মৰাণ, 31 জানুৱাৰী : মুখ্যমন্ত্ৰীয়ে কঠোৰ নিৰ্দেশ দিছিল- ৰাজ্যত কোনেও চৰকাৰী আঁচনি ৰূপায়ণত অনিয়ম, দুৰ্নীতি সংঘটিত কৰিব নোৱাৰিব ৷ আঁচনি ৰূপায়ণৰ ধন আত্মসাৎ কৰা ঠিকাদাৰ, বিষয়াৰ বিৰুদ্ধে লোৱা হ'ব কঠোৰ ব্যৱস্থা ৷ মুখ্যমন্ত্ৰীৰ এই নিৰ্দেশক এতিয়াও গুৰুত্ব সহকাৰে লোৱা নাই একাংশ ঠিকাদাৰ আৰু বিষয়াই ৷ ফলত ভিন্ন সময়ত গ্ৰামাঞ্চলেই হওক বা নগৰাঞ্চল, ৰাইজে বিভিন্ন আঁচনি ৰূপায়ণত দুৰ্নীতি-অনিয়ম সংঘটিত হোৱাৰ অভিযোগ উত্থাপন কৰি আহিছে ৷
এইবাৰ মন্ত্ৰী বিমল বড়াৰ সমষ্টিত আঁচনি ৰূপায়ণত দুৰ্নীতি-অনিয়মৰ অভিযোগ ৷ চৰকাৰী আঁচনি ৰূপায়ণত সমষ্টিটোত ঠিকাদাৰে লুন্ঠন চলোৱাৰ অভিযোগ ৷ চৰকাৰৰ অভিলাষী আঁচনি জলজীৱন মিছন এতিয়া একাংশ ঠিকাদাৰৰ বাবে হৈ পৰিছে ধন ঘটাৰ যন্ত্ৰ ৷ টিংখাঙৰ লেঙেৰীত তাৰেই এক ছবি পৰিস্ফুট হৈছে ৷
টিংখাং সমষ্টিৰ নাচনী গাঁও পঞ্চায়তৰ অন্তৰ্গত ঘৰবন্দী বামুণ পুখুৰীত নিৰ্মাণ কাৰ্য চলি থকা জলজীৱন আঁচনিত নিম্ন মানৰ কাম কৰাৰ অভিযোগ তুলিছে স্থানীয় ৰাইজে ৷ মৰাণৰ জনস্বাস্থ্য কাৰিকৰী বিভাগৰ অভিযন্তাৰ কাৰ্যালয়ৰ অধীনত চলি থকা এই নিম্নমানৰ কামৰ অভিযোগ উঠাৰ লগে লগেই কাম এৰি পলায়ন কৰিছে ঠিকাদাৰ আৰু কৰ্মচাৰীয়ে ৷ ৰাইজৰ অভিযোগ অনুসৰি মাটিৰে ঘৰৰ বেৰ লিপাৰ দৰেই ঠিকাদাৰে কৰিছে পকীকৰণৰ কাম, হাতেৰে মোহাৰি দিলেই এৰি আহে পকা প্লাষ্টাৰ, ছটৰ মাজেৰে উৱলিছে পানী, ধৰোতেই এৰিছে ৰেলিং ৷
লগতে অভিযোগ অনুসৰি তিনি-চাৰিজন মানুহ ওপৰত উঠিলেই কম্পন সৃষ্টি হয় পকী শ্লেপত ৷ বৰ্তমান ৰাইজে বন্ধ কৰি দিছে সকলো কাম-কাজ ৷ ৰাইজে দাবী জনাইছে পুনৰ সুন্দৰভাৱে নিৰ্মাণ কৰক আঁচনিৰ কাম ৷
লগতে পঢ়ক : আজিয়েই ৰাজ্যৰ আমোলা- বিষয়াসকলে দাখিল কৰিব লাগিব সম্পত্তিৰ হিচাপ
