নিউজ ডেস্ক, 29 মাৰ্চ : ২৯ মাৰ্চত সমগ্ৰ বিশ্বতে পালন কৰা হয় বিশ্ব পিয়ানো দিৱস । এই দিৱসত পিয়ানো সম্পৰ্কীয় পদক্ষেপৰ বাবে এক মঞ্চ প্ৰদান কৰাত গুৰুত্ব আৰোপ কৰা হৈছে, যিয়ে সংগীতৰ সৃষ্টিক আগুৱাই নিব আৰু পিয়ানো বজোৱাৰ আনন্দ বিয়পাই দিব । ষ্টেণ্ডাৰ্ড পিয়ানোৰ ৮৮টা কিৰ বাবে উৎসৰ্গিত এই দিনটো লিপ ইয়েৰ বৰ্ষৰ ওপৰত নিৰ্ভৰ কৰি ২৮ বা ২৯ মাৰ্চত পালন কৰা হয় । বছৰৰ ৮৮ সংখ্যক দিনটোত, কিংবদন্তি পিয়ানোবাদক আৰু প্ৰভাৱশালী সুৰকাৰসকলক শ্ৰদ্ধাঞ্জলি জনোৱা হয় ।
বিশ্ব পিয়ানো দিৱসৰ ইতিহাস :
১৭০০ চনত ইটালীৰ বাৰ্টলমিঅ' ক্রিষ্টোফ'ৰীয়ে পিয়ানোৰ আৱিষ্কাৰৰ কৃতিত্ব লাভ কৰে । প্ৰথম অৱস্থাত ইয়াক 'ক্লেভিচেম্বোলো কল পিয়ানো ই ফ'ৰ্টে' (কোমল আৰু উচ্চ শব্দ উৎপন্ন কৰিব পৰা বাদ্যযন্ত্ৰ) নামেৰে অভিহিত কৰা হয় ৷ পিছলৈ ইয়াক 'পিয়ানো' নাম প্ৰদান কৰা হয় । ২০১৫ চনত জাৰ্মান পিয়ানোবাদক আৰু সুৰকাৰ নিলছ ফ্ৰাহমৰ পৰা বিশ্ব পিয়ানো দিৱসৰ ধাৰণাটোৰ উৎপত্তি হৈছিল । ফ্ৰেমৰ ধাৰণাটোৱে দ্ৰুতগতি লাভ কৰিছিল আৰু তেতিয়াৰ পৰাই বিশ্ব পিয়ানো দিৱস বিশ্বৰ সংগীতপ্ৰেমী আৰু পিয়ানোবাদকসকলে উদযাপন কৰা বাৰ্ষিক অনুষ্ঠানত পৰিণত হয় ।
বিশ্ব পিয়ানো দিৱসৰ তাৎপৰ্য ২০২৪ :
স্পিটফায়াৰ অডিঅ’ৰ ক্রিষ্টিয়ান হেনছনে ২০১৮ চনত পিয়ানোবুক নামৰ এটা ৱেবছাইট আৰু ইউটিউব চেনেল আৰম্ভ কৰিছিল, যিটো বিনামূলীয়াকৈ আৰ্হি বাদ্যযন্ত্র সৃষ্টি আৰু শ্বেয়াৰ কৰাৰ বাবে উৎসৰ্গিত আছিল । ফ্ৰাহমৰ মতে, দিনটোৰ তাৎপৰ্য্য মূলতঃ পিয়ানো আৰু ইয়াৰ সৈতে জড়িত সকলো বস্তুকে উদযাপন কৰা, য’ত পৰিবেশক, সুৰকাৰ, পিয়ানো নিৰ্মাতা, টিউনাৰ, মুভাৰ, আৰু আটাইতকৈ গুৰুত্বপূৰ্ণ কথাটো হ’ল শ্ৰোতাসকলো ইয়াত অন্তৰ্ভুক্ত ।
ভাৰতত পিয়ানোৰ প্ৰচলন :
ভাৰতত পিয়ানোৰ প্ৰচলন ১৮ শতিকাৰ পৰাই আৰম্ভ হয়, যেতিয়া ব্ৰিটিছ ইষ্ট ইণ্ডিয়া কোম্পানীয়ে ইয়াক অন্যান্য পশ্চিমীয়া বাদ্যযন্ত্ৰৰ সমান্তৰালভাৱে আনিছিল । প্ৰথম অৱস্থাত ব্ৰিটিছসকলৰ মনোৰঞ্জনৰ বাবে ব্যৱহাৰ কৰা পিয়ানোৱে অতি সোনকালেই ভাৰতীয় অভিজাত শ্ৰেণীক নিজৰ মন্ত্ৰমুগ্ধকৰ শব্দ আৰু সংগীত শৈলীৰে মোহিত কৰি পেলালে ।
ভাৰতৰ প্ৰথম পিয়ানো কাৰখানা ২০ শতিকাৰ আৰম্ভণিতে কলিকতা (বৰ্তমান কলকাতা)ত প্ৰতিষ্ঠা হৈছিল । আৰ এছ হাৱাৰ্ড নামৰ কোম্পানীটোৱে ভাৰতীয় অভিজাত শ্ৰেণীৰ মাজত জনপ্ৰিয় উচ্চমানৰ পিয়ানো প্ৰস্তুত কৰিছিল । এই পিয়ানোবোৰৰ বহুতো আজিও ব্যৱহৃত হৈ আছে আৰু সংগ্ৰাহকসকলে ইয়াক বাৰুকৈয়ে বিচাৰে ।
বলীউডত পিয়ানো :
বলীউডত চলচ্চিত্ৰ সংগীতত পিয়ানোৱে এক অম্লান চিন ৰাখিছে । পশ্চিমীয়া সোৱাদ জগাই তুলিবলৈ অসংখ্য গীতত বিশেষভাৱে পিয়ানো প্ৰদৰ্শিত হৈছে । ১৯৭৬ চনৰ খেয়ামৰ সুৰ আৰু মুকেশৰ কণ্ঠৰ কভি কভি ছবিৰ "কভি কভি মেৰে দিল মে"ৰ পৰা ২০০৮ চনৰ ৰব নে বানা দি জোডি ছবিৰ "তুঝ মেই ৰাব দিখতা হ্যায়"ৰ দৰে সমসাময়িক হিট গীতত এই পিয়ানোক প্ৰদৰ্শিত কৰা হৈছে ৷
১৯৯৮ চনৰ "কুচ কুচ হোতা হায়" ছবিৰ একে নামৰ গীতটিটো ইয়াৰ ব্যৱহাৰ হৈছিল । পিয়ানোৱে দৰ্শকক মোহিত কৰি ৰাখিছে আৰু বলীউডৰ সংগীতৰ পৰিৱেশ সমৃদ্ধ কৰি ৰাখিছে ।
লগতে পঢ়ক : বিশ্ব নাট্য দিৱস উদযাপনৰ উদ্দেশ্য তথা ইয়াৰ আৰম্ভণি কেনেকৈ হ’ল জানি লওক - WORLD THEATRE DAY 2024
