চিটাৰা ডেস্ক, ৭ ফেব্ৰুৱাৰী: হৃত্বিক ৰোশন আৰু দীপিকা পাডুকন অভিনীত ছবি ‘ফাইটাৰ’ ছবিগৃহত মুক্তি পালে । ছবিখনে দৰ্শকৰ পৰা মিশ্ৰিত সঁহাৰি লাভ কৰিছে । কিন্তু ছবিখনৰ গীতবোৰ যথেষ্ট ভাইৰেল হৈ পৰিছে । ফাইটাৰৰ গীতবোৰ দৰ্শকে ভাল পাইছে ৷ ইফালে ভেলেণ্টাইন ডে’ ওচৰ চাপিছে ৷ এনে পৰিস্থিতিত নিৰ্মাতাই ছবিখনৰ পৰা এটা ৰোমান্টিক গীত মুকলি কৰিছে ।
ভেলেণ্টাইন ডে’ৰ পূৰ্বে ফাইটাৰৰ নতুন গীত মুকলি
ছবিখন মুক্তি পোৱাৰ দুসপ্তাহৰ পাচত ভেলেণ্টাইন ডে’ উপলক্ষে ছবিখনৰ পৰা মুক্তি দিয়া হৈছে ‘বেকাৰ দিল’ গীত । গীতটোৰ প্ৰতিটো সুৰত মৰম আৰু ৰোমাঞ্চ ফুটি উঠিছে । কেৱল মৰম আৰু ৰোমাঞ্চেই নহয়, এই গীতটিত এটি আৱেগিক সুৰো আছে যিয়ে হৃদয় চুই যাব আপোনাৰ । হৃত্বিক ৰোশন আৰু দীপিকা পাডুকনৰ আচৰিত কেমিষ্ট্ৰী দেখা পোৱা গৈছে এই গীতটিত । এই গীতটি ভেলেণ্টাইন ডে’ৰ এটা বিশেষ উপহাৰ ৰূপে পৰিগণিত হৈছে ৷
কেতিয়া ফাইটাৰ মুকলি হৈছিল ?
ছবিখনৰ বিষয়ে ক’বলৈ গ’লে ২৫ জানুৱাৰীত গণৰাজ্য দিৱস উপলক্ষে ছবিগৃহত মুক্তি পাইছিল ফাইটাৰ । হৃত্বিক ৰোশন আৰু দীপিকা পাডুকনৰ উপৰিও অনিল কাপুৰ, কৰণ সিং গ্ৰ’ভাৰ আৰু সন্দিজা শ্বেইখে ছবিখনত গুৰুত্বপূৰ্ণ চৰিত্ৰত অভিনয় কৰিছে । এই ছবিখন বায়ুসেনাৰ পাইলটৰ আধাৰত নিৰ্মিত । ছবিখনৰ সকলো তাৰকা বায়ুসেনাৰ বিষয়াৰ চৰিত্ৰত অভিনয় কৰিছে ।
সিদ্ধাৰ্থ আনন্দৰ পৰিচালনাত আৰু মাৰ্ফ্লিক্স পিকচাৰ্ছৰ সহযোগত ভায়াকম ১৮ ষ্টুডিঅ’ই উপস্থাপন কৰিছে ‘ফাইটাৰ’ । ছবিখনৰ সংগ্ৰহৰ কথা ক’বলৈ গ’লে ছবিখনে মুক্তিৰ দিনটোত ২২.৫০ কোটি টকা সংগ্ৰহ কৰিছিল । একে সময়তে ১২ দিনলৈ ফাইটাৰৰ মুঠ সংগ্ৰহ ১৭৮.৬০ কোটি টকা হৈছে । বৰ্তমানো ফাইটাৰ ছবিগৃহত চলি আছে ৷
লগতে পঢ়ক: ফাইটাৰৰ নিৰ্মাতালৈ অসমত নিযুক্ত উইং কমাণ্ডাৰৰ জাননী
