নিউজ ডেস্ক, ৯ ফেব্ৰুৱাৰী : দেশৰ তিনিগৰাকী পুৰোধা ব্যক্তিলৈ এইবাৰৰ ভাৰতৰত্ন সন্মান প্ৰদান কৰা হৈছে । তিনিটা বিশেষ ক্ষেত্ৰত অৱদান আগবঢ়োৱাৰ বাবে এই তিনিগৰাকী ব্যক্তিক ভাৰতৰত্ন প্ৰদানৰ কথা ঘোষণা কৰে প্ৰধানমন্ত্ৰী নৰেন্দ্ৰ মোদীয়ে । দেশৰ প্ৰাক্তন প্ৰধানমন্ত্ৰী পিভি নৰসিংহ ৰাওক মৰণোত্তৰভাৱে ভাৰতৰত্ন বঁটা প্ৰদান কৰা হ'ব । প্ৰধানমন্ত্ৰী নৰেন্দ্ৰ মোদীয়ে শুকুৰবাৰে তেওঁৰ এক্স হেণ্ডেলত এই কথা ঘোষণা কৰে । তেওঁ লগতে প্ৰাক্তন প্ৰধানমন্ত্ৰী চৌধুৰী চৰণ সিং আৰু কৃষি বিজ্ঞানী এমএছ স্বামীনাথনকো এই সন্মান প্ৰদান কৰা হ'ব বুলি ঘোষণা কৰে ।
উল্লেখ্য যে ভাৰতৰত্ন হৈছে ভাৰত চৰকাৰে প্ৰদান কৰা সৰ্বোচ্চ অসামৰিক বঁটা । কেন্দ্ৰীয় চৰকাৰে ইয়াৰ পূৰ্বে বিজেপিৰ জ্যেষ্ঠ নেতা তথা দেশৰ প্ৰাক্তন গৃহ মন্ত্ৰী এলকে আদৱানী আৰু বিহাৰৰ প্ৰাক্তন মুখ্যমন্ত্ৰী কৰ্পুৰী ঠাকুৰক দেশৰ সৰ্বোচ্চ অসামৰিক সন্মান প্ৰদানৰ কথা ঘোষণা কৰিছিল ।
"আমাৰ প্ৰাক্তন প্ৰধানমন্ত্ৰী পিভি নৰসিংহ ৰাওক ভাৰতৰত্নৰে সন্মানিত কৰা হ'ব বুলি উল্লেখ কৰি আনন্দিত হৈছোঁ । এগৰাকী বিশিষ্ট পণ্ডিত তথা ৰাজনীতিবিদ হিচাপে নৰসিংহ ৰাৱে বিভিন্ন পদত দেশলৈ ব্যাপক সেৱা আগবঢ়াই গৈছে ।" মোদীয়ে এক্সত কয় ।
প্ৰধানমন্ত্ৰী মোদীয়ে লগতে কয় যে নৰসিংহ ৰাওক অন্ধ্ৰপ্ৰদেশৰ মুখ্যমন্ত্ৰী, কেন্দ্ৰীয় মন্ত্ৰী আৰু বহু বছৰ ধৰি সংসদ আৰু বিধানসভাৰ সদস্য হিচাপে কৰা কামৰ বাবে সমানে স্মৰণ কৰা হয় ।
প্ৰধানমন্ত্ৰী নৰেন্দ্ৰ মোদীয়ে শুকুৰবাৰে ঘোষণা কৰে যে ভাৰত চৰকাৰে ভাৰতীয় কৃষি বিশেষজ্ঞ তথা কৃষি বিজ্ঞানী ডঃ এমএছ স্বামীনাথনক ভাৰতৰত্ন প্ৰদান কৰিছে ।
"কৃষি আৰু কৃষকৰ কল্যাণৰ ক্ষেত্ৰত আমাৰ দেশলৈ আগবঢ়োৱা স্মৰণীয় অৱদানৰ স্বীকৃতি স্বৰূপে ডঃ এম এছ স্বামীনাথনজীক ভাৰত চৰকাৰে ভাৰতৰত্ন প্ৰদান কৰাটো অপৰিসীম আনন্দৰ বিষয় । তেওঁ প্ৰত্যাহ্বানপূৰ্ণ সময়ত ভাৰতক কৃষিৰ ক্ষেত্ৰত আত্মনিৰ্ভৰশীলতা অৰ্জন কৰাত এক গুৰুত্বপূৰ্ণ ভূমিকা পালন কৰিছিল আৰু ভাৰতীয় কৃষিৰ আধুনিকীকৰণৰ দিশত অসামান্য প্ৰচেষ্টা চলাইছিল ।" প্ৰধানমন্ত্ৰী মোদীয়ে তেওঁৰ ছ'চিয়েল মিডিয়া হেণ্ডেলত এটা পোষ্টত কয় ।
