গুৱাহাটী, 5 ফেব্ৰুৱাৰী: দেওবাৰে নিশা গুৱাহাটীলৈ অনা হ’ল বিতৰ্কিত মানস চলিহাক । শনিবাৰে পশ্চিমবংগৰ আলিপুৰদুৱাৰৰ এখন হোটেলত আত্মগোপন কৰি থকা অৱস্থাত অসম আৰক্ষীয়ে গ্ৰেপ্তাৰ কৰিছিল বিতৰ্কিত চলিহাক । গ্ৰেপ্তাৰৰ পিচতেই পশ্চিমবংগৰ পৰা মানস চলিহাক লৈ অনা হৈছিল কোকৰাঝাৰলৈ ।
কোকৰাঝাৰত স্বাস্থ্য পৰীক্ষা কৰা হয় চলিহাৰ । ইয়াৰ পিচতে অপৰাধ শাখাৰ এটা দলে গুৱাহাটীলৈ লৈ আনে বিতৰ্কিত মানস চলিহাক । সম্প্ৰতি দিশপুৰ আৰক্ষী থানাত মানস চলিহাক ৰখা হৈছে বুলি জানিব পৰা গৈছে । সোমবাৰে মুখ্য ন্যায়িক দণ্ডাধীশ আদালত চমুকৈ চি জে এম আদালতত হাজিৰ কৰোৱাৰো সম্ভাৱনা আছে মানসক ।
উল্লেখ্য যে, আলফা(স্বা)ৰ শিবিৰত গুপ্তচৰ বুলি ধৰা পৰা মানস বৰগোঁহাই নামৰ যুৱকজনে এটাৰ পিচত এটাকৈ বিস্ফোৰণ ঘটাই থকাৰ মাজতে পোহৰলৈ আহিল মানস চলিহা নামৰ বিতৰ্কিত লোকজনৰ এক প্ৰৱঞ্চনাৰ গোচৰ ।
ইয়াৰ পিছতে এটাৰ পিচত আনটো কেলেংকাৰী, প্ৰৱঞ্চনাৰ তথ্য পোহৰলৈ আহিবলৈ ধৰে । মানস চলিহাই এগৰাকী ব্যৱসায়ীৰ পৰা 8.5 লাখ টকা প্ৰৱঞ্চনাৰে সৰকাইছিল বুলিও অভিযোগ আছে । এই অভিযোগৰ ভিত্তিত দিশপুৰ থানাত 1361/22 ৰ অধীনত এটি গোচৰ ৰুজু হৈছিল । এই পুৰণি গোচৰটোৰ ভিত্তিতেই মানসক গ্ৰেপ্তাৰ কৰা হয় ।
আৰক্ষীয়ে পুৰণি ফাইল খোলাৰ পিচতে পলাতক হৈ পৰিছিল বিতৰ্কিত মানস চলিহা । গোলাঘাটৰ পৰা গুৱাহাটী অভিমুখে আহি থকা সময়ত চলিহাই যোৰাবাটৰ পৰা মেঘালয়ৰ দিশে লৈ যায় তেওঁৰ বাহনখন । মেঘালয়ৰ পৰা বিতৰ্কিত মানস চলিহাই গাৰো পাহাৰ হৈ গোৱালপাৰাৰ মাজেৰে গৈ পশ্চিমবংগত আত্মগোপন কৰে । পশ্চিমবংগৰ আলিপুৰদুৱাৰৰ এখন হোটেলত আত্মগোপন কৰি থকা অৱস্থাত মানসক অসম আৰক্ষীয়ে পশ্চিমবংগ আৰক্ষীৰ সহায়ত গ্রেপ্তাৰ কৰিবলৈ সক্ষম হয় ।
লগতে পঢ়ক: দেওবাৰে গুৱাহাটীলৈ অনা হ’ব মানস চলিহাক
