গুৱাহাটী, ২২ এপ্ৰিল: চৰকাৰত সহযোগী দল বিজেপিৰ এগৰাকী বিধায়কৰ বিৰুদ্ধে মুকলিকৈ বিষ্ফোৰক অভিযোগ উত্থাপন চৰকাৰখনৰে আন এটা সহযোগী দল অগপৰ এগৰাকী সদস্যাৰ । দিছপুৰ প্ৰেছ ক্লাৱত সোমবাৰে এখন সংবাদমেল সম্বোধন কৰি বিধায়ক পদ্ম হাজৰিকা তথা তেওঁৰ কেইজনমান সহযোগীৰ বিৰুদ্ধে গুণ্ডামিত জড়িত থকাৰ অভিযোগ তোলে নদুৱাৰ অগপৰ সাংগঠনিক সম্পাদিকা চালমা চুলতানাই । বিজেপিৰ গুণ্ডাবাহিনীৰ বিৰুদ্ধে মাৰপিটৰো অভিযোগ তোলে অগপ নেত্ৰীগৰাকীয়ে ।
উল্লেখ্য যে শোণিতপুৰ লোকসভা সমষ্টিৰ বাবে ভোটগ্ৰহণ অনুষ্ঠিত হৈছিল যোৱা ১৯ এপ্ৰিলত । এই ভোটগ্ৰহণৰ সময়তে বিজেপি বিধায়ক পদ্ম হাজৰিকাৰ ঘনিষ্ঠ হিচাপে পৰিচিত আমিদ হামজা আৰু আলিমুদ্দিনৰ বিৰুদ্ধে ৰিগিঙৰ দৰে কাৰ্য সংঘটিত কৰাৰ অভিযোগ তোলে । ভোটকেন্দ্ৰৰ সমীপতে ধন বিলোৱাৰো অভিযোগ তোলে । চালমাই এই কাৰ্যৰ বিৰোধিতা কৰাৰ বাবেই তেওঁক এটা কোঠাত বন্দী কৰি থোৱাৰ লগতে শাৰীৰিকভাৱে অপদস্থ কৰাৰো অভিযোগ তুলিছে ।
তাৰোপৰি নিৰ্বাচনৰ আগে আগে আলিমুদ্দিন মহিলাগৰাকীৰ ঘৰলৈ গৈ তেওঁক ধনৰ প্ৰলোভন দি মহিলাসকলক বিজেপিত ভোটদানৰ বাবে আহ্বান জনাবলৈ হেঁচা দিছিল । কিন্তু মহিলাগৰাকীয়ে ইয়াৰ বিৰোধিতা কৰাত আলিমুদ্দিনে তেওঁক ভাবুকি প্ৰদান কৰা বুলিও চালমাই অভিযোগ কৰে ।
ইফালে ভোটকেন্দ্ৰত এইধৰণৰ কাৰ্য চলি থকাৰ সময়ত পদ্ম হাজৰিকাও উপস্থিত থকা বুলি চালমাই অভিযোগ তোলে । তাৰোপৰি আলিমুদ্দিনে আৰক্ষী লগাই চালমাক পাঁচমাইল থানালৈ লৈ যোৱাৰ পিচত তাৰ পৰা নিজৰ গাড়ীত উঠাই সদৰ থানালৈ লৈ যোৱা বুলি অগপ কৰ্মীগৰাকীয়ে কয় । গাড়ীৰ ভিতৰত চালমাক প্ৰহাৰ কৰাৰ লগতে বন্দুক দেখুৱাই ভাবুকি দিয়া বুলিও অভিযোগ তুলিছে ।
নদুৱাৰ অগপৰ সাংগঠনিক সম্পাদিকাগৰাকীক কংগ্ৰেছী সজাই ড্ৰাগছৰ দৰে নিষিদ্ধ সামগ্ৰী মহিলাগৰাকীৰ বাসগৃহত থৈ অহাৰ ষড়যন্ত্ৰ অভিযোগ উত্থাপন কৰে অগপ নেত্ৰীগৰাকীয়ে । ভোটৰ হাৰ কমিলে পদ্ম হাজৰিকাই পুনৰ টিকট নোপোৱাৰ স্বাৰ্থত এনে দুষ্কাৰ্যৰ কৰিছে বুলি মন্তব্য চালমা চুলতানাৰ ।
লগতে পঢ়ক: এইখন চান্দা দৌ ধান্ধা লৌ চৰকাৰ: সুপ্ৰীয়া শ্ৰীনাটে - LOK SABHA ELECTION 2024
