নিউজ ডেস্ক, 20 ফেব্ৰুৱাৰী: ভাৰতৰ তাৰকা দম্পতীসকলৰ ভিতৰত অন্যতম হৈছে ক্ৰিকেটাৰ বিৰাট কোহলী আৰু অভিনেত্ৰী অনুষ্কা শৰ্মাৰ যুটি ৷ শেহতীয়াকৈ তেওঁলোক দ্বিতীয়বাৰৰ বাবে পিতৃ-মাতৃ হ’বলৈ ওলোৱা খবৰটো চৰ্চাত আছিল ৷ অৱশেষত সেই শুভক্ষণ আহিল তেওঁলোকৰ জীৱনলৈ ৷ অনুষ্কা শৰ্মাই যোৱা বৃহস্পতিবাৰে জন্ম দিলে এটি পুত্ৰ সন্তান ৷ এই সুখৰ খবৰটো ইতিমধ্য়েই সামাজিক মাধ্যমত শ্বেয়াৰ কৰিছে স্বামী-স্ত্ৰীয়ে ৷ তাৰকা দম্পতী বিৰাট কোহলী আৰু অনুষ্কা শৰ্মাই পুত্ৰ সন্তানটিৰ নাম দিছে ‘অকায়’ ।
পূৰ্বতে টুইটাৰ নামেৰে পৰিচিত X ত বিৰাট কোহলিয়ে এটা পোষ্টত লিখিছে, ‘‘হৃদয় ভৰা সুখেৰে আমি সকলোকে জনাবলৈ পাই আনন্দিত হৈছো যে ১৫ ফেব্ৰুৱাৰীত আমি আমাৰ সন্তান ল'ৰা অকায়- বামিকাৰ কণমানি ভাতৃক পৃথিৱীলৈ আদৰণি জনাইছো !’’
তাৰকা বেটছমেন তথা ভাৰতৰ প্ৰাক্তন অধিনায়কগৰাকীয়ে লগতে লিখিছে, ‘‘আমি আমাৰ জীৱনৰ এই সুন্দৰ সময়ত আপোনালোকৰ আশীৰ্বাদ আৰু শুভেচ্ছা বিচাৰিছো । আমি আপোনালোকক অনুৰোধ কৰিছো যে এই সময়ত আমাৰ গোপনীয়তাক সদয়ভাৱে সন্মান কৰক । প্ৰেম তথা কৃতজ্ঞতাৰে- বিৰাট আৰু অনুষ্কা ।’’
‘অকায়’ হিন্দী শব্দ ‘কয়া’ৰ পৰা ব্যুৎপত্তি হৈছে, যাৰ অৰ্থ হৈছে ‘শৰীৰ’ । তুৰ্কী মূলত ‘অকায়’ শব্দৰ অৰ্থ হৈছে ‘জিলিকি থকা চন্দ্ৰ’। সন্তানটিৰ নাম দিয়াৰ পূৰ্বে এই শব্দটোৰ কোনটো অৰ্থৰ কথা ভাবিছিল সেয়া এতিয়াও নিশ্চিত কৰা নাই দম্পতীটোৱে ।
২০১১ চনৰ এদিনীয়া বিশ্বকাপ বিজয়ী ভাৰতীয় দলৰ অংশ হিচাপে থকা বিৰাট আৰু অনুষ্কাৰ ইতিমধ্যে এগৰাকী কন্যা সন্তান আছে, তেওঁৰ নাম বামিকা । ব্যক্তিগত কাৰণত ইংলেণ্ডৰ বিৰুদ্ধে চলি থকা টেষ্ট শৃংখলাৰ বাবে ছুটী লৈছিল বেটছমেনগৰাকীয়ে । ৩৫ বছৰীয়া অনুষ্কা এগৰাকী অভিনেত্ৰী আৰু তেওঁ কেইবাটাও বঁটা লাভ কৰিছে ৷
- " class="align-text-top noRightClick twitterSection" data="">
ইংলেণ্ডৰ বিৰুদ্ধে চলি থকা টেষ্ট শৃংখলাৰ পৰা নিজকে বাহিৰত ৰখা বিৰাটক সমৰ্থন কৰিছিল বিচিচিআইৰ সম্পাদক জয় শ্বাহে । বিৰাটে এতিয়ালৈকে ১১৩খন টেষ্ট, ২৯২খন এদিনীয়া আৰু ১১৭খন টি-২০ মেচ খেলিছে ৷ য’ত তেওঁ ক্ৰমে টেষ্টত ৮,৮৪৮ ৰাণ, এদিনীয়াত ১৩,৮৪৮, আৰু টি-২০ ত ৪০৩৭ ৰান সংগ্ৰহ কৰিছে । নগদ ধনেৰে সমৃদ্ধ ইণ্ডিয়ান প্ৰিমিয়াৰ লীগত ৰয়েল চেলেঞ্জাৰছ বেংগালুৰুৰ হৈ খেলা বিৰাটে দলটোৰ অধিনায়কত্বও কৰিছে ।
লগতে পঢ়ক: ভাৰত বনাম ইংলেণ্ড টেষ্ট শৃংখলা, বাকী ৩ খন টেষ্টৰ পৰাও বাহিৰ বিৰাট কোহলী
