পৰম্পৰা ৰক্ষা কৰি ম'হ নুযুঁজালে নহয় : ম'হ গোৱাল

মৰিগাঁও : মহামান্য গুৱাহাটী উচ্চ ন্যায়ালয়ে পেটা নামৰ প্ৰকৃতিপ্ৰেমী সংগঠনৰ আবেদনৰ ভিত্তিত ম'হযুঁজ আৰু বুলবুলি চৰাইৰ যুঁজ নিষিদ্ধ কৰে ৷ এই বিষয়টোৰ সন্দৰ্ভত পুনৰ বিবেচনা কৰিবৰ বাবে ম'হযুঁজ অনুষ্ঠিত কৰা সমিতিসমূহৰ লগতে ম'হৰ গোৱাল আৰু মালিকসকলে শনিবাৰে একত্ৰিত মধ্য অসমৰ বাৰপূজীয়াৰ খেল পথাৰত এখন ৰাজহুৱা সভা অনুষ্ঠিত কৰে ।

শনিবাৰে অনুষ্ঠিত হোৱা এই সভাখনত প্ৰদীপ বৰদলৈৰ সভাপতিত্ব কৰে ৷ অসমৰ চাৰিখন জিলা ক্ৰমে মৰিগাঁও, নগাঁও, হোজাই আৰু কাৰ্বি-আংলং জিলাৰ প্ৰায় তিনি শতাধিক ম'হৰ গোৱাল তথা মালিক উপস্থিত থাকে ৷ লগতে প্ৰায় পঁচিছখন ম'হযুঁজ সমিতিৰ বিষয়ববীয়াও উক্ত সভাত তেওঁলোকৰ মন্তব্য আগবঢ়ায় ।

সভাৰ সকলোৰে আলোচনা মৰ্মে ‘‘ম'হযুঁজ সুৰক্ষা সমিতি অসম’’ নামাকৰণেৰে এখন শক্তিশালী সমিতি গঠন কৰাৰ লগতে সভাত গ্ৰহণ কৰা সিদ্ধান্তসমূহ কাৰ্যকৰীকৰণৰ বাবে কৰ্তৃত্ব অৰ্পন কৰে । সভাই নতুন সমিতিৰখনৰ সভাপতি হিচাপে নগাঁও জিলাৰ বাবুলাল নাথ আৰু সাধাৰণ সম্পাদক হিচাপে মৰিগাঁও জিলাৰ প্ৰশান্ত দেউৰী সমন্নিতে ৩১ জনীয়া কাৰ্যকৰী সমিতিখন গঠন কৰা হয় ।

উক্ত সভাখনৰ সভাপতি প্ৰদীপ বৰদলৈয়ে কয়, "পেটা নামৰ সংগঠনতিয়ে উচ্চতম ন্যায়ালয়ত মহযুঁজ নিষিদ্ধ কৰাৰ আবেদন কৰিছে । আমি ম'হ গোৱাল আৰু ম'হ মালিক সন্থাৰ এটাই অনুৰোধ থাকিব যে এই ম'হযুজঁ দীৰ্ঘদিনৰ পৰা চলি আহিছে ৷ মাঘ বিহুত এই পৰম্পৰা ৰক্ষা কৰি ম'হ নুযুঁজালে নহয় । সেয়েহে আমি অসম চৰকাৰ, মুখ্যমন্ত্ৰীক অনুৰোধ জনাইছো যাতে মুখ্যমন্ত্ৰীয়ে উচ্চতম ন্যায়ালয়ৰ লগত আলোচনা কৰি এক আলোচনাৰ মৰ্মে আমাৰ সাতামপুৰুষীয়া মহযুঁজ অনুষ্ঠিত কৰিবলৈ মুকলি কৰি দিয়ে ।"