নেশ্যনেল ডেস্ক, 27 মে’ : গুজৰাটৰ ৰাজকোটৰ নানা মাৱা পথত অৱস্থিত টি আৰ পি গেমজ’নত শনিবাৰে এক ভয়াবহ অগ্নিকাণ্ড সংঘটিত হয় । এই অগ্নিকাণ্ডত এতিয়ালৈকে 28 জন লোকৰ মৃত্যু হৈছে ৷ এই ঘটনাই কেৱল গুজৰাটতে নহয় সমগ্ৰ দেশক আলোড়িত কৰিছে ।
এই দুৰ্ঘটনাটোত আন বহুলোক আহত হৈছে, সম্প্ৰতি তেওঁলোক সকলো চিকিৎসাধীন হৈ আছে । ইয়াৰ পিচতে শেহতীয়াকৈ অগ্নিকাণ্ডৰ ঘটনাৰ পূৰ্বে চিচিটিভি ফুটেজ পোহৰলৈ আহিছে । এই ফুটেজটোত অগ্নিকাণ্ডৰ ঘটনা কেনেকৈ আৰম্ভ হৈছিল আৰু ই কেনেকৈ নিমিষতে বিয়পি পৰিছিল, সকলো স্পষ্টকৈ পৰিলক্ষিত হৈছে ৷ এই ফুটেজটোত কেনেকৈ 28 গৰাকী লোকে জুইৰ মাজত হাহাকাৰ কৰিছিল আৰু চিৰদিনৰ বাবে নিয়তিৰ কোলাত শুই পৰিছিল সকলো পৰিলক্ষিত হৈছে ৷
এই ফুটেজটো টি আৰ পি গেম জ’নত অগ্নিকাণ্ড হোৱাৰ ঘটনাৰ কেইছেকেণ্ড মানৰ আগৰ । ফুটেজটোত দেখা অনুসৰি, প্ৰথম মহলাৰ চালত ৱেল্ডিঙৰ কাম চলি আছিল, তাৰে মজিয়াত কিছু প্লাইউড শ্বীট পৰি আছে ৷ ৱেল্ডিঙৰ কামৰ সময়ত ওলোৱা জুইৰ স্ফুলিংগ প্লাইউডৰ শ্বীটত পৰি যায় আৰু তাৰ পৰা ধোঁৱা ওলাবলৈ আৰম্ভ কৰে ৷
লগে লগে কিছু কৰ্মচাৰীয়ে ধোঁৱা ওলাই অহা দেখি জুই নুমুৱাবলৈ চেষ্টা কৰে ৷ চকুৰ পচাৰতে ঘটনাস্থলীত জুইৰ ভয়ংকৰ শিখাৰ সৃষ্টি হয় ৷ লগে লগে নিমিষতে সমগ্ৰ অঞ্চলটোত জুয়ে আৱৰি ধৰে ৷ ঘটনা বিষম দেখি ততালিকে কিছু লোকে সেই ঠাইৰ পৰা বাহিৰলৈ ওলাই গৈছিল ৷ কিন্তু তেতিয়ালৈ কিছু লোক জুইত আৱদ্ধ হৈ পৰে ৷ লগে লগে ঘটনাস্থলীত হুলস্থুলীয়া পৰিৱেশৰ সৃষ্টি হৈছিল ৷
ইতিমধ্যে গেম জ’নত সংঘটিত হোৱা অগ্নিকাণ্ডৰ ঘটনা সন্দৰ্ভত আৰক্ষীয়ে পঞ্জীয়ন কৰিছে এক গোচৰ । যুৱৰাজ সিং সোলাংকি আৰু প্ৰকাশ জৈনকে ধৰি ছয়জন অভিযুক্তৰ বিৰুদ্ধে তালুকা থানাত গোচৰ ৰুজু কৰিছে আৰক্ষীয়ে ।
