নিউজ ডেস্ক, ২১ ফেব্ৰুৱাৰী : ভাৰত ভ্ৰমণলৈ অহা গ্ৰীক প্ৰধানমন্ত্ৰী কিৰিয়াকোছ মিটচোটাকিছ মঙলবাৰে ৰাষ্ট্ৰীয় ৰাজধানীত উপস্থিত হয় । উল্লেখ্য যে ২১-২৩ ফেব্ৰুৱাৰীত অনুষ্ঠিত হ'বলগীয়া ৰাইছিনা আলোচনা, ২০২৪ৰ মুখ্য অতিথি আৰু মুখ্য অধ্যক্ষ হৈছে গ্ৰীক প্ৰধানমন্ত্ৰী ।
"হেলেনিক গণৰাজ্যৰ প্ৰধানমন্ত্ৰী কে মিটচোটাকিছক তেওঁৰ প্ৰথম ৰাষ্ট্ৰীয় ভ্ৰমণসূচীৰে নতুন দিল্লীত উপস্থিত হোৱাৰ বাবে উষ্ম আদৰণি জনাইছোঁ । বিমানবন্দৰত ৰাজ্যিক মন্ত্ৰী এম লেখিয়াটে তেওঁক স্বাগতম জনায় । প্ৰধানমন্ত্ৰী মিটচোটাকিছ ৰাইচিনা আলোচনা, ২০২৪ৰ মুখ্য অতিথি আৰু মুখ্য অধ্যক্ষ ।" বৈদেশিক পৰিক্ৰমা বিভাগৰ মুখপাত্ৰ ৰণধীৰ জয়ছোৱালে এক্স পোষ্টত কয় ।
প্ৰধানমন্ত্ৰী মিটচোটাকিছৰ সৈতে জ্যেষ্ঠ বিষয়া আৰু এক উচ্চ ক্ষমতাসম্পন্ন ব্যৱসায়িক প্ৰতিনিধি দলো আহি ভাৰতত উপস্থিত হৈছে । ইয়াৰ পূৰ্বে গ্ৰীক বৈদেশিক মন্ত্ৰী জিঅৰ্গোছ গেৰাপেট্ৰাইটিছ ৰাইচিনা আলোচনাত অংশগ্ৰহণ কৰিবলৈ নতুন দিল্লীত উপস্থিত হয় । তেওঁ মঙলবাৰে বৈদেশিক পৰিক্ৰমা মন্ত্ৰী এছ জয়শংকৰক সাক্ষাৎ কৰে আৰু দুয়োগৰাকী নেতাই ভাৰত-গ্ৰীচ আৰু ভাৰত-ইউৰোপ সহযোগিতা শক্তিশালী কৰাৰ বিষয়ত আলোচনা কৰে ।
ইফালে ৰাইচিনা আলোচনাত অংশগ্ৰহণ কৰিবলৈ একাধিক দেশৰ প্ৰতিনিধি ভাৰতত উপস্থিত হয় । ছুইডেনৰ বৈদেশিক মন্ত্ৰী টবিয়াছ বিলষ্ট্ৰম আৰু লাটভিয়াৰ বৈদেশিক মন্ত্ৰী ক্ৰিছজানিছ কাৰিন্স মঙলবাৰে ভাৰতত উপস্থিত হয় ।
ইয়াৰ উপৰি ভূটানৰ বৈদেশিক মন্ত্ৰী লিয়ংপো ডি এন ধুংগিয়েল, লিথুৱেনিয়াৰ বৈদেশিক মন্ত্ৰী গেব্ৰিয়েলিয়াছ লেণ্ডচবাৰ্গিছ আৰু এষ্টোনিয়াৰ বৈদেশিক মন্ত্ৰী মাৰ্গাছ চাহকনাও সন্মিলনৰ বাবে ভাৰতত উপস্থিত হৈছে । আনহাতে, শ্লোভাক গণৰাজ্যৰ বৈদেশিক মন্ত্ৰী আৰু ডাচ্চ বৈদেশিক মন্ত্ৰী হাঙ্কে ব্ৰুইনছলটো মঙলবাৰে ভাৰতত উপস্থিত হয় ।
