গুৱাহাটী, 22 এপ্ৰিল : ৰাজ্যত লোকসভা নিৰ্বাচনৰ দ্বিতীয় আৰু তৃতীয় পৰ্যায়ৰ ভোটগ্ৰহণৰ বাবে প্ৰস্তুতি অব্যাহত আছে ৷ 7 মে’ত তৃতীয় পর্যায়ত ভোটগ্ৰহণ অনুষ্ঠিত হ'বলগীয়া 4 টা লোকসভা সমষ্টিৰ মনোনয়ন পৰীক্ষাৰ অন্তত গৰাকীৰ মনোনয়ন বৈধ ঘোষণা কৰা হয় ৷ তৃতীয় পৰ্যায়ৰ নিৰ্বাচনৰ কোকৰাঝাৰ, বৰপেটা,গুৱাহাটী আৰু ধুবুৰী এই 4 টা সমষ্টিৰ বাবে মনোনয়ন পত্ৰ উঠাই লোৱাৰ দিনো আছিল আজি ৷ কোকৰাঝাৰত 3 গৰাকী আৰু ধুবুৰীত 1 গৰাকী প্ৰাৰ্থীয়ে আজি মনোনয়ন প্ৰত্যাহাৰ কৰে ৷
তৃতীয় পৰ্যায়ৰ নিৰ্বাচনৰ বাবে দাখিল কৰা মনোনয়ন পত্ৰসমূহ পৰীক্ষাৰ অন্তত মুঠ ৮ গৰাকী প্ৰাৰ্থীৰ মনোনয়ন বাতিল কৰা হয় ৷ কোকৰাঝাৰ সমষ্টিৰ এগৰাকী, ধুবুৰী সমষ্টিৰ 4 গৰাকী, বৰপেটা সমষ্টিৰ এগৰাকী আৰু গুৱাহাটী সমষ্টিৰ 2 গৰাকী প্ৰার্থীৰ মনোনয়ন বাতিল কৰা হয় ৷ পৰীক্ষাৰ অন্তত তৃতীয় পর্যায়ৰ লোকসভা নিৰ্বাচনৰ বাবে সৰ্বমুঠ 47 গৰাকী প্ৰার্থীৰ মনোনয়ন বৈধ হিচাপে বিবেচিত কৰা হৈছে ৷ তৃতীয় পৰ্যায়ত নিৰ্বাচনত 4 টা সমষ্টিত মুঠ 47 গৰাকী প্ৰাৰ্থীয়ে প্ৰতিদ্বন্দ্বিতা কৰিব ৷
বাতিল হোৱা সকলৰ ভিতৰত উল্লেখযোগ্য হ’ল জনজাতিৰ বাবে সংৰক্ষিত কোকৰাঝাৰ সমষ্টিৰ নৱ কুমাৰ শৰণীয়াৰ মনোনয়ন ৷ কোকৰাঝাৰৰ বিগত 5 বছৰৰ সাংসদ ৰূপে নিৰ্বাচিত হোৱা নৱ শৰণীয়াৰ মনোনয়ন জাতিগত প্ৰমাণ পত্ৰ ভু্ৱা বুলি উচ্চ ন্যায়ালয়ে শেহতীয়াভাৱে ৰায় দিয়ে ৷ পিচত স্বভাৱিকতে বাধা আহি পৰে জনজাতিৰ বাবে সংৰক্ষিত সমষ্টিটোত শৰণীয়াৰ মনোনয়ন দাখিলত ৷ অৱশেষত প্ৰত্যাশিতভাৱেই নিৰ্বাচন আয়োগৰ ওচৰত বাতিল হ’ল নৱ শৰণীয়াৰ মনোনয়ন ৷
নামনি অসমত হ’বলগীয়া তৃতীয় পৰ্যায়ৰ এই নিৰ্বাচন হ’ব অতি লক্ষ্যণীয় ৷ কিয়নো এই 4 টা সমষ্টিৰ নিৰ্বাচনত আছে কেইবাগৰাকীও উল্লেখযোগ্য প্ৰাৰ্থী ৷ ধুবুৰীত এ আই ইউ ডি এফৰ বদৰুদ্দিন আজমল বনাম কংগ্ৰেছৰ ৰকিবুল হুছেইনৰ যুঁজখনো তৃতীয় পৰ্যায়ত হ’ব লক্ষণীয় ৷ আনহাতে নতুন পৰিসীমাৰে গঠিত বৰপেটা সমষ্টিত 8 বাৰৰ অগপৰ বিধায়ক তথা বিজেপিৰ মিত্ৰজোঁটৰ প্ৰাৰ্থী ফণীভূষণ চৌধুৰীও তৃতীয় পৰ্যায়ৰ এগৰাকী বিশেষ উল্লেখনীয় প্ৰাৰ্থী ৷ ইফালে বিগত নিৰ্বাচনৰ দৰে এইবাৰো গুৱাহাটী লোকসভা সমষ্টিত আন প্ৰাৰ্থীৰ লগতে কংগ্ৰেছ আৰু বিজেপি দুয়োটা দলৰে প্ৰাৰ্থীয়েই মহিলা ৷
