স্পৰ্টছ ডেস্ক,৩ জুন : অলৰাউণ্ডাৰ ৰ'ষ্টন চেজৰ অপৰাজিত ৪২ ৰাণৰ ইনিংছৰ সহযোগত দেওবাৰে প্ৰভিডেন্স ষ্টেডিয়ামত অনুষ্ঠিত আইচিচি টি-২০ বিশ্বকাপৰ দ্বিতীয়খন খেলত ৱেষ্ট ইণ্ডিজে পাপুৱা নিউ গিনিক (পিএনজি) ৫ উইকেটত পৰাস্ত কৰে । প্ৰথমে বেটিং কৰি পিএনজিয়ে সতৰ্কতাৰে ইনিংছ আৰম্ভ কৰে । কিন্তু ৱেষ্ট ইণ্ডিজৰ বলাৰ বিশেষকৈ আলজাৰি জোচেফ আৰু আন্দ্ৰে ৰাছেলে উৎকৃষ্ট ফৰ্মত আছিল আৰু দুয়োগৰাকীয়ে দুটাকৈ গুৰুত্বপূৰ্ণ উইকেট দখল কৰিবলৈ সক্ষম হয় ।
আনহাতে স্পিনাৰ আকেল হুছেইন আৰু ৰ'ষ্টন চেজে অতি সাৱধানে বলিং কৰিছিল যাৰ ফলত পিএনজিৰ বেটিং লাইনআপ ধ্বংস হৈ গৈছিল । ইয়াৰ পিচতো ছেজ বাউৰ উজ্জ্বল অৰ্ধশতকে পিএনজিক যুঁজ দিয়াৰ সুযোগ দিয়ে । কিপলিন ডৰগেয়াৰ ১৮ টা বলত ২৭ ৰাণৰ ইনিংছৰ বাবে দলটোৱে নিৰ্ধাৰিত ২০ অভাৰত ৮ উইকেটত ১৩৬ ৰাণ সংগ্ৰহ কৰে ।
বিজয়ৰ বাবে ৱেষ্ট ইণ্ডিজক ১৩৭ ৰাণৰ প্ৰয়োজন আছিল । ৱেষ্ট ইণ্ডিজৰ অপেনাৰ জনছন চাৰ্লছ দ্বিতীয় অভাৰতে আউট হৈ দলটো প্ৰাৰম্ভিক আঘাতৰ সন্মুখীন হৈছিল । অৱশ্যে বৰষুণৰ বাবে কিছু সময়ৰ বাবে খেলখন স্থগিত হৈছিল । খেল পুনৰ আৰম্ভ হোৱাৰ পিচত নিকোলাছ পুৰাণ (২৭ টা বলত ২৭ ৰাণ) আৰু ব্ৰেণ্ডন কিঙে (২৯ টা বলত ৩৪ ৰাণ) ৫৩ ৰাণৰ গুৰুত্বপূৰ্ণ অংশীদাৰিত্বৰে ইনিংছৰ দায়িত্ব লয় । জন কেৰিকোৰ দ্ৰুত বলত পুৰাণৰ আউট হোৱাৰ পিচত পিএনজি পুনৰ খেলখনত শক্তিশালী স্থিতিলৈ আহে । তাৰ পিচত কেপ্টেইন ৰোভমেন পাৱেলে ইনিংছটো চম্ভালিবলৈ চেষ্টা কৰে কিন্তু মাত্ৰ ১৫ ৰাণ সংগ্ৰহ কৰি আউট হয় ।
শ্বেৰফানে ৰাডাৰফৰ্ডৰ আউটৰ পিচত ৱেষ্ট ইণ্ডিজৰ স্থিতি পুনৰ দুৰ্বল হৈ পৰে । অৱশ্যে অভিজ্ঞ আন্দ্ৰে ৰাছেল আৰু লেড-বেক ৰ'ষ্টন চেজৰ পৰিকল্পনা বেলেগ আছিল । ৰাছেলে ৯ টা বলত ১৫ ৰাণৰ দ্ৰুত ইনিংছ খেলে । যিয়ে ইনিংছটোক প্ৰয়োজনীয় গতি প্ৰদান কৰে ৷ কিন্তু চেজ নায়ক হিচাপে আত্মপ্ৰকাশ কৰে আৰু ২৭ টা বলত অপৰাজিত ৪২ ৰাণ সংগ্ৰহ কৰে । যাৰ ফলত আয়োজক দলটোৱে বিজয়েৰে চলিত বিশ্বকাপৰ অভিযান আৰম্ভ কৰিবলৈ সক্ষম হয় । বিজয়ী ইনিংছ খেলাৰ বাবে চেজক প্লেয়াৰ অব দ্য মেচৰ বঁটাও প্ৰদান কৰা হয় ।