"আমি তেওঁৰ অমূল্য কামক এজন উদ্ভাৱক আৰু পৰামৰ্শদাতা হিচাপে স্বীকৃতি দিছোঁ আৰু বহু শিক্ষাৰ্থীৰ মাজত তেওঁৰ শিক্ষা আৰু গৱেষণা লৈ যাবলৈ উৎসাহিত কৰিছোঁ । ডঃ স্বামীনাথনৰ দূৰদৰ্শী নেতৃত্বই কেৱল ভাৰতীয় কৃষিৰ পৰিৱৰ্তন কৰাই নহয়, লগতে দেশৰ খাদ্য সুৰক্ষা আৰু সমৃদ্ধিও নিশ্চিত কৰিছে । তেওঁ এনে এগৰাকী ব্যক্তি আছিল, যাক মই ভালদৰে চিনি পাইছিলোঁ আৰু মই সদায় তেওঁৰ অন্তৰ্দৃষ্টি আৰু জ্ঞানক মূল্য দিছিলোঁ ।" তেওঁ লগতে কয় ।
ডঃ এমএছ স্বামীনাথনক ভাৰতত কৃষি বিপ্লৱৰ জনক বুলিও জনা যায় । তেওঁ এগৰাকী প্ৰখ্যাত কৃষি বিজ্ঞানী আছিল । তেওঁ দেশত খাদ্যৰ অভাৱ নোহোৱাটো নিশ্চিত কৰাৰ লক্ষ্যৰে কৃষি অধ্যয়ন কৰিছিল ।
আনহাতে, প্ৰাক্তন প্ৰধানমন্ত্ৰী চোধুৰী চৰণ সিঙকো ভাৰতৰত্ন প্ৰদানৰ কথা ঘোষণা কৰা হৈছে । "এই বঁটা দেশলৈ তেওঁৰ অতুলনীয় অৱদানৰ বাবে উৎসৰ্গিত । তেওঁ সমগ্ৰ জীৱন কৃষকসকলৰ অধিকাৰ আৰু কল্যাণৰ বাবে উৎসৰ্গিত কৰিছিল । উত্তৰ প্ৰদেশৰ মুখ্যমন্ত্ৰী হওক বা দেশৰ গৃহমন্ত্ৰী, আনকি এগৰাকী বিধায়ক হিচাপেও তেওঁ সদায় ৰাষ্ট্ৰ নিৰ্মাণত গতি প্ৰদান কৰিছিল । তেওঁ জৰুৰীকালীন অৱস্থাৰ বিৰুদ্ধেও দৃঢ়তাৰে থিয় দিছিল । আমাৰ কৃষক ভাই-ভনীসকলৰ প্ৰতি তেওঁৰ সমৰ্পণ আৰু জৰুৰীকালীন অৱস্থাত গণতন্ত্ৰৰ প্ৰতি তেওঁৰ প্ৰতিশ্ৰুতি সমগ্ৰ দেশৰ বাবে অনুপ্ৰেৰণাদায়ক ।" প্ৰধানমন্ত্ৰী মোদীয়ে বঁটা ঘোষণা কৰি কয় ।
উল্লেখ্য যে আৰএলডিৰ মুৰব্বী তথা প্ৰাক্তন প্ৰধানমন্ত্ৰী চৰণ সিঙৰ নাতিনীয়েক জয়ন্ত সিং চৌধুৰীয়ে তেওঁৰ প্ৰয়াত ককাদেউতাকক প্ৰদান কৰা সন্মানৰ প্ৰতি প্ৰতিক্ৰিয়া ব্যক্ত কৰি ছ'চিয়েল মিডিয়া প্লেটফৰ্ম এক্সত প্ৰধানমন্ত্ৰী মোদীৰ পোষ্টটো পুনৰ টুইট কৰি কয়, "হৃদয় জয় কৰিলে ! #ভাৰতৰত্ন" ।
লগতে পঢ়ক :ভূমিৰ বিনিময়ত চাকৰি; ৰাবড়ী দেৱীসহ লালুৰ আত্মীয়ৰ অন্তৰ্ৱৰ্তীকালীন জামিন লাভ
