গুৱাহাটী, ২৯ জানুৱাৰী: পুনৰ আন্তঃৰাষ্ট্ৰীয় পৰ্যায়ত উজলিল অসমীয়া তথ্যচিত্ৰ । বিগত ৯ জানুৱাৰীৰ পৰা জয়পুৰত অনুষ্ঠিত হোৱা ‘জয়পুৰ আন্তঃৰাষ্ট্ৰীয় চলচ্চিত্ৰ মহোৎসৱত’ উজলি উঠিল অসমৰ এখন বিশেষ তথ্যচিত্ৰ । ২০২৪ বৰ্ষৰ জয়পুৰ আন্তঃৰাষ্ট্ৰীয় ছবি মহোৎসৱত শ্ৰেষ্ঠ চুটি তথ্যচিত্ৰৰ বঁটা লাভ কৰিবলৈ সক্ষম হৈছে অসম আৰক্ষীৰ সঞ্চালক প্ৰধান জ্ঞানেন্দ্ৰ প্ৰতাপ সিং অৰ্থাৎ জি পি সিঙৰ প্ৰযোজিত তথ্যচিত্ৰ 'ফেহুঁজালি'এ ।
বিদ্ৰোহী সংগঠন আলফাৰ বাস্তৱ কাহিনীক লৈ নিৰ্মিত তথ্যচিত্ৰখন পৰিচালনা কৰিছে উপ-মহাপৰিদৰ্শক (ডিআইজি), অসম আৰক্ষীৰ বিশেষ টাস্ক ফ’ৰ্চ (এছটিএফ)ৰ পার্থ সাৰথি মহন্তই । এইখিনিতে উল্লেখ কৰিব লাগিব যে তেওঁ এগৰাকী আৰক্ষী হোৱাৰ উপৰিও এগৰাকী চলচ্চিত্ৰ নিৰ্মাতাও ৷
উল্লেখযোগ্য যে, ২০২৪ বৰ্ষৰ জয়পুৰ আন্তঃৰাষ্ট্ৰীয় ছবি মহোৎসৱত অংশগ্ৰহণ কৰিছে মুঠ ৮২ খন দেশে । ৮২ খন দেশৰ মুঠ ২৯৭১ খন কথাছবিৰ মাজৰ পৰা মহোৎসৱত প্ৰদৰ্শিত হোৱা মুঠ ৩২৯ খন কথাছবিৰ ভিতৰত চুটি তথ্যচিত্ৰৰ শাখাত শ্ৰেষ্ঠ চুটি তথ্যচিত্ৰৰ বঁটা লাভ কৰে ‘ফেহুঁজালি’এ ।
ফেহুঁজালিৰ কাহিনী কি ?
তথ্যচিত্ৰখনত ধনৰ প্ৰলোভনকে ধৰি বিভিন্ন কৌশলৰ জৰিয়তে উগ্ৰপন্থী সংগঠনত যোগদান কৰা উত্তৰ-পূব ৰাজ্যৰ যুৱক-যুৱতীসকলৰ দুৰ্দশাৰ ওপৰত গভীৰভাৱে গুৰুত্ব আৰোপ কৰিছে । ক্ষোভিত আৰু বঞ্চিত যুৱকসকলৰ যে স্বাধীন অসমৰ ধাৰণা অলীক উপলব্ধি তাকেই কাহিনীৰ আধাৰ হিচাপে লৈ এই চুটি ছবিখন নিৰ্মাণ কৰা হৈছে ৷ লগতে বিদেশী শক্তিৰ হাতৰ পুতলালৈ ৰূপান্তৰ হোৱা এনে সন্ত্ৰাসবাদী সংগঠনৰ দেশপ্ৰেমৰ ভুৱা অভিনয়ৰ প্ৰতি ভোল নোযোৱাৰ বাবেও এক বার্তা এই ছবিখনৰ জৰিয়তে দিবলৈ প্ৰয়াস কৰা হৈছে ।
লগতে পঢ়ক: নেটফ্লিক্সত প্ৰকাশ পাব শ্বীনা বৰাৰ হত্যাকাণ্ডৰ আঁৰৰ কাহিনী
