একেৰাহে ষষ্ঠ বাজেট উপস্থাপন; মোৰাৰজী দেশাইৰ অভিলেখ স্পৰ্শ নিৰ্মলা সীতাৰমণৰ

নিউজ ডেস্ক, ১ ফেব্ৰুৱাৰী : বৃহস্পতিবাৰে কেন্দ্ৰীয় বিত্ত মন্ত্ৰী নিৰ্মলা সীতাৰমণে একেৰাহে ষষ্ঠবাৰৰ বাবে বাজেট উপস্থাপন কৰে । ইয়াৰে ভিতৰত পাঁচখন হৈছে বাৰ্ষিক বাজেট আৰু এখন অন্তৰ্ৱৰ্তীকালীন । উল্লেখ্য যে কেৱল প্ৰাক্তন প্ৰধানমন্ত্ৰী মোৰাৰজী দেশায়েহে ইয়াৰ পূৰ্বে এই মাইলৰ খুঁটি স্থাপনৰ অভিলেখ ৰচনা কৰিছিল । এতিয়া নিৰ্মলা সীতাৰমণে এই অভিলেখ স্পৰ্শ কৰে ।

উল্লেখ্য যে দেশৰ প্ৰথমগৰাকী পূৰ্ণকালীন মহিলা বিত্ত মন্ত্ৰী সীতাৰমণে ২০১৯ চনৰ জুলাই মাহৰ পৰা বাজেট প্ৰস্তুত কৰি আহিছে । অন্তৰ্ৱৰ্তীকালীন বাজেট উপস্থাপনৰ লগে লগে সীতাৰমণে তেওঁৰ পূৰ্বসূৰী যেনে মনমোহন সিং, অৰুণ জেটলী, পি চিদাম্বৰম আৰু যশৱন্ত সিনহাৰ অভিলেখ ভংগ কৰে । তেওঁলোকে একেৰাহে পাঁচখন বাজেট উপস্থাপন কৰিছিল ।

তদানীন্তন বিত্ত মন্ত্ৰী দেশায়ে ১৯৫৯-১৯৬৪ চনৰ ভিতৰত পাঁচখন বাৰ্ষিক বাজেট আৰু এখন অন্তৰ্ৱৰ্তীকালীন বাজেট উপস্থাপন কৰিছিল । নৰেন্দ্ৰ মোদী নেতৃত্বাধীন কেন্দ্ৰীয় কেবিনেটে অন্তৰ্ৱৰ্তীকালীন বাজেটত অনুমোদন জনাইছে । অন্তৰ্ৱৰ্তীকালীন কেন্দ্ৰীয় বাজেটৰ পূৰ্বে বিত্ত মন্ত্ৰী সীতাৰমণে এক প্ৰতিবেদনত ভাৰতৰ প্ৰকৃত জিডিপি বৃদ্ধি 2024-25 বৰ্ষত 7%-ৰ ওচৰত ৰাখে আৰু 2030 চনৰ ভিতৰত 7% অতিক্ৰম কৰাৰ 'যথেষ্ট সুযোগ' থকা বুলি উল্লেখ কৰে । তেওঁ লগতে কয় যে আগন্তুক তিনি বছৰত দেশৰ অৰ্থনীতিয়ে ৫ ট্ৰিলিয়ন ডলাৰত উপনীত হ'ব, যাৰ ফলত বিশ্বৰ তৃতীয় সৰ্ববৃহৎ অৰ্থনীতিৰ দেশ হ'ব ভাৰত ।

উল্লেখ্য যে যিহেতু সংসদীয় নিৰ্বাচন সমাগত, সেয়ে এইটো বিশ্বাস কৰা হয় যে সীতাৰমণৰ অন্তৰ্ৱৰ্তীকালীন বাজেটত গুৰুত্বপূৰ্ণ নীতি পৰিৱৰ্তন নাথাকিব পাৰে । আনহাতে, বিগত মাহত এটা উদ্যোগ সম্পৰ্কীয় অনুষ্ঠানত সীতাৰমণে অন্তৰ্ৱৰ্তীকালীন বাজেটত কোনো 'চমৎকাৰ ঘোষণা'ৰ কথা অস্বীকাৰ কৰিছিল ।

লোকসভা নিৰ্বাচনৰ পিছত জুন মাহৰ ওচৰে-পাজৰে এখন নতুন চৰকাৰ গঠন হোৱাৰ সম্ভাৱনা আছে । সেই সম্ভাৱনাৰ পৰা নতুন চৰকাৰে জুলাই মাহত 2024-25 বৰ্ষৰ বাবে চূড়ান্ত বাজেট প্ৰস্তুত কৰিব । সাধাৰণতে অন্তৰ্ৱৰ্তীকালীন বাজেটত গুৰুত্বপূৰ্ণ নীতি ঘোষণা নাথাকে ।

লগতে পঢ়ক :আপুনি বাৰু জানেনে ভাৰতৰ ৰাজহুৱা একাউণ্ট কি ?