গুৱাহাটী, 2 মাৰ্চ : অসম গণ পৰিষদক আগন্তুক লোকসভা নিৰ্বাচনৰ বাবে বিজেপিয়ে নামনি অসমৰ দুই সমষ্টি বৰপেটা আৰু ধুবুৰী এৰি দিছে ৷ কিন্তু দুয়োটা সমষ্টিতে প্ৰাৰ্থিত্ব প্ৰদানক লৈ অগপই বিমোৰত পৰা দেখা গৈছে । বিশেষকৈ বৰপেটাৰ প্ৰাৰ্থিত্বক লৈ অসুবিধাত পৰিছে অগপ ৷
অসম গণ পৰিষদে বৰপেটা লোকসভা সমষ্টিত ফণীভূষণ চৌধুৰী আৰু ধুবুৰীত জাভেদ ইছলামক প্ৰাৰ্থিত্ব দিয়াৰ বাবে বিজেপিয়ে প্ৰস্তুতি আৰম্ভ কৰিছিল ৷ সেই অনুসৰি প্ৰস্তাৱো আগবঢ়াইছিল দুয়োগৰাকী প্ৰাৰ্থীক । কিন্তু সূত্ৰ অনুসৰি বৰপেটাত প্ৰাৰ্থী হ’ব বিচৰা নাই বঙাইগাঁও বিধানসভা সমষ্টিৰ 8 বাৰৰ বিধায়ক ফণীভূষণ চৌধুৰীয়ে । দিছপুৰ এৰি দিল্লীলৈ যাব বিচৰা নাই তেওঁ ৷
ইয়াৰ বিপৰীতে বঙাইগাঁৱত অগপৰ নেতা-কৰ্মীয়েও এৰি দিব বিচৰা নাই ফণীভূষণ চৌধুৰীক ৷ বঙাইগাঁও জিলা অগপই ফণীভূষণ চৌধুৰীক বৰপেটাৰ প্ৰাৰ্থী হিচাপে ঘোষণা নকৰিবলৈ দলীয় নেতৃত্বক আহ্বান জনাইছে । বঙাইগাঁও অগপৰ দাবী যে বিধায়ক ফণীভূষণ চৌধুৰীক আগন্তুক লোকসভা নিৰ্বাচনত প্ৰাৰ্থিত্ব প্ৰদান কৰিলে নামনি অসমত অগপৰ সাংগঠনিক ভেঁটি উচন হোৱাৰ উপক্ৰম হ’ব ।
লগতে পঢ়ক : লোকসভা নিৰ্বাচনৰ বাবে ৰাজ্যিক বিজেপিৰ বিশাল আয়োজন, ভৱেশ-পৱিত্ৰক গুৰু দায়িত্ব
ফণীভূষণ চৌধুৰীয়ে প্ৰাৰ্থিত্ব প্ৰত্যাখানে ওলট-পালট লগাইছে অগপ আৰু বিজেপিৰ নিৰ্বাচনী সমীকৰণৰ লগতে ৰাজনৈতিক সমীকৰণতো ৷ ইয়াৰ ফলত বৰপেটাত নতুনকৈ ফণীভূষণ চৌধুৰীৰ বিকল্প প্ৰাৰ্থী বিচাৰিবলৈ বাধ্য হৈছে ৷ লগে লগে বৰপেটা লোকসভা সমষ্টিৰ অগপৰ নিৰ্বাচনী প্ৰেক্ষাপটত চৰ্চিত হৈছে আন কেইবাটাও নাম ৷ চৰ্চিত হৈছে বৰপেটাৰ অগপৰ প্ৰাক্তন বিধায়ক গুনীন দাসৰ নাম ৷
পূৰ্বৰে পৰা চৰ্চিত হৈ আহিছে পাঠশালাৰ শৈক্ষিকখণ্ডৰ বিশিষ্ট ব্যৱসায়ী ৰঞ্জিৎ কুমাৰ ডেকাৰ নাম ৷ আনহাতে শেহতীয়াকৈ উচ্চাৰিত হৈছে অসম বিধানসভাৰ প্ৰধান সচিব পদৰ পৰা যোৱা 29 ফেব্ৰুৱাৰীত অৱসৰ গ্ৰহণ কৰা হেমেন দাসৰ নাম ৷ অগপৰ এটা অংশই বিচাৰিছে কুমাৰ দীপক দাসক দিয়া হওক অগপৰ বৰপেটাৰ প্ৰাৰ্থিত্ব । চৰ্চালৈ আহিছে ৰহিম জিব্ৰানৰ নামো ৷
বৰপেটা আৰু ধুবুৰীক লৈ আজি গুৱাহাটীত বৈঠকত বহাৰ কথা অগপৰ নেতৃত্বৰ ৷ এতিয়া লক্ষণীয় হ’ব বৰপেটা আৰু ধুবুৰীৰ প্ৰাৰ্থী হিচাবে কাক প্ৰক্ষেপ কৰিব অগপই ।
লগতে পঢ়ক : নগাঁও লোকসভা সমষ্টিৰ প্ৰাৰ্থিত্বক লৈ বিপাঙত কংগ্ৰেছ-বিজেপি !
