নগাঁও, 26 মে’ : সাগৰীয়া ঘূর্ণী বতাহ ৰেমলক লৈ অসমতো সতৰ্ক হৈ থকাৰ প্ৰয়োজন আছে সাধাৰণ লোক ৷ কিয়নো সাগৰীয় ঘূর্ণী বতাহ ৰেমল ইতিমধ্যেই প্ৰৱেশ কৰিছে উত্তৰ-পূৰ্বাঞ্চলত ৷ দেওবাৰে নিশাৰ পৰাই অসমতো কিছু কিছু প্ৰভাৱ পৰিছে ৰেমলৰ ৷ কিন্তু ৰেমলক লৈ জানো আতংকিত হ’লে হ’ব ? ৰেমলক লৈ আতংকিত হোৱাৰ পৰিৱৰ্তে গ্ৰহণ কৰিব লাগিব কিছু সাৱধানতা ৷ এইক্ষেত্ৰত ৰাজ্যিক দুৰ্যোগ ব্যৱস্থাপনা বিভাগে ল’বলগীয়া সাৱধানতা সন্দৰ্ভত আগবঢ়াইছে কিছু পৰামৰ্শ ৷ নগাঁও অগ্নিনিৰ্বাপক বাহিনীৰ বিষয়া থোনেশ্বৰ বৰাৰ সৈতে ই টিভি ভাৰত অসমে গ্ৰহণ কৰিছে এক বিশেষ সাক্ষাৎকাৰ ৷
ৰেমলক লৈ ল’বলগীয়া সাৱধানতা:
ৰেমলক লৈ আতংকিত হোৱাৰ বিপৰীতে ল'ব লাগিব কিছু সাৱধানতা ৷ ইতিমধ্যেই ৰাজ্যৰ দুৰ্যোগ ব্যৱস্থাপনা বিভাগে সাধাৰণ নাগৰিকৰ বাবে ল’বলগীয়া সাৱধানতাৰ বিষয়ে জাননী জাৰি কৰিছে ৷ সেই অনুসৰি ৰেমলৰ সময়ছোৱাত পানী জমা হোৱা স্থানলৈ যোৱা পৰিহাৰ কৰিবলৈ পৰামৰ্শ আগবঢ়াইছে দুৰ্য্যোগ ব্যৱস্থাপনা বিভাগে ৷ লগতে দুৰ্বল গাঁথনি থকা বাসস্থান পৰিহাৰ কৰা, প্ৰচুৰ বৰষুণ হোৱাৰ সম্ভাৱনা থকা শস্যপথাৰত সঠিক নলা নিষ্কাশনৰ ব্যৱস্থা কৰা, বজ্ৰপাতৰ আশংকা থাকিলে সুৰক্ষিত স্থানত আশ্ৰয় লোৱা, যিকোনো জৰুৰীকালীন অৱস্থাত 112/1070/1077 নম্বৰত ফোন কৰি সহায় ল’বলৈ আহ্বান জনাইছে দুৰ্যোগ ব্যৱস্থাপনা বিভাগে ৷
তদুপৰি স্থানান্তৰ কৰিবলৈ পৰামৰ্শ নিদিয়ালৈকে বাহিৰলৈ নোলোৱা, এই সময়ছোৱাত কৃষকসকলক কৃষিক্ষেত্ৰ বা মুকলি পথাৰলৈ যোৱা পৰিহাৰ কৰিবলৈ পৰামৰ্শ আগবঢ়োৱা হৈছে ৷ মাছমৰীয়াসকলক জলাশয় / নদীলৈ নাযাবলৈ পৰামৰ্শ দিয়া হৈছে ৷ তেওঁলোকক নাও আদি সুৰক্ষিত স্থানত বান্ধি ৰখাৰ আহ্বান জনোৱা হৈছে ৷ পুৰণি আৰু ক্ষতিগ্ৰস্ত অট্টালিকাৰ ওচৰত বা গছৰ তলত আশ্ৰয় লোৱা পৰিহাৰ কৰিব লাগে ৷ কোনো বৈদ্যুতিক তাঁৰ স্পৰ্শ নকৰিব ৷ ইয়াৰ ফলত বিদ্যুৎস্পৃষ্ট হোৱাৰ সম্ভাৱনা থাকে ৷ শিশুসকলৰ সৈতে কথা পাতি ঘূৰ্ণী বতাহৰ বিষয়ে তেওঁলোকক অৱগত কৰিব লাগে, কিন্তু তেওঁলোকক ভয় খুৱাব নালাগে ৷ মূল্যৱান সামগ্ৰী আৰু নথিপত্ৰবোৰ পানী সোমাব নোৱৰাকৈ কোনো স্থানত ৰাখিব লাগে যাতে নষ্ট নহয় ৷
আনহাতে তেজৰ গ্ৰুপৰ বিষয়ে তথ্য ৰাখিব লাগে, যাতে জৰুৰীকালীন অৱস্থাত তেজৰ গ্ৰুপ তৎকালেই অৱগত হ’ব পৰা যায় ৷ কেৰাচিন, মমবাতি, জুইশলা, টৰ্চ আৰু অতিৰিক্ত বেটেৰী ঘৰত মজুত কৰিব লাগে, বিশেষভাৱে সক্ষম ব্যক্তি, বয়সস্থ আৰু শিশুৰ বিশেষ যত্ন ল'ব ৷ শুকান খাদ্যসহ অত্যাৱশ্যকীয় খাদ্য সামগ্ৰীৰ কমেও সাত দিনৰ মজুত ৰাখিব লাগে, সতৰ্কবাণী বুলেটিন শুনিব আৰু স্থানীয় বিষয়াসকলৰ সৈতে যোগাযোগ ৰাখিব লাগে ৷ যদি ঘৰ খালী কৰিব লগা হয় সম্পত্তি সুৰক্ষিত কৰিবলৈয়ো পদক্ষেপ ল’ব লাগে ৷
অতিৰিক্ত খোৱা পানীও সংৰক্ষণ কৰি ৰাখিব লাগে যাতে যিকোনো সময়ত খোৱাপানীৰ অভাৱ নহয় ৷ তদুপৰি যদি কোনো ব্যক্তি অথবা পৰিয়াল কোনো বিপদৰ সন্মুখীন হয় তেন্তে ওচৰৰ অগ্নিনিৰ্বাপক বাহিনীৰ সৈতে যোগাযোগ কৰিলে নিশ্চিত সহায় লাভ কৰিব ৷ কিয়নো অগ্নিনিৰ্বাপক বাহিনীৰ কাৰ্যালয়ত উদ্ধাৰকাৰীৰ দল 24 ঘণ্টাই সষ্টম হৈ থাকিব ক্ষতিগ্ৰস্ত লোকক উদ্ধাৰৰ বাবে ৷
লগতে পঢ়ক : অসমৰ দিশে আহি আছে ৰেমল, ৰাজ্যত জাৰি ৰেড এলাৰ্ট - Red Alert In Assam
