গুৱাহাটী, 12 মে’ : আই পি এল মেচৰ বাবে গুৱাহাটীত উপস্থিত পঞ্জাৱ কিংছৰ দল ৷ দেওবাৰে বিয়লি পাঞ্জাৱ কিংছৰ দলটো আহি গুৱাহাটীত উপস্থিত হয় ৷ 15 মে’ত বৰ্ষাপাৰাত ৰাজস্থান ৰয়েলছৰ বিৰুদ্ধে অনুষ্ঠিত হ’বলগীয়া মেচৰ বাবে পঞ্জাৱ কিংছৰ দলটো আজি উপস্থিত হয় গুৱাহাটীত ৷ গুৱাহাটীৰ বৰঝাৰ বিমান বন্দৰত উপস্থিত হৈ পোনে পোনে তাজ ভিভাণ্টালৈ ৰাওনা হয় দলটো ৷ পূৰ্ব নিৰ্ধাৰিত সময়ৰ পূৰ্বেই শনিবাৰে গুৱাহাটীত উপস্থিত হয় পঞ্জাৱ কিংছ দলটো ৷
উল্লেখ্য যে, আই পি এল 2024ৰ দুখনকৈ মেচ অনুষ্ঠিত হ’ব বৰ্ষাপাৰাস্থিত অসম ক্ৰিকেট সংস্থাৰ ষ্টেডিয়ামত ৷ 15 আৰু 19 মে’ত অনুষ্ঠিত হ’ব এই মেচ দুখন ৷ 15 মে’ত বৰ্ষাপাৰাত মুখামুখি হ’ব পঞ্জাৱ কিংছ আৰু ৰাজস্থান ৰয়েলছ ৷ আনহাতে 19 মে’ত ৰাজস্থান ৰয়েলছ দলৰ দ্বিতীয়খন ঘৰুৱা খেলপথাৰ বৰ্ষাপাৰাত দলটোৰ মুখামুখি হ’ব কলকাতা নাইট ৰাইডাৰ্ছ ৷
ইফালে এই মেচৰ বাবে পঞ্জাৱ কিংছৰ স্বত্বাধিকাৰী তথা বলিউড অভিনেত্ৰী প্ৰীতি জিন্টা আৰু কলকাতা নাইট ৰাইডাৰ্ছৰ স্বত্বাধিকাৰী তথা বলিউড অভিনেতা শ্বাহৰুখ খান গুৱাহাটীলৈ অহাৰ সম্ভাৱনা আছে ৷ ইতিমধ্যে 11 মে’ত গুৱাহাটীত সংবাদমেল সম্বোধন কৰি এই কথা সদৰী কৰে ৰাজস্থান ৰয়েলছৰ অধ্যক্ষ ৰঞ্জিত বৰঠাকুৰে ৷
আনহাতে ৰাজস্থান ৰয়েলছ 13 মে'ত গুৱাহাটীত উপস্থিত হ’ব আৰু 20 মে’ লৈকে গুৱাহাটীতে থাকিব বুলি জনায় ৰঞ্জিত বৰঠাকুৰে ৷ 14 মে'ৰ পৰা বৰ্ষাপাৰাত দলটোৰ অনুশীলন আৰম্ভ হ’ব ৷
ইতিমধ্যে বৰ্ষাপাৰাত আনুষ্ঠিত হ’বলগীয়া আই পি এলৰ দুখনকৈ মেচক লৈ উৎসাহিত হৈ পৰিছে ৰাজ্যৰ ক্ৰিকেট প্ৰেমী ৷ মেচ দুখনৰ বাবে অসম ক্ৰিকেট সংস্থাইয়ো যাৱতীয় প্ৰস্তুতি প্ৰায় সম্পূৰ্ণ কৰি তুলিছে ৷
লগতে পঢ়ক : বৰ্ষাপাৰাত আই পি এলৰ দৰ্শক হ’ব শ্বাহৰুখ খান-প্ৰীতি জিন্টা ! - IPL 2024