তদুপৰি, ফিনলেণ্ডৰ বৈদেশিক পৰিক্ৰমা মন্ত্ৰী এলিনা ভালটোনেন বুধবাৰে দুদিনীয়া ভাৰত ভ্ৰমণৰ বাবে নতুন দিল্লীত উপস্থিত হ'ব আৰু ৰাইচিনা আলোচনা, ২০২৪ত অংশগ্ৰহণ কৰিব বুলি এক চৰকাৰী বিবৃতিত কোৱা হৈছে । তেওঁৰ ভ্ৰমণকালত তেওঁ নৰ্ডিক আৰু বাল্টিক মন্ত্ৰীসকলৰ সৈতে একেলগে এক মধ্যাহ্নভোজনত বৈদেশিক পৰিক্ৰমা মন্ত্ৰী এছ জয়শংকৰক সাক্ষাৎ কৰিব ।
উল্লেখ্য যে ৰাইচিনা আলোচনা হৈছে ভূ-ৰাজনীতি আৰু ভূ-অৰ্থনীতিৰ ওপৰত ভাৰতৰ মুখ্য সন্মিলন, যি বিশ্ব সম্প্ৰদায়ে সন্মুখীন হোৱা আটাইতকৈ প্ৰত্যাহ্বানজনক সমস্যাবোৰ সমাধান কৰিবলৈ প্ৰতিশ্ৰুতিবদ্ধ । ৰাইচিনা আলোচনাৰ নৱম সংস্কৰণ ২১-২৩ ফেব্ৰুৱাৰীত দিল্লীত অনুষ্ঠিত হ'ব ।
এই সন্মিলন বৈদেশিক পৰিক্ৰমা মন্ত্ৰালয়ে অবজাৰ্ভাৰ ৰিছাৰ্চ ফাউণ্ডেচনৰ সহযোগত আয়োজন কৰিছে । লক্ষণীয়ভাৱে, 15 বছৰৰ পিছত গ্ৰীচৰ পৰা ভাৰতলৈ এইটো প্ৰথম দ্বিপাক্ষিক ৰাষ্ট্ৰপ্ৰধান বা চৰকাৰী পৰ্যায়ৰ মুৰব্বীৰ ভ্ৰমণ; ২০০৮ চনত অন্তিমবাৰৰ বাবে গ্ৰীচৰ প্ৰধানমন্ত্ৰীয়ে ভাৰত ভ্ৰমণ কৰিছিল ।
২০২৩ চনৰ আগষ্টত প্ৰধানমন্ত্ৰী নৰেন্দ্ৰ মোদীৰ গ্ৰীচ ভ্ৰমণৰ সময়ত ভাৰত-গ্ৰীচৰ সম্পৰ্ক 'কৌশলগত অংশীদাৰিত্ব'লৈ উন্নীত হৈছে । উল্লেখ্য যে এথেন্সলৈ উভতি যোৱাৰ পূৰ্বে প্ৰধানমন্ত্ৰী মিটচোটাকিছে মুম্বাই ভ্ৰমণ কৰিব । ৰাষ্ট্ৰপতি ভৱনৰ সন্মুখত তেওঁক আনুষ্ঠানিকভাৱে আদৰণি জনোৱা হ'ব । আনহাতে, ভাৰতৰ প্ৰধানমন্ত্ৰী মোদী আৰু গ্ৰীক প্ৰধানমন্ত্ৰী মিটচোটাকিছে দ্বিপাক্ষিক আলোচনাত মিলিত হ'ব আৰু প্ৰধানমন্ত্ৰী মোদীয়ে ভ্ৰমণকাৰী বিশিষ্ট ব্যক্তিসকলৰ সন্মানত মধ্যাহ্নভোজনৰো আয়োজন কৰিব ।
লগতে পঢ়ক :চৰকাৰৰ বিৰোধিতা কৰাসকল খালিস্তানী, সন্ত্ৰাসবাদী বা নক্সালবাদী: ৰাকেশ টিকাইট
