৰাকী নিৰ্বাচিত আৰু ৫ গৰাকী মনোনিত ।

আনহাতে মিচিং স্বায়ত্তশাসিত পৰিষদ, ৰাভা হাচং স্বায়ত্তশাসিত পৰিষদ, সোণোৱাল কছাৰী স্বায়ত্তশাসিত পৰিষদ, দেউৰী স্বায়ত্তশাসিত পৰিষদ, ঠেঙাল স্বায়ত্তশাসিত পৰিষদ আৰু তিৱা স্বায়ত্তশাসিত পৰিষদৰ ক্ষেত্ৰত সংশোধনী বিধেয়ক অনা হৈছে । সেই অনুসৰি ভিলেজ কাউন্সিলৰ কনচেপ্টটো উঠাই দিয়া হৈছে ।

আগন্তুক বাজেট অধিৱেশনত এই বিধেয়ক উত্থাপন কৰা হ'ব । আনহাতে প্ৰধানমন্ত্ৰীৰ অসম ভ্ৰমণ সন্দৰ্ভত মন্ত্ৰীগৰাকীয়ে কয় যে ৩ ফেব্ৰুৱাৰীৰ সন্ধিয়া প্ৰধানমন্ত্ৰী নৰেন্দ্ৰ মোদী অসমলৈ আহিব । গুৱাহাটীৰ খানাপাৰাৰ খেলপথাৰত ৪ ফেব্ৰুৱাৰীত প্ৰধানমন্ত্ৰীয়ে জনসভা সম্বোধন কৰিব । লগতে প্ৰধানমন্ত্ৰীয়ে কেইবাটাও প্ৰকল্পৰ শুভাৰম্ভ কৰিব ।

লগতে পঢ়ক: মন্ত্ৰী বিমল বড়াৰ সমষ্টিত আঁচনি ৰূপায়ণত দুৰ্নীতি-অনিয়মৰ অভিযোগ

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.