গুৱাহাটী, 27 এপ্ৰিল: নিৰ্বাচনী প্ৰচাৰৰ উদ্দেশ্যৰে 29 এপ্ৰিলত অসমলৈ আহিব গৃহমন্ত্ৰী অমিত শ্বাহ ৷ ইতিমধ্যে ৰাজ্যত সমাপ্ত হৈছে লোকসভা নিৰ্বাচনৰ দুটা পৰ্যায়ৰ ভোটগ্ৰহণ ৷ তৃতীয় পৰ্যায়ৰ ভোটগ্ৰহণৰ বাবে নিৰ্বাচনী তৎপৰতা বৃদ্ধি পাইছে ৰাজ্যিক বিজেপিৰ । তৃতীয় পৰ্যায়ত ভোটগ্ৰহণ হ’বলগীয়া চাৰিটা সমষ্টিৰ বাবে ব্যস্ততা বাঢ়িছে ভাৰতীয় জনতা পাৰ্টিৰ ।
এই সন্দৰ্ভত ইতিমধ্যে মুখ্যমন্ত্ৰী ড৹ হিমন্ত বিশ্ব শৰ্মা আৰু ৰাজ্যিক বিজেপিৰ সভাপতি ভৱেশ কলিতাৰ উপস্থিতিত বাজপেয়ী ভৱনত অনুষ্ঠিত হৈছে কেইবাখনো বৈঠক । শুকুৰবাৰৰ নিশাও মহানগৰীৰ বশিষ্ঠস্থিত ভাৰতীয় জনতা পাৰ্টিৰ মুখ্য কাৰ্যালয়ত মুখ্যমন্ত্ৰীৰ উপস্থিতিত অনুষ্ঠিত হৈ যায় এখন বিশেষ নিৰ্বাচনী বৈঠক । এই বৈঠকত নিৰ্বাচন হ’বলগীয়া চাৰিটা সমষ্টিৰ লগতে কেন্দ্ৰীয় গৃহমন্ত্ৰী অমিত শ্বাহৰ আগন্তুক অসম ভ্ৰমণ সম্পৰ্কতো আলোচনা কৰা হয় ।
বৈঠকৰ অন্তত সংবাদ মাধ্যমৰ আগত মুখ্যমন্ত্ৰী ড০ হিমন্ত বিশ্ব শৰ্মাই 29 এপ্ৰিলত গৃহমন্ত্ৰী অমিত শ্বাহ অসমলৈ আহিব বুলি জানিবলৈ দিয়ে । লগতে মুখ্যমন্ত্ৰীগৰাকীয়ে এই ৰোড শ্ব'টো গুৱাহাটীৰ চাইকেল ফেক্টৰীৰ পৰা লালগণেশ পৰ্যন্ত হ'ব বুলি জনায় । ইয়াৰোপৰি মহানগৰীৰ ট্ৰেফিক জামৰ লগতে জনসাধাৰণৰ অসুবিধা নোহোৱাকৈ মাত্ৰ দুই কিলোমিটাৰ ৰোড শ্ব'হে হ’ব বুলি মুখ্যমন্ত্ৰী ড৹ হিমন্ত বিশ্ব শৰ্মাই জনায় ।
মুখ্যমন্ত্ৰীগৰাকীয়ে নিৰ্বাচনৰ ফলাফল সম্পৰ্কত কয়, "আমি 14 টাৰ বাবেই লাগি আছো । কিন্তু আমাৰ টাৰ্গেট 14 নহয় 11.5 হে । গুৱাহাটীত আমি 5 লাখ ভোটৰ ব্যৱধানত জয়ী হম । কিন্তু তাৰ এটা কথাও আছে । গুৱাহাটীত ভোট দিব অহা মানুহৰ সংখ্যা কম । কিন্তু যিসকলে ভোট দিব আহে বিজেপিকে দিয়ে । সেয়েহে আমি ৰোড শ্ব', সভা আদিৰ দ্বাৰা অলপ সজাগতা অভিযান চলায় আছো ৷
সমান্তৰালভাবে মুখ্যমন্ত্ৰীগৰাকীয়ে ৰাজ্যবাসীৰ বিজেপিৰ সৈতে অগাধ মৰম আছে বুলি উল্লেখ কৰি দেশত এতিয়া ‘মোদী চুনামী’ চলি আছে বুলিও দাবী কৰে ৷
লগতে পঢ়ক: আজমলে কেৱল হিমন্ত বিশ্ব শৰ্মাৰ শ্ৰুতলিপি মতে কাম কৰে: ৰকিবুল হুছেইন - Lok Sabha Election 2024
